إنجيل مُحَمّدْ

يا نبيَّ الله

نفس الطباع بإختلاف الوش..
المختارين قلة ..و اللي باقي عوام..
بيخبّطوا ف بعض ..خبطت فيك معلش..
العيون مفتوحين لكن عليها غمام..
خبطت فيك خبطة..
اوقعت فرحتي..
اضعفت قبضتي..
اسرفت ازمتي..
اوقعت فرحتي ..وقع كالاقدام ..
أضعفت قبضتي ..الممسكة باللجام ..
اسرفت ازمتي ..و زمت شفايف لابتسام ..

يا رنة الانغام .. يا صاحب الإلهام..
مدد يا امام .. مدد يا امام ..

قوم اعتلي و علي صوتك و أدن ..
نبوتك واضحة و مفهاش شك ابدا ..
و إحنا نؤمن بيك .. إحنا نؤمن جدا ..
و انا ف المؤمنين ..كنت أول غلام ..
يا رنة الانغام.. يا صاحب الإلهام..
مدد يا امام .. مدد يا إمام ..

الكلب يرقص .. و القلب بيتألم ..
من غير ما تتحدث.. سيرتك بتتكلم ..
اتعلمت ياما .. و لسه بتعلم ..
و انت المعلم .. و انا لسه ناقص علام ..
يا رنة الانغام.. يا صاحب الإلهام..
مدد يا امام .. مدد يا امام ..

البرد في الأجواء .. سرح و سارح فيك ..
يا رمال على الصحراء .. شعلة ما بتدفيك ..
يا والد الشعراء  .. أنا قولى لا يوفيك ..
و لا يكفيك لو قلت فيك 100 عام ..
يا رنة الانغام.. يا صاحب الإلهام..
مدد يا امام .. مدد يا امام ..

يا دنيا لو تعرفي  ..
تختاري او تصطفي ..
هتجيلي تتأسفي ..
انا الصديق الوفي ..
انا المخيف الخفي ..
قلبي عفن ؟ ..
لأ عفي ..
جسمي اندفن ؟ ..
لأ .. خفي ..
انا ..
حزن الفراق ف المعاد ..
حضن لحظة وداد ..
ابن ..
فؤاد حداد ..
فما اجملي ..و اشرفي ..
شاعر ابن شاعر صفي..
فنان ذو مزاج فلسفي ..
ملهوش مكان ..
منتفي ..
قال الزمان : إاسفي ..
يا دنيا لا تعرفي ..
تختاري او تصطفي ..
شاعر بينطق آه ..
و يهز الأعداد ..
قول يا نبي الله ..
قول يا فؤاد حداد ..

روحك معاهم مش معانا ..
بتجمل الملكوت ..
صوتك بيجري ف غنانا ..
بيكمل وضوح الصوت ..
زادت ايام المهانة  ..
على العجب و الموت ..

يا مسحراتي ..يا أول من صحا مصر على دفه ..
يا إمام مصلى وراه .. الشعرا بيلتفوا ..
يا والد الشعراء .. كما وصف نفسه ..
يا نبي الله .. هذا الغلام وصفه..
أمي القصيدة بعد المخاض ..
قالت عني اني شبهك ..
و فيا من جينك ..
يا ابويا يا فؤاد حداد ..
باعت قصيدتي لحد سابع سما تروح و تندهلك ..
و تبوس على جبينك