كمرايتي ...
الجزء الخامس عشر
للكاتبة الياسمين....
اني كلت موافقه
وهية علت صوت الهلاهل
لا تبجين قمر
لا تفضحينة كدام الناس
على السريع رتبي وجهج راح افتح الباب
هديل خبصتنه....
بلفعل مثل ماكالت سويت
رتبت وجهي لا احد يحس علي
خطية امي شنو موقفهه ادري بيهه تصرف هيج وياي بس مو بقصد لاكن مجبوره وادري كلش زين. مقهوره علية
واضح هذا الشي عليهه
طلعت كدام النسوان وكلهه تخبلت عليه وكامو يباوسوني الف مبروك
ام مصطفى هنيالج على هلجنه تخبل الله يحميهه من العين وكامت ادك على الخشب
هديل وخواتهه ولا كعدو بس يركصون
وحاطين اغنية يحلوه بس نضره
ههه غمضت عيوني وتوقعت نفسي السيف والناس هاي اهاليته
وشوي ويدخل علي
ماادري بس مستحيل اكدر اقتنع بلي جاي يصيرلي
ماما تخزر بس وتأشر على شفايفي تقصد ضحكي
وانا شما تكلي اسوي
ورا نص ساعه طلعو
طبيت على ماما
ها قموره حبيبتي قبل شوي ابوج رادج
يريد يتباركلج
شكرآ بس ماكو داعي
اذا يريد انا اتباركله
قمممر
ماما فدوه نطيني الفون مالتي ليش
لا تخافين بس ارد احاجي سمر
ماكو داعي تحاجينهه
باجر تجيج
اكيد
فدوه ماما اترجاج
تلفون ماكو ..
وانتهى النقاش
يوم ثاني طلعت من الصبح ارد اروح للكليه وطلعت ماما وياي
توصلني للشارع
خاف اشوف سيف
من خلصت دوامي جانت هديل وياية تمشي
كمت اتلفت اكيد الكاه
بس يمكن بلش دوام ميكدر
رجعت للبيت وللعصر ندك الباب
قمر وينج اجتج سمر
اجتي
الغرفتي ركض كلش جنت محتاجتلهه اريد اسولف وياها
حضنتهه وكمت ابجي ابجي وهيه هم
لج كافي على كيفج وي روحج
والله فتره وتنسين
قمر اريده مااكدر عليه
مااكدر اعيش وي غيره
عوفيج من كلشي وكليلي شلونه
اااخ شكولج
ولج منتهي
اصلآ اذا تشوفينه متعرفينه
متغير كلش
اااخ يمة قلبي
غزه العزاني كله مني
ضيعت عمري وعمرا
بس ولخلقج
ماراح اعديهه على خير
ولج انتي مخبله شتردين تسويين .....
كلشي اسوي ووماخايفه من احد وتشوفين.....
كافي العذاب ولكتل الي شفته
والله مرت علية ايام مااتمناهن للعدو ...
بس ضيم....
واذا ازوج غيرا فعذابي راح يستمر ....
ولج ابوج اخوانج....
شوووف شتكلي ....
هذوله الي هم ابوي واخواني
مافكرو بيه وخاصه من وكلت كبال بابا وامير ودموعي مانشفت وانا اتوسل بيهم لا تزوجوني
ماقبلو
ترديني افكر بيهم!!
لا عيني لا تتوقعين اكدر انسة السوو بيه
كمنه نسولف
وكامت تحجي عن احمد وحبه واهتمامه بيهه وعن حملهه متغيره هوااايه سمنانه وكبرانه بطنهه
وكاعده وتحاول وياي انسي خلاص وحسن خوش ولد حباب وشكله مرتب...
عود هيج بسهولة اكدر
ههه شكد بطرانه
عدت كم يوم على هلحاله لا دريت شنو خبر سيف ولا شفته
وهذا حسن كل شوي داكلي واني ماارد عليه هيج احس بنفسي مااكبله
اتفقو على الحفله بدون علمي تدري بيه ماما كلش زين ماراح اقبل
سكتت وستسلمت للأمر الواقع لاكن بس بلوقت الحالي
اتحضرو للحفله
لبست فستان لونه بنفسجي غامق
بس مستور انا ختاريته لانو مااريدهه يشوف مفاتني
ابد ابد
خلولي مكياج وكثرو وترتيبه بسيطه الشعري
كلهه تركص وبلفعل ناس هوايه
موجوده
انا احس بنفسي
ميته كل احساس بداخلي مات
حتى بجي ما كمت ابجي بس ساكته واباوع للناس
يلى يلى راح يطب العريس
ودخل عليه حسن
كعد يمي ومارمشت عينه بس يباوعلي احسه راح ياكلني
واني كارهته
هيج احس نفسي مااشتهي اشوفه
مانطيته وجه بقيت ساكته
لبسني الحلقه واني هم ورا شوي طلع واستمرت الحفله دك وركص رادو ياخذولنة لقطات صور بلأستوديو
بس اني مقبلت كتلهم كافي اللقطات الي اخذناهن بلبيت
ولأول مره تمشي رغبتي
طلعت الناس اجتي ليونه كعدت بحضني وتباوعلي عمتو عمتو حطيلي من هاذ تقصد على الحمره هههه
ضحكتني
لج عمه اصلآ راح اكوم اغسل كلشي اريد تصير مثلج وجهج صافي
شوفي انتي شلون حلوه
...
بعدهه صعدت ورا امها
كمت سبحت ولبست برموده وفتحت شعري حتى ينشف
كمت التهي بدراسه ومن يتصل حسن ساعات ارد وابقى شوي احجي وياه
على كد الهاا ول اي ولنعم
كولشي مايفتهم مني هيج اكول بلكي يضوج ويمل مني ويفصخ الخطوبة
ومرات من يتصل ماارد ومن يسألني اكوله نسيته صامت واتحجج
فد يوم اصر انو اطلع وياه ومااقبل
حد مااجت ماما وكلتلي على الطلعه وكامت تحجي عليه ونتي مايصير براسج خير ونتي هيج وهيج
حسيته طااع من عيني
هلأثول بهسرعه رحت كلت لأمي
كلعاده اضطريت انو اقبل
سيف..
يوم ثاني كعدت الصبح
ستغربت بلعاده امي تكعدني شعجب اليوم ماكعدتني
يووم وينج
لكيتهه فارشه سجادتهه وتقرا قرآن
الله يتقبل يمة
هلة وليدي ..آمين
شنو ماتريكيني جوعاااان
ايي تدلل يلغالي هسه احضرلك
ورا شوي جابت الريوك خلته على الطاولة بلمطبخ
تريكنه
وكامت تسولف
يي ابو سيوف ماكتلك
شنو يوم كولي
اختك باجر تجي هية وجهالهه
الف هلة بيهه
دك نقالهه كامت
كالت هسه اجي ورا شوي رجعت مالهه خلك
يي شخيرك يمة منو هذا الي خابرلج
جارتنه ام انور
ااه
ييي شكالت
يمة خلاص انساها ماكو نصيب البنية اليوم يمهرون عليهه
لا تهتم والله لأخطبلك احلهه منهة بألف مره
هية كلتلي هيج وانا شلت المواعين الي يمي وكمت اكسر بيهن
ولك كول يالله
كمت اغلط واصيح
فقدت ماكمت اشوف شي كدامي تهسترت
ولكم الله ولحد ابني راح يصير شي بي من وراكم
يمة مااخليهم ياخذونهه تفهمين
صلي على محمد ابو سيوف اهدء
شلون بس كليلي شلون انا رايح جرتني من قميصي اوكف اوكف شسوي رايح ولك لا تبهذل روحك
مارايدين طلايب
تولي يمة
يمااااا
هاي الكلمه لا تحجينهه مستحيل اشيلهه من بالي مااكدر
موبيدي غصب عني
احبهه والله احبهه
فهميني فدوه اروحلج
تعال تعال اكعد شسوي رايح
انوب لا يدرون بيك عاشك اختهم ويسوولك سالفه
ابعدنه من شر بن ادم
دخلتني
مااريد اشوفك مكسور يمة انا شعندي غيرك تريد تموتني
لا تصرف هيج
كعدت
بس نار الغضب تاكل بروحي
كوه مصبر نفسي وكاعد
لو يصح بيدي هيج اروح افلش بابهم وادخل واشوف
يازلمة الينطيهه الغيري
افرك بأيدي
وامي كاعده يم رجلي اتمرخ واصبر بية
للعصر وانا كاعد على نار
احس بروحي مربط
مامسوي شي
ولك ابو سيوف هيج بسهولة تشوفهم ياخذونهه منك ونته مامحرك ساكن
لازم تسوي شي
بسيطه انا اعلمكم
طلعت للباب بقيت كاعد علعتبة
ورا 15 دقيقة
واجن سيارات طبكن يم بالبهم نزلو زلم ونسوان
ومن ضمن الزلم وياهم رجال معمم عرفت جاي يمهرون
اول مره هيج احساس يمرني هيج غصة بقلبي
غوركن عيوني
راحت كمرايتك يسيف
راااااحت
تمنيتك الي بس الله ماراد
مامقسوملي جا هية كوه....
وين رحتي؟
وياج ماخذتي صفنتي...
وااخ لو جرت حسرتي
وياا صفيتي
يافشلتي...
عمت عين الوكت ضلمهه عيشتنهه
ماخلة ابتسامه بين ضحكتنه
شعاتب قلبي
لو اهلج الغصبوج
نطو كمرايتي
ذيج الأحبنهه
طبيت للبيت يمة انت طالع للكاضميه اريد اروح ازور
مااتحمل اكعد راح انفجر
رحت ازوروطبيت لضريح للأمام وونخيته يحلهه اليه لزمت الشباج وكمت ابجي بحركه قلب
من جان عمري 16 سنة
وهسة عمري 27
مايوم شفت نفسي ضعيف لهلدرجه
ولا باجي
بعد ماخلصت زياره رجعت للبيت
بس براحه اكثر تلكتني امي واحمد يوو
شسالفتكم
ها يمة شلونك افكر بيك
هاي انا يمج كوولشي مابية
كعدنه وكمنه نسولف
لتهيت بشغلي
مرتاح بوضيفتي والوضع احسن مره
وانا راجع للبيت اسمعت صوت الديجي ونسوان طابه لبيتهم
ااخ يمة قلبي حسيت بروحي نتهيت كلش ماكدرت اتحمل
فريت السياره وطلعت
ليش ليش خلص قلبي والله
على الاقل كون ماامر بهيج مواقف
بهاي الفتره
كمنه نطلع العصريه للساحه نلعب طوبه
وهيج اغير جو
اختي عدنه ولبيت هوسه وجهال وانا مامتعود على الخبصه صح فرحان بيهه
بس جهالهه وكح مايكعدون ومسوين البيت ملعب
رجعت للبيت متأخر بليل
دخلت هدوء الجهال متعودين من وقت ينامون
بس اجيت متلهف للزغيره
ندى يدلعونهه نونه
تخبل شعرها كفشه ههه
وبيضه وعيونهه على كولتهم مثل عيوني
كلش احبهه واحب الاعبهه
دخلت لكيتهه كاعده وامي نايمه
بس هيه وامهه كاعدات
اخذتهه شلتهه وكمت الاعبهه وابوسهه
لحد مانامت بحضني
اجت نور اخذتهه من ايدي وراحت خلتهه بلفراش وغطتهه
رجعت كعدت يمي
ابو سيوف شلونك
الحمد لله على الله
هيج احسك مامرتاح
بعدك مانسيتهه؟؟
ولج شنساها ترى لا تشوفيني اضحك وسولف وابين طبيعي بس على مود امي لا تنقهر ومااريد احد يحس عليه
ولا فتحي قلبي وشوفي الضيم الي انا بي
نواره اخوج مامرتاح
خويه شلون تريد خلاص البنيه نكدر نكول ازوجت
بقت بس الزفه
خلاص ترى ماوكفت الدنية عليهه
شيلهه من بالك
هسة انتي عوفيج من عندي انا همي مايخلص والله موجود
تعاي انتي احجيلي عن وضعج مرتاحه
رجلج زين وياج
عيشتج وي اعيالج شلونهه
والله يابو سيووف رجلي زين صح مانجيكم هواي
لاكن تعرف الدرب من البصره لبغداد
والله مو بس المسافه
هوا الصراحه مايكدر على فراكنه يكول البيت كله مااحب اطبله ونتو ماموجدين
وشغله الحمد لله زين
بس عيالي مشاكل دوم وحتى اتناكر وي رجلي من وراهم صح انا كافه روحي وماعندي شي وي احد بس عايله جبيره واكو غيري جناين وهوسه وجهال اووو شحجيلك ...
الله كريم خيتي ربج يفرجهه ماضل هيج
بقينه انسولف هواي حد مانعست وكلتلي من رخصتك خويه بعد كلش طفيت
الصبح تريكت وطلعت ومن رجعت من دوامي
جنت امشي بفرعنهه بيومهه السياره عطلانه وذابهه بتصليح
وانا جاي امشي صوب بيتنه
شفت قمر
طالعه من بيتهم وياها خطيبهه
باوعتلهه وبقيت واكف بمكاني وهيه هم تباوعلي ودنك
صعدت بسياره
وطلعو
وصلو للشارع
انا ركضت اخذت تكسي ومشيت وراهم
وللحكاية بقية...
