في الليل ام احمد اتصلت علي وكنت فاكر انها عرفت الموضوع عشان كده اتصلت..كنت متردد اني ارد عليها ولا لا في الاخر رديت ..قالت لي يووسف تعال لينا سريع احمد يايوسف الحالة ديك جاتو تاني واسي لمن غمر وماف زول في البيت معاي لا نسرين لا ابوهو وكانت بتبكي شدييد يالله فهمت كلاما ...اجرت لي امجاد سريع وفي السكه اتصلت على اسماعيل وخالد قلت ليهم تعالو سرييع بيت احمد ولمن وصلت لقيت امو في الشارع شكلها منتظراني ..دخلت جوة سريع لقيت احمد واقع في الارض وجنبو جهاز mb3 صغير كده..حاولت ارفعو براي بس ماقدرت كوركت لي بتاع الامجاد جا رفعو معاي ركبناهو الامجاد وجري على المستشفى ..اول من وصلنا جو ساقوهو بالنقالة لانو كان غمران اساسا ومابتحرك..في اللحظه دي اسماعيل اتصل علي وقال لي انا وخالد في بيت احمد بس مافي زول في البيت!!! قلت ليهو اي نحنا جينا المستشفى تعالو لينا هنا..وبعد ربع ساعه كده وصلو...اسماعيل سئل ام احمد من الحصل شنو؟! قالت ليهو انتو بعد رجعتو منو كان كويس ..تاني شفتو شغل ليهو قران وبقى يسمع فيهو مشيت اعمل ليهو كباية شاي...جيت شايلاها ليهو لقيتو قاعد في الكرسي وبهز في راسو كده بي طريقه غريبة قلت ليهو احمد مالك ماجاوبني وكان مغمض عيونو..اسماعيل قال شكلو كان بسمع في رقية شرعية وبكون الجن استحضر..ام احمد قالت ليهو جن شنو كمان! قال ليها كملي كملي..قالت بس فجأة بقى يستفرغ شدييد انا لمن اتخلعت و مشيت اتصل على ابوهو مابرد علي ولا نسرين كمان ..قلت مامشكله اعمل ليهو عصير ليمون وخلاص بكون طمام ساي..عملت العصير وجيت لقيتو واقع في الارض مابتحرك طوالي اتصلت على يوسف ...خالد قال لينا غريبة لكن الزول لمن يستحضر بغمر؟! اسماعيل قال ليهو اي انا كان كتير بحضر جلسات مع صحبي الشيخ داك وبشوف الناس بغمرو اثناء الجلسه والقران شغال...امو قالت لينا انتو لسه مصرين على كلامكم ده ياخ انا ماقلت ليكم..قام اسماعيل قاطعا سريع وقال ليها ياخاله احمد ده مصاب بالسحر..سحر مشروب كمان ..نحنا الليلة وديناهو لي شيخ قرا ليهو..معليش ماكلمناكم لانو عارفين انكم ماحتوافقو لكن والله ياخاله كان لازم نعمل كده عشان احمد مايضيع..ياخاله احمد ده لازم يتعالج من السحر ده مافي فايدة من علاجات الدكاترة دي..ولازم يتعالج اسي عشان السحر مايتمكن فيهو اكتر من كده ..امو سكتت مسافه كده وماردت على اسماعيل ..شالت تلفونا واتصلت على نسرين وكلمتها...جانا الدكتور مارق قلنا ليهو اها خير مالو الزول ده عندو شنو؟! قال لينا عندو فقر دم ده الشي الخلاهو يغمر دمو ضعيف شديد...واضافه لي كده عندو مشاكل في المعدة بس الفحص لسه ماطلع..نحنا التلاته بقينا نعاين لي بعض بس وماعارفين نقول شنو ولا نعمل شنو...اسماعيل مرق بره ماعارفو ماشي وين..لكن نسرين جات وكان معاها زوجها حامد وامو ...قعدو مع ام احمد وانا وخالد قعدنا تحت في الاستقبال..جانا اسماعيل راجع قلت ليهو انت كنت وين؟! قال لي مرقت بره اتصلت على صحبي الشيخ داك..قلت ليهو احمد قبيل سمع رقيه شرعية براهو واغمي عليهو واسي نحنا جبناهو المستشفى الشيخ ده قعد يضحك قال لي مستشفى شنو انتو ماجادين..ده مرض روحي ماممكن يعالجوهو الدكاترة انا قلت ليكم جيبوهو لي عشان ارقي ليهو ..قلت ليهو امو مامقتنعه بالكلام ده وهي الجابتو هنا..قال لي هو زاتو احمد غلطان ماكان مفروض يسمع للرقيه الشرعية براهو ده اكبر غلط..لانو ممكن الزول يستحضر وهو براهو كده مابنفع لازم بكون معاهو زول عشان لو حصلت حاجه يعني..قلت ليهو ياشيخ بس احمد طلع عندو فقر دم ومشاكل في المعدة..قال لي اكيد دي حاجه طبيعية الزول المسحور بكون مرضان شديد والمرض ده نتيجه للسحر ولو ما اتعالج ممكن عادي يقتلو العمل ده..هنا خالد قال والله دي مشكله ياجمااعه مشكله كبيرة..اها نحنا نتصرف نعمل شنو امو دي ماعايزة تساعدنا لكن..انا قلت لي اسماعيل خلي صحبك ده يجي يتكلم معاها يمكن يقنعها..قال لي طيب بشوف....شفنا ابو احمد جاي من بعيد ..لمن وصلنا قال لينا احمد ويين؟! مالو احمد؟! اسماعيل قال ليهو احمد كويس يا حاج ارح شوفو براك بس عندو فقر دم..وطلعنا كلنا على غرفه احمد بعد تحانيس تقيلة بتاع الامن حمانا لكن حنسناهو شديد في الاخر قال لينا خمسه دقايق بس الزيارة دي قفلت من قبيييل..دخلنا ليهو جوة لقيناهو ناايم ..ام احمد قالت لي فؤاد انت وين انا من قبيل بتصل عليك قافل تلفونك ليه؟! قال ليها تلفوني قطع شحن وانا عربيتي اتعطلت في السكه عشان كده اتاخرت رجعت البيت لقيت ماف زول الجارة كلمتني بالحصل وجيت سريع عليكم..خالد قال لينا ياجماعه مدام احمد نايم ماف فايدة من قعدتنا دي زاتو بنزعجو ساي خلوهو يرتاح احسن..وناس نسرين طلعو ونحنا طلعنا معاهم وزوجها وصلنا بالعربية كتر خيرو..بس ام احمد نامت في المستشفى مع ولدها اصلو قالو كم يوم كده ويطلع بعد الفحص مايخلص..وتاني يوم بالصباح اسماعيل اتصل علي...
