كمرايتي..
الجزء الرابع عشر ..
للكاتبة الياسمين..
بقيت كل شوي اعاين على الدرب
دخلت جوا انتضر
اووف ياربي هذا يوم شطولة
مايرضى يخلص ويلعب على عصابي
الله يعديهة على خير
نطك الباب
ها يمة بشري
وليدي المره كلتلي الله كريم خل اشوف ابوها وخوانها
وحتى ما كالت
جاييلهه خطابه
مافتحت هذا الموضوع وياي
وكلتلي انتضري من عندي اتصال ....
الله كريم يمة الله يجعلهه نصيبك واشوفك مرتاح ....
بجاه اهل البيت
ولك سلبت راحتك هلبنية
شوف وجهك شلون شاحب استغفر الله ياربي.....
يمة هسة عوفيج من عندي مايصير بيه شي لا تخافين
ريحيني وكليلي ماشفتيهه؟؟
هذا الحجي
حتى مانطيت مجال الامي تدخل للبيت بقت واكفه بلباب وتسولفلي
ها يمة جاوبي ماشفتيهه
لا يمة ماشفتهة واصلآ البيت هادئ
جن ماكو احد بلبيت
وهية المره ام البنية بعدهي زغيره
حل مرت خالك
هيه الي قدمت العصير ولماي
ااه يعني ماشفتيهه
شلون اوصللهه يمة شلون
ابو سيوف عفاا مااستاهدك هيج
يمة فهميني هاي البنيه روحي بيهه
من شفتهه الهذا اليوم وانا صرت واحد ثاني
كل حياتي صارت قمر
هاي كمرايتي
ولك يمه شايف
روحك شصاير بيك هلبت نحلتك
ييي يايمة هذا اليبتيلي ويحب
بس ضيم
اتحسرت
و دخلت جوا وكعدت
ابو سيوف تريد جاي احسب حسابك
لا يمة مااريد شي
ولك انته حتى غده مامتغدي
ماصبلك لكمة تاكل
لا
مالي نفس
راح اطلع يلى براحتك بس برضاتي عليك اكلك مبارك لفة ونته طالع و لا تتأخر
الله كريم...
طلعت...
اذن وانا بطريقي دخلت للمسجد وصليت وطلعت
باكيت الجكاير بيدي
وكل شوي اسحبلي جكاره
وادخن
وخال اغنية انا حنيت
الولد كل شوي يتصلون بيه
ملتمين
اكيد احميد كللهم ....
هذا طالع على مرته مايضم شي
خابر
فتحت خط الووو هاي وينك ابو الشباب
ولك ياشباب من ضيمي صاير شايب حتى شيب طلع براسي
الحمد لله
انشاء الله اتصير الك بس اصبر
بس تعال تعال
ليش ماترد...
لا بس جان وضع تلفوني صامت
مم احاول اصدكك
المهم تعال يمنه خووش لمة تعجبك
بلكي تنسة
ولك والله مالي نفس الشي خل ابقى وحدي ارتاح اكثر
احمد..
لو ندري برواحنه نرتاح من نبقى وحدنة
جا هسه لسة ماشفت جهرتك
ههه كمنة نضحك
احمد..
اي ولك هيج اريدك تعال يمنه زحمة من الولد كل شوي يسألون
سيف...اي ونته ماقصرت اكيد كتلهم
احمد ههه لا بس مهند كتله لانو لح اله يعرف
اهااا
يلى جايك انا ....
.......
.......
قمر
جتي ماما من بعد ماطلعت ام سيف
دخلت عليه
كلتلي عرفتي من اجانه
اي ماما شفتهه
يي شتريد
اجت تخطبج
اني طبعت ماستغربت لانو جنت متوقعه
بس نطيت من مكاني لانو جنت متلهفه اعرف شصار
يي وشنو كتيلهه...
ماسديت الموضوع وماجبت طاري خطبتج
ابوج على جية
بس يجي ويرتاح افتح وياه الموضوع ولو ما اصور يقبل لانو منطين حجايه للجماعه بس راح احاول وياه عسا ولعل يقتنع
بلكي اذا اكلهم دارس ووحيد امه
وراح يتوضف وين الله ويقتنعون
بقت انتي وحضج
بقيت على نار صليت وكعدت ادعي من ربي يهديهم
ويجعلني من نصيب سيف
لليل بقيت بلغرفه امي كلتلي ماطلعين
وشوي واسمع عياط
وصوت عالي هز الكاع هز
ولج قمممر...
عزززه هذا امير
دفر الباب برجلة دخل معصب
قفل باب الغرفه
هذا صاير نااار. لزمني من شعري وسحلني سحل
بقيت اصرخ عوووفني اااخ
ولج يووم دخيلكم شصاير
امي ادك بلباب
امير عوفهه
وبابا يصيح عليه
وهوا ولا يمهم
وكام يحجي وياي بصوت عاالي
انتي مايفيد وياج التفاهم افتهمي
قرارنة مايتبدل وكلمة ونطيناها لناس
شنو تردين تخزينة
تكسرين كلمة ابوي
مال يجيج عريس ودارس
انسي
خلاص
افتهمتي. ويجر بشعري
عوووفني دفعته
انته شنو ماعندك قلب خلي عندك حساس
مااريده افهمني انا مو اختك شلون يطيك قلبك هيج تسوي بيه
والله على مود صديقك وانا شعلية بصداقتكم
حرام عليك خطيتي بركبتك
لج انجبي واحترمي نفسج ولمي لسانج لا اكصه وضربني
جريت المخده وخليتهه على وجهي خفت لا يرجع يضربني
بعدت عنه ونتجيت علحايط ضميت وجهي وعيوني مانشفت ابجي من حركه قلب خلاص
كطعت الأمل
تقرب علية وشمر المخدة
بس بأعصاب بارده
يمكن لانو شافني خفت منه واحاول احمي نفسي
همس بأذني
شوفي قمر الولد مؤدب وحباب انا اعرفه وعشرت عمر
لو ادري بي مو زين ما ارضى بي
انا مارايد اتخلص منج لا
بس ماراح تلكين احسن منة
وعافني وراح
دخلت علية امي
وكامت ادك على خدهة يمة بنتي اسم الله عليج
امير شكول عليك
الله لا يطيك كطعت البنية
اسمع صوت بابا يصيح على امير
اكيد ماقبل
انا منهاره ودموعي تجري وبحراره
خلتني بحضنهه
قمر بسج بجي شسويلج يوم حاولت احجي اقنعهم مافتاد وهذا اخوج مايتافهم شفتي شسوه خلاص ارضي بنصيبج
لا تقهريني
مابيدي شي اسوي
كافي كطعتي قلبي
ولج يووم مااكدر اعوفه
لا تخبليني
على الاقل بس انتي خليج بصفي
اي شسويلج ..شبيدي عليج
انسي ماما ولج لا يدري بيج اخوج والله يموتج رحمي نفسج ورحميني وياج تقبلي نصيبج
هذا أمر الله
كمت احجي ماحسيت على نفسي الا نمت
ما عندي دوام صادف يوم جمعه من كثر التعب ماحسيت على روحي
بقيت نايمة لل10
اجتي ماما
شوفي قموره راح يجوون الزلم العصر
اتصلت على خالتج بس هيه راح تجي
وخابرت لأم سيف
ورديتلهه خبر
طفرت من فراشي اي شكتيلهه
كتلهه ماكو نصيب وسدته المره رجعت لفراشي وغطيت وجهي بلحااف
سمعت طبكت الباب
ااوف سيف شلونك هسة شصاير بحالك
شلون اصفى الغيرك ونته نفسك بية ومنتضر يتيسر الحال وتجي تخبطبني
امداني شسويت بعمري
شفتي قمر وين وصلتي روحج
بسبب تهورج
واستعجالج
هاي هية خسرتي التحبينة وراح تصيرين الغيرا
خلاص ادمرت حياتي وكل احلامي طارت وي الهوه
جنت اتخيل نفسي
مرته وحلاله
وعايشه بيتة
مدللني ومدلعني ادري بي مخبل بيه
اتخيل
اكعده الصبح واول ميكعد يطبع بوسة على خدي
واحضرله ريوك
وثنينه نطلع سوه اني اروح لكليتي وهوا لدوامه
اااااه كل هذا حلم وبعد صعب يتحقق
اريد اشوفه ياربي حتى لو بس مره شلون شلون
دكت الباب اجتي هديل اهوو هسة وكته
ياهلا بمرت اخوي
من كلتلي مرت اخوي هيج احس قلبي نقبض
رسمت ابتسامه مصطنعه
هلا هدولة
يلى يلى كومي شنو هلكسل
لااا بس نعسانه كلش
جرتني من ادية كووومي ولج
كافي راح اصير ب12 اني اليوم غداي عندج
تغديني موو
اي تدللي
يلى ورانه تجهيزات
شكو ليش التجهيزات
لج ثولة راح يجون وي الزم نسوان
وبابا كال فد مره ناخذ الوكالة
ليش امج ماكلتلج
بقيت ساكته وماكدرت حتى ابلع ريكي
هاي وين صفنتي
يلى خل اسحبلج شعرج ونشوف شتلبسين
قمر..بقيت ساكته وهية تحجي هلمره كوه علي حبست دموعي
بس الحزن واضح بوجهي ماكدرت اخفي مو بيدي
فورآ كمت كتلهه رايحه للحمام لانو ماكدرت اتحمل مخنوكه كلش
طلعت من غرفتي ركض
دخلت للحمام وقفلت الباب فتحت المغسله حاولت اطيع صوتي بلبجي بقوة الماي الي ينزل
كمت احجي وصوتي يرجف ومخونك اباوع للمراية واعاتب
سييف وينك عني راح اموت فدوه اخذني
الحك علي
راح يزوجوني كوه
خل قلبي بعد مااتحمل عذاب
ارحم حالتي
ماعندي قوه اتحمل صدمات
دكت الباب هاي وين صرتي اتأخرتي
جاي اسبح شوي واطلع
بلفعل ذبيت على روحي ماي وحاولت اصحصح واكون قوية
وكافي اباجي
لازم ارضى بلي كاتبه ربي الي
طلعت من الحمام
وتغدينه
ماما لاهية بتحضيرات تسوي حلويات
وخالتي مونا وياها
خاله ليش سمر مااجت
حبيبتي معزومين عند خالة احمد
اهاا
حتى سمر اختفت صفيت وحدي
دخلت للغرفه
بلبداية تنشف بشعري
وبعدهه سحبته الي
ماشاء الله مرت اخوي شعرها يخبل بي لون ويلمع
لو يشوفج حسون يتخبل هسة
كمت اصنع ضحكات واسولف وياها
حتى ماابينلهه شي
كامت تكلب بكنتوري
يي شتلبسين ياقمر
نزلتلي بدلة قصيره رداناتهة طوال بس كيبور لونهه بصلي
وحذاء كعب
للعصر لبستهن
ومقبلت تخليلي مكياج
اني رتبت وجهي خليت بس كحل
وخطيت حواجبي
صفنت هديل على وجهي
اووويلي هاي ماخاله مكياج وهيج حلوه
لعد من تحطين شتصيرين ...
هديل منو راح يجي؟
خالاتي ونسوان عمامي بس مو كلهن
وضحى وندى خواتي
اهاا كلهه جاية
كلتلي مو بس هيج لج بلحفلة كلهه متحلفه تجي
لانو تعرفين من بعد وفاة عمي الجبير ماصارت عدنه فرحة
المهم جهزت وهيه هم بدلت
وفتحت شعرها
هديل احله شي بشكلهه عيونهه لانو كبار وصفر
و روحهه حلوه
كالت هاا ماكتلج وحسن يجي ههههه
لتخافين عيني ميطب عليج بس يجي وي الزلم
....
...
طبو الزلم بلدوانية
ولنسوان
وكعدو طلعت هديل يم اهلهه
واجتي ماما
لزمتني من ايدي
شوفي بنتي راح يجي الشيخ ياخذ وكالتج
مو تخزينة
وترفضين
ماما فدوه اروحلج رحميني خلصيني من هلعذاب لا تزوجوني مااريدة
والله قلبي خلص بعد مابية حيل
شبيدي عليج ماما هذا نصيبج ارضي بيه
مااكدر اسويلج شي مو بيدي
ماما احنه عايله كلنه دارسين ومثقفين
ادري شنو هلتفكير هذا
انا شنو ذنبي
بنيتي لا تعبيني وياج وبعد ماكو فايده للكلام
وانا ماناقصه هم بس ابوج كافي
صلي على محمد
و
ذكري الله
ويلى هذا ابوج اجه
قمر ....
بقيت ضايعه مامستوعبه الي جاي يصير وياي ابد ممصدكه
من ورا الباب سلم الشيخ وكال
هل تقبلين الزواج ..و الى اخره...
اذا كنتي موافقه
قولي نعم
اني سكتت نفسي العالي حوط المكان كله احس الكل جاي يسمع دكات قلبي
عادهه مره ثانية
اذا كنتي موافقه قولي ..نعم
كرصتني امي وتهمس ولج احجي كولي
ودك على خدهه وتخزرني
اجمعن دموعي
وسديت عيوني ونزلن الدمعات وكلت
نعم....
وللحكاية بقية ...
