اسماعيل قال ليهو انت بتتكلم مع منو يا احمد؟ قال ليهو مع اللعينه دي واشر جنب الكرسي المشكلة ماف حاجه..انا خفت شديد وبقيت اقلب عيوني في المكان البأشر عليهو احمد بس ماشايف حاجه...خالد قال ليهو احمد ماف حاجه هنا انت شايف شنو؟! قال لينا كديسة سودا ولسه بكورك اطلعي اطلعي والله اقتلك وبحاول يقوم من السرير نحنا ماسكنو وبقينا نقول ليهو احمد ماف كديسة قول بسم الله اتعوذ من الشيطان..اسماعيل فتح تلفونو سريع وشغل سورة البقرة ..احمد ده بقى يفرفر شديد ويكورك ياخ انا خفت خوف وبقيت اقول ليهو اقفلو ياخ اقفلو ..اسماعيل قال لي لالا دقايق بس احمد بقى يقول في كلام كده اصلو مامفهوم وبحاول يقوم من السرير بس نحنا ماسكنو شديد امو جات داخله في اللحظه دي شكلها كانت عند الجيران ولمن سمعت الكواريك جات..اسماعيل وقف القران امو قالت لينا مالو احمد مالو؟! قمنا حكينا ليها الحاصل واتخلعت شديد قالت ماتكلمو زول قلت في سري بالله ده كل همها انو الناس ماتعرف!! قالت لينا خلوهو يرتاح شوية يعني بالوااضح كده اطلعو من غير مطرودين 😂..طلعنا طوالي من البيت وطول الطريق نحنا بنتكلم عن صاحبنا وانو لاازم نساعدو وكده ..اسماعيل قال لينا نحنا لازم نتكلم مع امو دي عشان تقتنع ..قلت ليهو اي لازم وقررنا انو نرجع ليهم بعد تلاته ايام..وفعلا مشينا ليهم بعد اتاكدنا انو احمد بره البيت عشان مايسمع الكلام...قعدنا وضيفونا وكانت امو قاعدة وابوهو ونسرين كمان لاني اتصلت عليها وقلت ليها تعالي...اسماعيل بدا الموضوع وقال ياجماعه زي ما انتو شايفين حالة احمد دي بقت تدهور ياجماعه السكوت ده مامن صالحو..الزول ده لازم يتعالج بالقران..شكلو فيهو سحر ولا حسد مامعروف لازم تودوهو لي شيخ يقرا ليهو عشان يتحسن..طوالي امو نطت وقالت ده كلام فارغ سااي احمد كويس والدكتور الفي امريكا قال عندو مشكلة في الاعصاب وبتروح ..اسماعيل قال ليها ياخالتي ده دكتور مامسلم واكيد هو مابعرف السحر والحسد والحاجات دي عشان كده من الطبيعي يقول مشكلة في الاعصاب..وبعدين ..قاطعتني سريع وقالت لي احمد ماحايمشي لي اي شيخ..كمان دايرني اودي ولدي لي شيخ عشان الناس تقول عليهو مجنون؟! داير الناس تقول ولدي مجنون وانا بعالج فيهو عند شيخ!! ..قلت ليها انتي ده همك كلو ياخاله؟! كلام الناس!!..يعني مابتهمك صحه ولدك؟! وبعدين شنو يعني مايقولو الدايرين يقولوهو المهم احمد يرجع كويس .امو قالت خلاص كويس انا بفتح ليهو قران..اسماعيل قال ليها ياخاله كده مابنفع لازم تودوهو لي شيخ عشان هم بعرفو الحالات دي وبعرفو يتعاملو معاها يعني..قالت لينا انا مابوديهو لي شيخ واحمد كويس ...زاتو ماحيرضى يمشي..وده اخر كلام عندي اقولو ليكم ولو سمحتو تاني ماتفتحو الموضوع ده وخليكم في حالكم..نحنا كمان ماناقصين فضايح..نسرين قالت ليها براحه يا امي ماكده لكن!!! طوالي نحنا قمنا من القعدة دي لانو شفنا الحاجه سخنت😂..وابوهوم زاتو بقى صاري لينا وشو كده..طعلنا طوالي من البيت وخالد قال لينا دي اغبى حاجه عملناها..اسي تاني أهلو حايكرهونا شفوتوهم بعاينو لينا كيف..اسماعيل قال نحنا ماعندنا شغلة فيهم دايرين نساعد احمد صاحبنا بس عشان حالتو ماتسوء اكتر من كده..قلت ليهم هم لي بدسو في موضوع احمد!!ولي خجلانين كده؟! من متين المرض بخجل؟! ويعني شنو كلام الناس!! ومايقولو احمد مجنون ولا احمد جنى!! ده مهم اسي ..مامهم انو يتعالج مش؟! المهم الناس ماتتكلم سبحان الله!! اسماعيل قال لي في ناس كتار مابحبو يودو اولادهم لي شيوخ في ناس بقولو انو الشيوخ دجالين وهم اساسا مابيؤمنو بالسحر والعين والحاجات الزي دي وفي ناس بخافو من الكلام زي انو يقولو ولدهم مجنون وبتكلم براهو وودهو لي شيوخ وكده عشان كده بدسو..قلت ليهو والله ده اكبر غلط الناس تدس المرض عشان كلام الناس قال بس منو يفهم؟! ومشينا بيوتنا وكلنا حزنانين على صاحبنا احمد وحسينا انو حايضيع بي طريقة اهلو دي....
