قال لي سمعت انو احمد وقفوهو من الجامعه مدة اسبوع لانو عيان وقالو بقى يكورك ويتكلم براهو بقت تجيهو هلوسات كده..ادهو حبوب بتاعه اعصاب تقريبا ونسبة لي ظروفو دي وقف من الجامعه اسبوع..قلت ليهو واها حاصل عليهو شنو اسي انا اول مرة اسمع الكلام ده منك كدي بعدين بتصل عليهو ..اسماعيل قال لي والله ماعارف حاصل عليهو شنو اسي اخباري منو انقطعت وكل ما اتصل عليهو مابرد والله اعلم يرد عليك لكن جرب غايتو..وفعلا بالمسا شحنت لي رصيد بي 20 جنيه ان شاء الله اتكلم معاهو خمسه دقايق بس يارب يرد ...اتصلت وجاني جرس بس ماف رفع حاولت كم مرة في جرس بس بقطع بعد مسافه يعني احمد ماعايز يرد علي قلت اسي يمكن يكون مشغول..مرقت مع اصحابي نتعشا بره..جاني اتصال بس ماعاينت في تلفوني قلت اشوفو لمن ارجع البيت ..بعد رجعت لقيتو رقم غريب بس ماسوداني..شفت المفتاح لقيتو مفتاح الولايات المتحدة عرفت انو ده احمد طوالي رجعت في نفس الرقم بس برضو في جرس لكن مابرد حاولت زي 3 مرات كده زهجت تاني ختيت التلفون في الشاحن ونمت...
قمت مخلوع على نغمه تلفوني عاينت لقيت الساعه3 صباحا قلت ياسااتر ده منو البضرب اسي ده ..شلت التلفون سريع لقيتو نفس الرقم حق قبيل رديت عليهو ومن صوتو عرفتو احمد..قال لي يوسف!! قلت ليهو اي ياهو زااتو معاي منو احمد؟ سكت مسااافه ومارد علي قلت ليهو احمد كيفك؟ مالك ساكت كده؟ ياود ماتتكلم!! ولسه ماعايز يرد علي..قلت ليهو انت وقت ماعايز تتكلم متصل لي مصحيني نص الليل ده!! قال لي يوسف وسكت تاااني صراحه سكوتو ده بقى يخوفني قلت ليهو نعم! قال لي العقرب بتتكلم؟! قلت ليهو العقرب بتتكلم كيف يعني؟؟ كورك فيني بي صوت نهرة كده قال لي انا سئلتك العقرب بتتكلم!! قلت ليهو احمد لا طبعا كيف الكلام ده عقرب شنو البتتكلم ياولد؟قول بسم الله!! ..قال لي عقرب في يدي لونا اسود بتتكلم معاي يايوسف واسي دي انا شايفها وبتتكلم معاي ..واخد ليهو ضحكه طويلة كده ههههههه وبقى يتمتم بي كلام انا ماسمعتو كويس وبعد كل كلمتين يضحك براهو انا لامن خفت منو والله الزول ده شكلو جنى عديل..قال لي شنو يايوسف مالك مابترد علي؟ قلت ليهو احمد انت مالك حاسي بي شنو؟ قال لي احمد ده منو؟ انا ما احمد وقعد يضحك كمان وقفل الخط في وشي ..صراحه انا مافكرت ارجع ليهو نهااائي ماعارف كنت خايف منو كده لي..وبقيت اقنع نفسي انو ده ما احمد وده واحد عايز يتعاور معاي..بس انا شفت المفتاح حق امريكا وحتى الصوت نفس صوت احمد..قلت الحل الوحيد النمبر نشطت لي ساعه سريعه وكتبت الرقم في النمبر بوك جاني الاسم مودي بالانجليزي..اتاكدت ده احمد لانو كان بلقب روحو كده..وبس انا الليل كلو مانمت لمن الصباح جا ماصدقت شلت تلفوني طوالي اتصلت على اسماعيل..اسماعيل لامن اتخلع لانو الساعه كانت 6 صباحا ..حكيت ليهو الحصل كلو وقلت ليهو نحنا لازم نكلم اهلو عشان يشوفو ليهو طريقه علاج..اسماعيل قال لي اهلو عارفيين الحاصل معاهو وقالو عمو هناك في امريكا وداهو لي دكتور وقال عندو مشكلة في الاعصاب عشان كده بتكلم بره راسو وادهو حبوب كده..قلت ليهو والله ده اصلو ماشغل اعصاب ده شغل جن عديل قال لي انا زاتي قلت كده بس البصدقنا منو؟ اهلو مامقتنعين بالكلام ده واكتفو بالحبوب والادوية دي وقالو هلوسة وبتروح..قلت ليهو مسكين احمد ربنا يكون في عونو...قال لي بس ده نحنا المطلوب مننا مانقيف من الدعاء ليهو ابداا..قلت ليهو ان شاء الله وربنا كريم عليهو.. وقفلت التلفون ومشيت الجامعه عادي ومرت الايام واصلا مافكرت اني اتصل على احمد تاني كل ما اتذكر اخر مكالمه ليهو وصوتو وطريقه كلامو وضحكتو ديك بتجيني خوفه كده غايتو اكتشفت اني زول جبان😂..بعد اسبوع كده من الحادثه ديك خالد اتصل علي و قال لي انا بعدين جاييك في البيت ..قلت ليهو تشرف ..وفي المساء وصلني و اتصلت على اسماعيل قلت ليهو تعال لينا و اسماعيل اتحرك علينا ووصلنا قعدنا التلاته في الصالون وقعدنا نتونس..واتذكرنا ايام زمان كان كتير مانقعد قعدة زي دي يحليل ايام زمان..خالد قال والله القعدة دي بس ناقصه احمد وكلنا اتأثرنا لمن اتذكرناهو واتمنينا انو يكون معانا في اللحظه دي يكون وسطتنا صحي هو زول قراية بس لكن روحو مرحه شديد كان بحب الهظار والضحك كان بدي الونسه طعم حلو افتقدناهو والله ..اسماعيل قال لينا في واحد فيكم عندو اخبار منو .خالد قال انا سمعت انو حالتو سائت اكتر وبقى مابتكلم عديل بس مرات مرات بقعد يضحك براهو وبتكلم مع نفسو...قلت ليهم ياجماعه رايكم شنو بكرة نسجل زيارة لي اهل احمد نتطمن عليهم ونفقدهم..اسماعيل قال لي فكرة حلوه والله على الاقل مايفتكرو نسيناهم وبالمرة نعرف اخبار احمد وخالد برضو وافق على الفكرة..وتاني يوم العصر اتقابلنا في المحطه زي ما اتفقنا واتجهنا على بيت احمد رحمه الله عليه..اول من وصلنا فتحت لينا اختو نسرين شكلو الايامات دي قاعدة مع امها..دخلنا البيت وكان صااني لاحس لا صوت تحس بي كميه من البؤس كده في البيت ده كان احساس غريب غايتو..لقينا امو قاعدة في عنقريب كده في عريشه جنب الصالون..لمن شافتنا فرحه شديد بس صراحه ماقدرت تمحي ملامح الهم والحزن الفي وشها..قعدنا اتونسنا معاها ونسرين قامت عملت لينا جبنه وطيل الونسه اصلو ماجابو لينا سيرة لي ولدهم الحاجه دي خلتني اقلق طوالي داهمتهم بالسؤال وقلت ليهم احمد كيف مع الغربة هناك!! اسماعيل حمر لي نظام لي جبت سيرتو بس ما اشتغلت بيهو كتير لاني كنت عايز اعرف الحاصل عليهو شنو..لاحظت لي نسرين وشها اتغير تماما وحسيت بيها عايزة تبكي بس حابسه الدموع..وامو دي صرت وشها كده لمن استغربت فيها وقاالت لي احمد كوويس الحمد لله وبسلم عليكم وقال مشتاق ليكم كلكم والله كل مرة بسئلني منكم حسيت بيها كضابه وبتألف في الكلام ده اسي من راسا..وقالت لينا كمان احمد جاي قريب السودان عشان يسلم علينا ..هنا كلنا اتصدمنا لمن سمعنا الخبر ده طوالي خالد قال ليها بس ياخاله الجامعه لسه ما انتهت حايجي كيف!! دنقرت راسا كده وكانت بتعاين في الارض حسيت بيها بتفتش في كلام تحاول تتخارج بيهو بس رفعت راسا وقالت لينا عمو قدر يعمل ليهو اجازة طبعا هو استاذ كبير هناك .وقامت على حيلا قالت لينا بستئذنكم يا اولادي عندي صداع وطلعت من العريشه..حسيت بيها بتتهرب من الكلام معانا ولي لحظه حسيت اننا ناس دمنا تقيل خالص..بس انا اصريت اني لازم اعرف الحاصل شنو بس امهم دي ماعايزة تتكلم ..اسماعيل قال لينا يلا ياجماعه بعد ده نتحرك..نسرين حلفتنا نقعد حبه بس نحنا قلنا ليها بنجيكم مرة تانيه ان شاء الله...ولمن جينا مارقين افتكرت امهم تجي تودعنا بس ولا عبرتنا حتى..اول من وصلنا الباب قبلت على نسرين واتعمدت اقول كده قلت ليها سلمي على احمد وان شاء الله يجي بالسلامه طبعا كان اتصل علي قبل كم يوم كده بس مافهمت منو حاجه شكلو الشبكه كعبه...كان زي البضحك كده او الصوت بقطع ماعارف غايتو بكون من الشبكه لقيتا بتعاين لي ومخلوعه كده فهمتني من كلامي اني عارف احمد ماطبيعي وفي شي حاصل ليهو..قالت لي ان شاء الله لو اتصل علي قريب ببلغو سلامك حسيت اني ممكن اقدر اطلع معلومات من نسرين دي مازي امو البتداري في الكلام ودعناها ومرقنا...
ونحنا في سكة الرجعه قلت ليهم ياجماعه انتو ماملاحظين انو ام احمد دي بتحاول تتهرب من الكلام ..اسماعيل قال انا زاتي حسيت بي كده بس غريبة هم لي دايرين يدسو مرض احمد؟! قلت ليهم طيب انتو عرفتو من وين ؟ كيف عرفتو انو احمد عيان وكده؟ قال لي انا عرفت كده من سامي ولد خالو متواصل معاهو في الفيس وكلمني..خالد قال لينا ياجماعه مدام الناس ديل مادايرين يورونا الحقيقه ماف داعي نتدخل في خصوصياتهم..قلت ليهو كيف ولي؟ احمد ده صاحبنا وزي اخونا لازم نعرف الحاصل عليهو شنو قالو لي من وين ؟ قلت ليهم انا عندي طرقي الخاااصه ..ونزلنا من الحافلة كان في بقالة في طرف الشارع مشيت اشتريت شكولاتة جلكسي قالو لي ده شنو ده؟ دي لي منو؟ قلت ليهم دي اول خطوة عشان نصل لي احمد ..استغربو شديد وقالو لي كيف؟ قلت ليهم دقايق بشرح ليكم بعد اعمل الفي راسي..ودعتهم ودخلت بيتنا اول من دخلت مشيت طوالي على غرفه اختي الصغيرة اسمها امنيه في سنه تانية ثانوي واخر العنقود..مشيت دخلت ليها وجدعت الجلكسي قداما قلت ليها شيليها ..قالت لي يوسف!! انت مالك! حاسي بي شنو؟ عيان؟ عندك حمى؟ عايز تموت؟! ..قلت ليها ماتكتري كلامك اسي بشيلا منك..طوالي شالتا سريع واكلتا ..بعد اكلتا قلت ليها انتي بتاكلي ساي؟! ويييين المقاابل؟! قعدت تضحك وقالت لي انا كنت شااكه اصلا انت مابتجيب حاجه مجاني اها عايز شنو؟! قلت ليها عايز رقم..قاطعتني سريع وقالت لي هوووي انا مابوزع ارقام صحباتي لي اولاد..قلت ليها انتي عبيطه؟ صحباتك العاملين زي الزومبي ديل داير بيهم شنو كمان..يابت انتي ماشفتي المزز الفي جامعتنا فاضي انا لي شفعك ديل..قالت لي اهاا يا اخوي عايز رقم منو؟ قلت ليها رقم نسرين فؤاد اخت احمد اكيد عندك رقمها عارفك بتريديها شديد..المهم انا عايز رقمها ..قالت لي اجي المرة المتزوجه عايز بيها شنو كمان سجمي!! قلت ليها مابخصك ياخ جيبي الرقم ..قالت لي خليت بنات الجامعه قبلت على اخت صحبك المتزوجه دي..قلت ليها امنيه انتي حاتتكلمي كتير يعني؟ ..قالت لي خلاص خلاص ياخ بس الشمار حرقني عايزها لي؟ قلت ليها موضوع شغل..قالت لي اهاا كان كدي هاك ليهو..ملتني الرقم لمن جيت طالع كوركت لي يوسف يوسف مدام بقينا نتبادل ارقام وبتاع اديني رقم صحبك خالد..قلت ليها خالد منو بس اوع يكون صحبي ده؟ قالت لي اي مالو..قلت ليها اها مكسرك يعني؟! عشااان كده لمن يجينا تجري جري تجيبي ليهو العصير والحاجات ..قالت لي اي مكسرني ..قلت ليها يكسر ركبيك تاني كان اشوفك جبتي العصير..قعدت تضحك ..وطلعت منها الشافعه العويرة دي قال صحبي خالد قال..وانا من زمان حاسي بيها لمن تسمع خالد قاعد في الصالون البسمه دي من الاضان للاضان وتقوم جري تجيب ليهو العصير هههه ياشافعه الله يعقلك..
مرقت شربت لي كبايه شاي وشلت تلفوني اتصلت على نسرين قلت ليها معاك يوسف معليش الوقت متأخر بس انا عايز اقول ليك حاجه..انا عارف الحاصل لي احمد شنو ولمن قلت ليك احمد اتصل علي كان قال لي كلام غريب جدا ..بس انا ممكن اعرف انتو ليه داسين الكلام ده ليه ماعايزننا نعرف؟! على فكرة كلنا قلقانين على احمد ده لانو اخونا كمان..سكتت مسافه وقالت لي انا كنت حاسه انك عارف الموضوع..خلاص لو بتقدر بكرة تمر علي في المكتب احسن من التلفون عشان افهمك الحاصل..قلت ليها خير يازولة وفي الصباح...
يتبع.....
