وفي الصباح مشيت الجامعه والساعه 2 جات طلعت سريع مشيت لي نسرين في المكتب زي ما اتفقنا امبارح..بعد السلامات وكده قالت لي اولا شي انت عرفت من وين احمد عيان نحنا متكتمين شدييد على الموضوع ده..قلت ليها عرفت من من اسماعيل واسماعيل كلمو ود خالك سامي..قالت بس غايتو ده مابتتبلى في خشمو فولة..قلت ليها اها انتي الحاصل شنو؟ قالت لي والله احمد ده كان كويس السنه الاولى والسنة التانية كمان في السنه دي مابعرف مالو فجأة كده عمي اتصل علينا وقال لينا انو احمد بقى يتكلم براهو ويكورك ويضحك مرات..لمن الجامعه ادتو اجازة مرضية..والدكتور كتب ليهو ادوية بس حالتو ما اتحسنت بالعكس اتدهورت زيادة..قمت انا حكيت ليها يوم اتصل علي وقال لي شنو قلت ليها كان بتكلم عن عقرب ..قالت لي عمي طوالي بقول احمد قاعد يقول ليهو في عقرب في يدي بتتكلم معاي..قلت ليها انا حاسي الشي ده سحر ولا عمل..قالت لي لالا ما اظن سحر..قلت ليها لي طيب شنو؟ قالت لي اول من قعد يكورك وجاتو الهلوسات ديك عمي مشى ليهو سريع يرجعو البيت لانو كان في الجامعه..قال لينا وهم ماشين جا جنبهم قسيس وعاين لي احمد وقال it's (invidiousness( ..وقعد يكرر الكلمه دي كتير لي عمي .قلت ليها انفديسس؟؟!! قعدت تضحك قالت لي انفيديسنس ..قلت ليها طيب الكلمه دي معناها شنو؟! قالت لي معناها حسد..قلت ليها يعني انتي مصدقه كلام القسيس ده يعني؟ تلقاهو راجل مخرف ساي..قالت لي مامصدقاهو بس انا زاتي حاسة بي كده..قلت ليها طيب اي كان حسد او سحر ..تفتكري في زول ممكن يعمل كده في احمد؟ قالت لي ان بعض الظن اثم وبعدين انا مابقدر افكر في كده لانو امي راافضه الفكرة دي بتاتا ومابتحب نجيب السيرة دي وبتقول لينا احمد كويس ومانعانا نكلم زول بالحاصل ليهو..قلت ليها ولي يعني؟..قالت لي مابعرف بس امي بتقول ماف كلام بالشكل ده كلها مشكلة بسيطه في الاعصاب واحمد يرجع كويس..قالت لي امي دي اصلا مابتؤمن بالكلام ده ومابتحب تمشي لي شيوخ وكده وبتقول دي دجالين..قلت ليها اي نعم في في ناس كتار دجالين وبتجارو بالقران بس ماكلهم انا بعرف شيوخ بقرو بي قران وبعالجو ناس ممتازين والله ولو امك مامقتنعه انا بجي اتكلم معاها ..قالت لي لالالا والله تزعل شديد مابتحب نتكلم معاها في الموضوع ده ولو عرفت اني وريتك حاتزعل مني ..قلت ليها خلاص خير..قالت لي بعدين احمد ان شاء الله قرب يجي اول من يجي تعالو ليهو وفسحوهو وطلعوهو خلوهو يغير جو حبه من الغربة دي بكون مشتاق ليكم قلت ليها نحنا كمان مشتاقين ليهو والله ربنا يرجعو بالسلامه ويلا استئذنك ومعليش شلت من زمنك وانتي مشغولة وبتاع..قالت لي لالا والله مامشكله ..انا بشكرك شديد لانك شايل هم اخوي والله انت نعم الصاحب .بس امي مابتقتنع..عليك الله ادعي ليهو في صلاتك يايوسف قلت ليها سبحان الذي لا ينسانا ولا ينساه..وودعتها ومرقت مشيت بيتنا...
ومرت الايام واتصلت علي نسرين وقالت لي احمد جاي بعد تلاته ايام ان شاء الله..فرحت شديد لمن سمعت الخبر ده واتصلت على اسماعيل وخالد كلمتهم سريع الاتنين فرحو كمان..والتلاته ايام دي مرت علينا زي التلاته شهور..لمن تكون منتظر حاجه بتحس الساعات بتمشي براااحه...
