يوم الجمعه مشيت عليهم ولمن وصلت لقيت اسماعيل وخالد هناك..وشوية ناس كده يعني ماكانو كتار..عملو لقيمات وبليله وشاي بي لبن وديناها لي جامع كده جنبهم فيهو خلوة..ورجعنا تاني قعدنا في البيت قلت لي اسماعيل ياخ تصدق انا ماسئلتك يوم العزا انت حصل ليك شنو نسيت عديل والله..قال لي انا كنت في شارع الظلط لمن خالد اتصل علي وكلمني اتخلعت شديد وكنت عايز اقطع كده جات عربية عفصتني باللستك بتاعا بس الحمد لله ماضربتني وياهو ودوني المستشفى طلع شق بسيط ولمن كنت بتتصل علي ابيت اكلمك عشان ماتتخلع ساي وياهو من هناك جيت عليكم طوالي...لمن المغرب اذن نسرين قالت لي عليك الله يايوسف اطلع فوق جيب لي شنطتي تلقاها في الكرسي .ماقادرة اطلع والله..قلت ليها سمح طبعا هي حامل وكده مابتقدر تطلع وتنزل كتير ..مشيت اجيبا ليها مريت بي غرفه احمد رحمه الله عليه سمعت صوت بكى كده استغربت وقلت ياربي ده منو ده ؟! عاينت بي خرم صغير كده كان في الباب اشوف ليك انتصار المابتغباني قااعدة في الارض وتبكي جنس بكى وسمعتها بتقول اعفي لي يا احمد اعفي لي والله ماكان قصدي كده والله ماكان قصدي اعفي لي...حاولت افتح الباب بس كان مقفول من جوة...وهي زاتا لمن حست بي حركه الباب قشقشت دموعا سريع وجات طالعه لمن شافتني عاينت لي من فوق لي تحت كده حاولت اسئلها لكن والله ماعارف اتبكمت كده لي ماعارف خفت اني اتكلم معاها يقوم يحصل لي نفس مصير احمد ..المرة دي مامضمونه اصلو...طوالي عملت روحي ماشغال بالموضوع كتير شلت الشنطه ونزلت عادي...واول من رجعت بيتنا شلت كتاب حصن المسلم واتعوذت...وبقيت كل مرة اقرا اذكار الصباح والمساء واتعوذ واقرا المحصنات ...ههههه خفت انتصار تعمل لي مصيبة زمان عشان عرفتني سمعتها وعارفاني شاكي فيها..مرت الايام عادي وماكان في اي جديد...امتحنت لي اخر سنه واتخرجت بي جيد جدا الحمد لله..وقعدت في البيت تلاته شهور وبعديها نزلت الخدمه الوطنية...وبعد خمسه شهور تقريبا خالد اتقدم رسمي لي اختي امنيه وعملنا خطوبة صغيرونه كده..وقالو العرس بعد امنيه تدخل الجامعه...واسماعيل ماشاء الله في الفترة دي حفظ القران كلو...بس انا من يوم احمد اتوفى وقفت الحفظ لكن ناوي ارجع تاني..في يوم من الايام كده وانا قاعدة في المكتب جاتني بت زميلتي في الخدمه قالت لي في واحد كده اسمو سامي قال عايزك..مرقت ليهو لقيتو سامي ود خاله احمد استغربت شديد وقلت ياربي ده الجابو شنو..سلمت عليهو وكده..قال لي معليش جيتك في زمن الشغل بس والله بعد تلتله حتى عرفت مكانك وين قلت ليهو لالا ياخ مامشكله..قال لي والله الوالدة دي قالت عايزاك في موضوع ...قلت ليهو منو؟! امك؟! قال لي اي...ممكن تجي الليلة لو فاضي..قلت ليهو وين في بيتكم؟! قال لي اي عليك الله والله الوالدة دي مصرة شديد انك تجي..ووصف لي البيت واداني رقمو وودعني..انا كنت متردد في الاول شديد بس كمان الشمار حارقني عايز اعرف عايزاني في شنو عشان كده قررت اني امشي عليهم...
بالعصر مشيت عليهم حسب الوصف القالو لي سامي والبيت كان ظاهر يعني لقيتو بالساهل..كان عمارة كده سمحه ماشاء الله تبارك الله..وقفت جنب الباب وطلعت كتاب حصن المسلم قريت لي كم ادعيه كده وشلت تلفوني اتصلت على سامي قلت ليهو انا واقف قدام بابكم...خمسة دقايق كده جا فتح لي..سلم علي وقال لي اتفضل..دخلني في صالون كبيير وااااسع وفيهو جنس عفش ماشاء الله انا ماقايل الناس ديل مريشين كده😂...جاب لي عصير وقعد اتكلم معاي زي ربع ساعه كده الخدمه الوطنية وبتاع..بعد شوية دخل جوة وطلع لي تاني قال لي اتفضل جوة للحاجه ..دخلت في اوضة كده لقيت انتصار راقدة في سرير وحالتا صعبه والله لو ماسامي قال لي ادخل للحاجه انا ماكان عرفتها..اول شي انتصار دي كانت صحتها سمحه كده ماشاء الله ولونا اصفااار..المرة الراقدة في السرير دي ضعييفه ولونا اخدر عديل ..قالت لي اتفضل اقعد مالك مخلوع كده؟! ماعرفتني مش؟! قالت لي انا عيانه ماسمعت بي مرضي؟ قلت ليها لالا والله ياخاله سلامتك عندك شنو؟ قالت لي عندي سرطان في الدم ( حمانا الله وياكم)..انا اتخلعت شديد وقلت في سري ده حق احمد عشان عذبتيهو ربنا حايعذبك زي ماعذبتيهو ..قالت لي مالك سكت كده؟ تلقاك مبسوط وقلت لي في سرك تستاهلي..قلت ليها لالا لي ياخاله ربنا يشفيك ياخ..قعدت تضحك وقالت لي انا كنت حاسه انك عارف...قلت ليها عارف شنو؟ سكتت مسافه وعاينت كده في السقف وقالت لي عارف اني انا الاذيت احمد ...انا ما اتخلعت لانو كنت حااسي بي كده..قالت لي اها شفت عدم استغرابك من كلامي بدل انك كنت شاكي فيني اساسا..بس ممكن اعرف انت ليه شكيت فيني؟! قلت ليها نظرات الحااسد ظاهرة ياخالتي ومن يوم شفتك في اوضه احمد انا شكيت فيك..بس ممكن تديني سبب مقنع انتي لي عملتي كده؟! قالت لي انا كنت حاقدة والله الحسد عماني..احمد ده من صغير كان متفوق شديد اما سامي ده من زمان فاضحني قلت لي يعني احمد ده متفوق في اي حاجه ومحبوب كل الاهل بحبوهو وسامي ده ولا شغالين بيهو كتير.وكمان في الشهادة طلع من الاوائل وعمو عمل ليهو منحه دراسية في امريكا..شفتو محظوظ كيف؟ قلت ليها ده سبب ليك يعني؟!! اهاطيب كملي ..عملتي السحر ده كيف؟ قالت لي كان مشيت لي شيخ كده شااااطر..قلت ليها لا دجال وساحر ومشعوذ قصدك..قالت لي المهم مشيت ليهو وقلت ليهو اعمل لي سحر بس يعطلو لي من القراية ..وطلب مني كم حاجه وجبتها ليهو..وعملو لي قال لي ختيهو ليهو في عصير ولا حاجه..واليوم القبل يسافر فيهو عملت لي نشا ..ولمن دخلت المطبخ حقهم وطلعت الكبابي كبيت النشا وفي كبايه معينه كبيت العمل..واديتا لي احمد...قلت ليها انتي متأكده ده لمن كان احمد مسافر؟! قالت لي اي..قلت ليها طيب هو قبل كان برضو عيان شديد ومابحب يسمع القران وكده..قالت لي اي ده بكون تأثير الحسد..قلت ليها يعني حسدتيهو وسحرتيهو؟! لا حول ولا قوة الا بالله ..قاطعتني سريع وقالت لي انا ماكنت عايزة اقتلو لكن والله ده ماكان قصدي وقعدت تبكي قالت لي انا ندمانه يايوسف ندمانه والله نفسي الزمن يرجع عشان اصلح غلطي بس ده مستحيل..يايوسف والله انا كنت عايزة اعطلو من القراية بس انا ماكنت عايزة اقتلو وانا ماكنت عارفه السحر بقتل..قلت ليها طيب انا عرفت انك اخترتي تكلميني انا بالعملتيهو ده لانو كنتي حاسه اني شاكي فيك طيب المطلوب مني شنو في الحاله دي؟! قالت لي انا ربنا جازاني بالمرض ده عشان اتعذب زي ماعذبت احمد وانا راضيه والله على الاقل قالو المرض كفارة..انا يايوسف عايزة اسئلك انا عايزة اتوب واستغفر ربنا حيغفر لي؟ بعد العملتو ده؟! قلت ليها ان الله غفور رحيم..انتي استغفري وتوبي وان شاء الله ربنا بيغفر ليك..قالت لي انا الاسبوع الجاي ماشه عمرة ..عايزةامشي بيت الله هناك ادعي عشان يغفر لي العملتو ده..قلت ليها بالسلامه..قالت لي انا كان مت عايزاك تكلم اهل احمد بالعملتو عشان يعفو لي..قلت ليها خير..وقمت على حيلي قلت ليهم انا بستئذنكم بعد ده والله ماطايق اقعد معاهم..طلعت سريع ومشيت على صحبي الشيخ داك..
