زينب: ........... مريم مريم نوضي اصاحبتي راه 5 ديال العشية هادي
مريم: 5 دقايق ونوض
زينب: وا فيقي ولا غنخوي عليك الماء
مريم: الصباح هدا مالك على هاد النكير
زينب: يلاه وا غير نوضي
مريم ناضت وتقادات فبلاصتها وشعلات سيجارة وزينب مشات جابت ليها كأس القهوة وريحات حداها...
زينب: شوفي أنا راه غنمشي لحمام دابا بغيتي تمشي نوضي تهزي مابغيتيش راه ماغنبقاش بوسخي على قبلك
مريم: ناري خلي حتى لغدا ونمشيو عيانة دابا ندوشوا غير فالدار كيف العادة
زينب: أنا راه ماغنبقاش تبعاك كل نهار ليوم غدا ليوم غدا أنا غنمشي دبا بغيتي تمشي مرحبا مابغيتيش عاودي لراسك (زينب ناضت كتجمع فحوايج الحمام)
مريم: صافي هأنا غنوض وماكاينش فقلبك الرحمة ولا الشفقة كانقول ليك عيانا ونتي ماعلابالكش...
زينب: راك ما غتهزي ما غتحطي راه الكسالة كدير كلشي
مريم: صافي سكتينا.... جمعتي الدوزان ديال الحمام (الخرقة والصابون والشامبوان الخ...)
زينب: اه كلشي مجموع خاصك غير دردبي قدامي
لبسو البنات جلالبهم ومشاو الحمام ... إوا على مايخرجوا من الحمام نعاود ليكم قصتهم
زينب 24 عام زوينة وبيضة ولاطاي حوتة العوينات عسلييين والشعر أكاجو...
مريم: 24 عام فسرة وبيضة ولاطاي عامرة شوية ما قصيرة ما طويلة العوينات بلاما ندويو عليهم الشعر كحل كيلمع...
زينب ومريم كانو عايشين فالعروبية وتما عندهم البنت كتوصل لسادس ماكتبقاش تقرى كيحبسوها حتى يجي لي يتزوج بيها مريم وزينب كانو صحابات من الصغر ما كيتفارقوش أي حاجة كيديروها بجوج ملي وصلو ل 17 عام زينب جا خطبها واحد الرجل قد جدها وهي مابغاتش وعيات ترغب فباها و والوا قال ليها غتزوجي يعني غتزوجي مشات عند صاحبتها شكات عليها وهي تقول ليها مريم أش بان ليك نهربو... يتبع
