اتونست معاهو زي ربع ساعه كده وبعدين قلت ليهو اوع تكون زعلت من كلام احمد قبيل! قال لي لالا ياخ مازعلت انا اساسا عملت الحركه دي مخصوص ..قلت ليهو حركه شنو؟ ومخصوص كيف يعني! قال لي لمن فتحت ليكم القران من متين انا بفتح ليكم قران! عارفكم كفرة مابتسمعو ومافاضيين من الاغاني..قلت ليهو اي والله انا زاتي استغربت فيك هههه..المهم طيب فهمك شنو يعني لي عملت كده؟ قال لي بي صراحه كده انا لاحظت لي احمد الايامات دي ماقاعد يصلي ومامنتظم في الصلاة..قلت ليهو عليك الله!! مالاحظت انا والله..المهم قال لي انا اتكلمت معاهو في موضوع الصلاة بس ماجاب فايدة وصراحه حسيت بيهو اتغير ما احمد الزمان الزول ده مابراهو..قلت ليهو كيف يعني مابراهو؟! قال لي انا حاسي الزول ده فيهو مس من الجن ..قبيل فتحت ليكم سورة البقرة مخصوص عشان اشوف احمد حيعمل شنو لانو سمعت الزول لو فيهو جن او اي مرض روحي سحر عين حسد عمل بتضايق من قراية القران وبخاف ومابحب يسمعو وبذات سورة البقرة..قلت ليهو والله حيرتني عديل يازول لكن اسي الحل شنو يعني؟ قال لي انا لسه ما اتاكدت من الحاجه دي وبعدين مابي يدي حاجه الا اهلو يكتشفو الحاجه دي ويحالو يعالجوهو ..قلت ليهو طيب ارح نكلم اهلو..قال لي لالا انت عبيط!! نحنا لسه ما اتاكدنا من الموضوع ده مادايرين نخوف الناس ساي لمن نعرف نتصرف غايتو انا بفكر ان شاء الله..وعلى كده نهينا المكالمه..ومرت الايام والاسابيع واسماعيل ماجاب لي سيرة للموضوع تاني يمكن نساهو ولا ماشغال بيهو كتير ولا يمكن اكتشف فرضياتو غلط!!
الاجازة خلاص قربت تخلص فاضل فيها شهر بس واحمد ماشاء الله ماخلى كورس مادخلو..ونحنا نازلين تالته سااي ماناقشين حاجه..في الشهر الفضل ده اهل احمد قررو يعملو عرس نسرين فيهو عشان المدارس ماتفتح واحمد ينزل قالو ماعايزين يشوشرو عليهو غايتو زي ماسمعت كده..وفعلا بعد اسبوع احمد جانا في البيت وعزمني وعزم ناس بيتنا للعرس ...يوم العرس جا ومشينا كان في صاله في بحري كان عرس رهييب شديد ماشاء الله شكلو العريس مريش..وانا من وصلت الصاله ماقابلت احمد فتشت عليهو بس الزحمه مبالغه..فجأة كده اسمع ليك صوت صرخه قوية حتى الموسيقى وقفت وعاينت في اتجاه الكواريك دي لقيت ناس كتار متلمين في واحد بس ماقادر اشوفو..سمعت ولدين جنبي بتكلمو قالو ده اخو العروس انا لمن سمعت الكلام ده اتخلعت شديد وجريت سريع محل الناس واقفين وشفتهم برفعو فيهو وكان متضايق شديد ونفسو قايم ووشو ده اصفر عديل ...شالوهو سريع دخلوهو عربية شكلهم ماشين اقرب مستشفى حاولت امشي معاهم بس مالقيت طريقه ...وصالة الافراح اتقلبت صالة احزان كل النساوين بكوركو ويسكلو ...واختو العروس دي عملت جنس عمايل لمن مرقوها من الصاله..انا ركبت امجاد سريع وركبت اهلي وصلتهم البيت واتصلت على خالد لانو كان لحق ركب مع ناس احمد سئلتو انتو في ياتو مستشفى؟ وصف لي واتحركت عليهم اول من وصلت هناك لقيت ابوهو جنب الباب ومتكل في الحيطه ماقادر يقيف جيت سندتو وقعدتو في الكرسي وقلت ليهو في شنو ياحاج احمد كيف؟ وين احمد؟ شفت صحبي خالد جاي من بعيد وبأشر لي شفت ملامح وشو كانت عادية الحمد لله يعني شكلو احمد كويس قلت لي ابوهو دقايق ياحاج اسي بجيك المسكين من الخلعه ماقادر يتكلم عديل مشيت سريع لي خالد وسئلتو احمد وين؟ وكيف؟ حصل ليهو شنو؟ قال لي كدي قول بسم الله احمد كويس الحمد لله بس قالو عندو انخفاض قلت ليهو انخفاض بعمل كده؟قال لي الله اعلم لكن الدكاترة قالو الزول ده كويس يعني ماف حاجه خطيرة الحمد لله..وفعلا شفت لي دكتور كده ماشي على ابو احمد مشيت وراهو سريع اسمعو بقول في شنو لقيتو قال ليهو احمد ولدك كويس ياحاج بس عندو هبوط كده..وقال لينا ممكن تدخلو تتطمنو عليهو بس ماتتكلمو معاهو لانو مرهق شديد..دخلنا جوة الغرفه لقيناهو مركبين ليهو درب..درب لي ماعارف! يس والله كان تعبان شديد ماقادر يتكلم..مرقت انا ومشيت للدكتور قلت ليهو عن اذنك يعني انا ماقادر افهم الزول ده تعبان شديد ونفسو قايم معقولة ده كلو هبوط ساي؟ ولا في حاجه انتو داسنها علينا؟قال لي كيف ندس عليكم كمان المرض بدسوهو؟..قال لي عارف في حاجه غريبة لانو النتيجه بتاعه الفحص طلعت نضيفه بس الزول ده شكلو مرضان..قلت ليهو الحل شنو؟ قال لي الحل بس يمشي البيت يرتاح ولو حصلت حاجه تاني جيبوهو راجع..وفعلا رجعنا بيهو البيت بعد الدرب انتهى لقينا العريس والعروس قااعدين والناس دي كلها قاعدة هناك.عاينت لي اختو نسرين المسكينه وشها احمر من كترت البكا..وقاعدة بالفستان الابيض مسكينه يوم فرحها اتخرب وبقى يوم حزين..احمد قدر يتكلم بعد تعب وكل القالو يانسرين اعفي لي خربت ليك احلى يوم في حياتك ..نسرين قعدت تبكي وقالت ليهو انت عبيط ياولد؟ اعفي ليك كيف يعني والله ده كلو ماهاميني كويس اني شفتك وانك بخير ..واصرت انها تبيت الليلة في البيت عشان تتطمن على اخوها الصغير بس ابوها رفض وقال ليها ارجعي مع راجلك احمد كويس..الناس دي كلها ملمومه هناك..عاينت كده شفت ليك المرة الاسمها انتصار ديك واقفه جنب الباب وبتتبسم حسيت بيها فرحانه عديل كده!! مرة خالو دي اصلو مامن وراها خير! طوالي اتذكرت يوم كانت في غرفه احمد وفاتحه دولابو بتفتش فيهو..قامت طلعت من الغرفه ماعارفها مشت وين..ربع ساعه كده جات راجعه وشايلة كباية عصير ومدتها لي احمد قالت ليهو اشرب العصير ده ياولدي بتكون عطشان احمد شالو منها وعايز يشربو..انا ماحسيت بي نفسي الا وانا وقفت على حيلي وخبت ليك الكبايه من يد احمد العصير اتكشح والكبايه اتكسرت ..كل الناس بقت تعاين فيني ومستغربين ..انا زاتي مستغرب من روحي ده شنو العملتو ده..حسيت بي احراج شديد في اللحظه دي ..انتصار قالت لي ياولد ده شنو انت مجنون؟ ده شنو العملتو ده انت ولد قليل ادب ولا شنو؟ طوالي ام احمد اتدخلت سريع وقالت ليها انكسر الشر يا انتصار والعصير مامن رزقو وكتر خيرك حبيبة ومسكتني من يدي طلعتني من الغرفه..قالت لي اوع تكون زعلت من كلمه قليل ادب دي؟ امسحها لي في وشي ياولدي..قلت ليها لالا ياخاله انا زاتي اتصرفت غلط بس والله معليش يعني عارف انتصار دي زوجة اخوك بس انا مامتطمن ليها..ام احمد اخدت ليها ضحكه طويلة كده وقالت لي ياولدي ده كلام شنو البتقول فيهو ده انتصار دي زولة طيبة شديد وبتحب احمد زي ولدها سامي لايمكن تفكر تأذيهو ..قلت ليها خير ياخاله ومتأسف شديد من الحصل..وطلعت مشيت بيتنا طوالي ماقدرت ارجع الغرفه بعد الحركه الشينه العملتها دي ..اسي الناس يقولو علي شنو؟!..غايتو انا زاتي مابعرف اتصرف وبعد كم يوم كده...
احمد بقى كويس الحمد لله بس انا مامشيت ليهو في البيت خجلان من روحي ومن الحركه العبيطه العملتها ديك...بس كنت متواصل معاهو بالتلفون حتى هو حسى بي متحرج عشان كده ماسئلني ليه عملت كده!! ...المهم بعد اسبوع نزلنا المدرسة انا وخالد شلنا ادبي عسكرية واحمد شال احياء طبعا واسماعيل شال هندسية وبقينا ناس جادين ناس قراية بس ونسبة لانو تخصصاتنا مختلفه ماكنا بنتقابل كتير اغلب الوقت بكون مع خالد..مرت الشهور وامتحنا التجريبي انا جبت 78% وزعلت من روحي شديد وقلت في الشهادة لازم اجيب احسن من كده ان شاء الله عشان كده اجتهدت شدييد في اخر شهرين ديل..والشهرين ديل مرو والامتحان الكبير على الابواب ..وامتحنا الحمد لله اشتغلت حلو..والاجازة جات وماكان عندي موضوع جاني اسماعيل قال لي استفيد من اجازتك دي واكسب حسنات ارح ننزل مركز الزهراء نحفظ فيهو سورة البقرة اجازة تالته دي طويله ومسيخه ..رحبت بالفكرة وعجبتني شديد وكلمنا خالد برضو قال الفكرة حلوة بس احمد كان رأيو مختلف قال انو مافاضي وعايز ينزل كورس انجليزي مخاطبه وكورس حاسوب..عشان كده انا وخالد واسماعيل نزلنا المركز برانا وفي ظرف شهرين كده كملنا سورة البقرة والفضل يعود لله طبعا ومن بعدو لي اسماعيل والله كنت فرحان شديد وحاسي اني عملت انجاز عظيم بجد القرب من الله وحفظ القران ده احسااس مباالغه ومن الوقت داك قررت اني ما اقيف من الحفظ واستمريت في المركز الحمد لله..مرت الشهور والنتيجه ظهرت انا احرزت معدل 87.8% والحمد لله..واسماعيل 89.7% وخالد 63.1% واحمد النابغه كان من ضمن الميه الاوائل احرز معدل 96.9% والله كلنا فرحنا ليهو شديد وبعد كم اسبوع كده التقديم فتح..وانا قدمت شالوني محاسبه جامعه الخرطوم ودي كانت رغبتي اساسا.واسماعيل شالوهو مدنيه جامعه السودان..وخالد نسبتو مابتدخلو الا تربية ودي مارغبتو عشان كده قال حايعيد السنه الجاية..واحمد زي ماوعدو عمو عمل ليهو المنحه الدراسية في الولايات المتحده في كلافورنيا بالتحديد جامعه اسمها لوسنفارز ..احمد رحمه الله عليه كان مبسووط شدييد بالمنحه دي ومرت الشهور ونحنا نزلنا الجامعات..واحمد لسه ماكان سافر..بعد شهرين كده من نزولنا عمو رسل ليهو عشان يمشي امريكا خلاص وقال انو الاجراءات انتهت واي حاجه ظبطت في غضون اسبوعين احمد جهز حالو وحددو موعد السفر كان يوم الاتنين..مشينا ليهو مع الشلة عزمناهو في مطعم احساس وداع وكده..ومشينا معاهو المطار وكانت لحظات صعبة علينا وعليهو كمان..تاني ماحانشوفو الا بعد خمسه سنين زي ماقال لينا هو..ودعناهو وودع اهلو وركب الطيارة..ورجعنا بيوتنا بالصباح اتصل علينا وطمنا انو وصل بالسلامه وكده..ومرت الايام والايام بقت اسابيع والاسابيع بقت شهور والشهور بقت سنين..مرت تلاته سنين وكل واحد فينا في حالو وفي جامعتو حتى تواصلنا بقى قليل مازي زمان عارفين مشاغل الدنيا انتو..بس في يوم اتصل علي اسماعيل وقال لي خبر غريب جدا..
يتبع....
