البارت العاشررر
....شكوووو رواء
....تعال وتعرف
....اي هسه اجي
منار كالتلي
....هشام وين تروح
جنت دابدل وهي تحجي بعصبيه
.....يعني هي من تخابرك هيج تروح تركض عليها
....كم مرة اعيدها عليج هي بعدها مرتي وام ولدي
عيشي بيتج ومعليج بيها مو كل مرة نحجي احنا
....شدتحجي انت
جريت سويجي وتلفوني بسرعه وطلعت من البيت
وكمت اسوق سريع
وصلت للبيت شفت سيارة ابويه
نزلت ودخلت للبيت وصعدت الدرجات مال مطبخ و بديت اتقرب وجان صوت ابويه يحجي
دخلت جوة شفت ابويه كاعد ومرة كاعدة بصفه
ورواء واكفه وشايله علاوي
...السلام وعليكم.
....وعليك السلام
....رواء شبيهم الجهال بيهم شي
...لا
....شكو خليتني اجي هيج بسرعه
....عمو كلي وباوعت على ابويه
باوعت هاي المرة الي جانت كاعدة وجانت لابسه عبايه مال
راس ولابسه ربطه بيضه
رحت كعدت كدامهم
....شكو يابه
....امك
واشر على المراة الي بصفه
.....شنووووو
وكمت وكفت
شنو جاهل اني جايبيني مناك لهنا ركض وتعال وعبالي
واحد من الجهال بي شي طلعت جايبلي هاي وياك
البارحه حجيت وياك بهذا الموضوع
....ولهذا السبب ردت تفتح صفحه جديدة من حياتك
....ماافتح وخلي تطلع هاي من بيتي
....اكعد واسمعني هشام
...مااسمع شي خلي تطلع اني ماعندي ام ميت مرة كتلكم
ظلت منزله راسها هي ومتباوع عليه
....كافي هشام
....شنو كافي يابه ليش دخلتها لبيتي ها
....اكعد واسمع وبعدين اعترض
...ماااكعد ويا هاي بنفس المكان
....يااابني اخذ حجايه مني واسمع كلامي واكعد
....لا
شفت رواء واكفه اشرتلي
رحتلها
مشت كدامي للمطبخ
....وين ادم فوك وعلاوي هسه صعد
....وانتي عايفتهم
...شكو عليهم
....روحي صعدي يمهم
...انت عوف الجهال هسه انت ليش متسمع من امك ترة خطيه تقهر لظل بعقدك
....لج عدلي لسانج ولظلين تحجين زايد ومعليج انتي
....انت شلون تحجي هيج ويايه
.....صعدي فوك
...داسوي جاي
.....لسوين
...موصوجك صوجي اني داحجي وياك مثل الاوادم
.....لتحجين مثل الاوادم و روحي عايفه الجهال وحدهم
وكاعدة شلون امهات
....والله ياالله
....معاجبج لازم
....لا معاجبني
....بعدين حسابج صعدي فوك
عافتني ومشت اجيت داكحلها عميتها هدورة ويا رواء
ضجت وطلعت قهري بيها
سمعت صوت احد ديمشي وشفت ابويه اتقدم عليه
...شوف ياهشام اذا ماكعدت وسمعت الكلام وتصرفت بعقل لاانت ابني ولااعرفك بعد لان مدتحترمني
..يابه ليش هيج سويت ليش يوميه تحركون بكلبي ترة والله تعبان
....اعرفك مو انسان ضعيف ودائما تواجه كلشي بحياتك
يله امشي
...ميخالف يابه
مشيت ورحت كعدت كدامها وجنت مااباوعها
حسيت بخنكه بس شفتها برغم انو اني اصلا مااذكر شكلها بس من كلي ابويه هاي امك ميت ذكرى
سيئه اجتي بالي
سمعت ابويه يكللها
...سناء احجي
كامت جرجر بالحجي
كتلها
....احجي فضيني لظلين تمتمتين بالحجي
...ابني
....لدكوليلي ابني اني موابنج
...اني اسفه
....صدك هسه يله ذكرتي دكولين اني اسفه وبااعتقادج اذا كلتي اسفه راح اسامحج
.....ياربت سامحني
...انسي وانسي عندج ولد انتي لكيتيني بالشارع لو نسيتي
اذن انتي ماخلفتي
عليش اجايه دورين سماح مني
....الله يسامح ويغفر انت مسامح
.....لاوالله ما اسامحج ولو اشوفج تموتين كدامي ميرفلي جفن اني محد وصلني لهنا غيرج انتي
انتي مو بس اذيتني واني طفل لا انتي
خربتي حياتي كلها ولحد الان ادفع الثمن
....انت ابني واني امك والام هم تغلط ماكو انسان معصوم عن الغلط
...يغلط مرة مرتين مو سبع سنوات وماكو ام عدها بشاعه مثلج
ماكو ام تكدر تسوي بقطعه من كلبها مثل ماانتي سويتي مستحيل ماكو هيج قسوة
اني اكرهج واكرة اي احد يذكرني بيج
ماكرهت احد بكدج لو بيدي اشرب من دمج
احتقرج
كامت تبجي وتمسح عينها بعبايتها
.....اني ندمانه واني كبرت ومريضه وعلى غفله اموت اريدك سامحني اريد اشوف احفادي
....من سابع المستحيلات خليج بعيدة عن حياتي وعن اطفالي روحي الكيلج واحد بس صدك هسه
كبرتي متفيدين بعد
....ابو هشام احجي ويا كله
....ميحجي ويايه ولايتعب نفسه واذا كلج اني اخلي يسامحج فهالمرة ابويه غلطان لان ماااسامحج لو تموتين
ولااريد اشوفج مرة ثانيه لان هالمرة اذا شفتج يمكن اقتلج
وأشفي غليلي
....اني ام وكلبي محترك عليك والله العظيم
والله ندمانه
....ميفيد ندمج اجى بوقت كلش متأخر
....هشام ابني انت ليش هيج قاسي صاير
....يابه الله يخليك لتستميل عطفي تعرف كلشي عندي بجفه وهذا الموضوع بجفه
خلي تولي هاي ومااريد اشوفها نفسي تلعب منها
....اني اجيت ردت تسامحني وتبريني الذمه خاف انام بعد ماااكعد
واني توجهت الله من زمان وطلبت يسامحني وبديت اكفر عن اخطائي
واخاف الله يحاسبك عليه مثل ميحاسبني عليك
....اذا راح يحاسبني علمودج فااني قابل بس الله مايظلم احد والله يعرف الي سويتي بيه واللي
خليتني اعيشه
اني ردت الله يحركج مثل ماجنتي تحركين جسمي
تقربت مني ودنكت على الكاع سامحني فدوة ابوس يدك ورجلك خليني اشوف الراحه
كمت وخرت بعيد عنها
...طلعي من بيتي ولتفكرين توصلين هنا بعد ودربالج تفكرين تلعبين بعقل ابويه هالمرة اني اندمج
مسحت وجهها وكفت بكوة وخلت العبايه على راسها
ومشت من كدام
ولتافت على ابويه
وكالتله
....اشكرك ماقصرت ابو هشام
ابريه هز راسه وكللها
...اوصلج
...لا اني اندل الطريق
وندارت علبه
.....الله يحفظك والله يسامحني على الي سويته وياك
....اذا اكو عدالة بلارض فاان شاءالله تحتركين دنيا آخره
...اشكرك يمه
ظليت واكف لحد ماطلعت من البيت
وبعدين رحت كعدت كدام ابويه
....مصورتك هيج ابد جنت معتقد كلبك راح يلين من شوفها ماكو انسان مايغلط
وهي غلطت وكبرت ياابني ومريضه يجوز تموت وانت تاكل بنفسك بعدين جان سامحتها هي كلمه ماتفرق وياك
....يايوم اني جذبت انت تعرفني مااادعي شي وامثل تريدني امثل عليها وشلون امثل عليها وهي جرح ينزف بيه ها شلون كلي
...انت ليش دائما تتعلق بالماضي وتأذي روحك كلي
ياابني ليش متعرف تسامح اني
سناء دمرتني وإذتني وكرهتني بالنسوان
بس سامحتها لان شفتها مكسورة ومهانه الله ياخذ حقنا ياابني الله يسامح وينطي فرصه للبشر يتغيرون
انت متسامح
..يابه اني الدنيا هوايه اذتني فااترك هذا الموضوع
....الدنيا مااذتك بس انت موقنوع ومو متسامح والماضي محاوطك
مدتكدر تطلع من القوقعه الي مغلف نفسك بيها
وهيجي راح تتعب وراح تخسر
اني كل مرة اكول اريد اقربك من امك حتى اريح ضميري
انجاهك وحتى اسد كتاب انتهى من حياتي
يله اني راح اروح وفكر بكلامي وعيد تنظيم حياتك وسيطر عليها لاتفلت منك الامور اكثر وبعد متكدر ترجع شي مثل الاول
....الله كريم
....الله كله كرم
وطلع ابويه وطلعت ورا وصلته لحد الباب وبعدها رجعت
داخذ مفتاحي وتلفوني
وشفت رواء مكيجه ونازله متحضرة تريد تطلع
وجتى فتحت الثلاجه واخذت مي شربت
شافتني اباوعها
... شبيك هيج تباوع
....وين دتروحين
...اريد اروح اسوك
...وهيجي اطلعين
....شبيه
....شو صايرة تهتمين كلش بنفسج
....اني دائما اهتم بنفسي ودائما حلوة
بس اكو ناس عميان ميباوعون خطيه
...اني اوديج تسوكين
...لا
...كتلج اني اوديج
....ههههه والله انت تسوي فد افلام يعني شنو مثلا
انت تسوي نفسك متذكر لو متعرف شنو الي صار بينا
....هذا شي وذاك شي
...صدك شلون بله
...يعني اني داسوك لجهالي
....اي عادي روح اخذهم اشتريلهم الي يريدو بس اني اطلع وياك لا
...ليش جنتي تتمنين النفس مني
....جنت هسه لا اني هسه حرة عايشه مثل الطير
....لتخليني اكسر جناحج
.....انت بهيج مدتثبتلي انت رجال
....رجال وغصبن ماعليج سمعتي لولا
....ههههه وخر شويه
ودفعتني
اخذ جهالك شوف شمحتاجين ممحتاجين واني راح اطلع محتاجه اشتري شغلات زيد جمالي هههههه
وكفت كدامها
....رواء لتخبليني احجي عدل واحترميني احسلج اني بعدني ماطلكتج سمعتي لولا
.... وراح طلكني رضيت ولا مارضيت واخويه شافلي محامي
....اي زين هسه لعد اشوفج شلون راح اشيل اخوج والمحامي واخليهم يفوتوهم ويشبعوهم كتل بالله العظيم
... حتى خاف باقي بينا شويه احترام وذكريات جيدة حتى هاي هم تروح
.....اني اوديج
...مااريد
...اخر مرة اكلج مرة ثانيه اجرج من شعرج واصعدج للسيارة لان خلص صبري
.... ولا تكدر تلمس شعرايه مني
انت مو دتصير رجال براسي
فتحت عيني وبعد ماسيطرت على نفسي كمشتها من شعرها ورفعت وجهها وقربته على وجهي
...باوعي ولج لو تتعلكين ماااطلكج واذا حجيتي حجايه ثانيه ادمرج سمعتي لولا
مومال احترام انتي
....نزل يدك كافي عد ترة تحملت بمافيه الكفايه كافي
وكامت تدفعني وتضرب على صدري
....اطلع من حياتي كافي خلص مااريدك روحلها روح اركض لحضنها اركض لااي وحدة حبيتها عليه
لااي وحدة جنت تروح ذب همومك يمها
رخت يدي من شعرها ولمن عفتها ندارت دتروح بس اني كمشت يدها
....رواء لضوجيني لتخليني آذيج
....اني شبعت أذيه بعد كمت مااحس خلص
.....اني محتاجج
....ليش مدترتاح يمها
....اريدج الج
....مااكدر ارجع اسامح ولااكدر اتحمل الي صار
سكتت وجانت اكو نقطه من الدمع واكفه بطرف عينها مسحتها بااصبعي
ونزلت اصبعي على شفايفها شفتها غمضت عينها
وتنهدت تقربت من ركبتها وبستها بهدوء
وكامت انفاسها تتسارع وبديت اتقرب من شفتها
وجان تدفعني
....لا هشام تريد تخليني اضعف وتريد كلبي يركعلك حتى تحس نفسك قوي مو
رديت مديت يدي داكمشها كامت ترجع ليورة
...روح كافي بعد لتجي هنا واطلع من حياتي
.....مااطلكج
....اذن بينا المحاكم يا هشام
....اني ماااخاف من القانون لان اني فوك لقانون
...انت تشوف نفسك فوك البشر هم
موبس فوك القانون
....اني تحملتج هوايه
... اني هم هوايه تحملتك وبعد خلص مااتحمل اكثر
....شي واحد بس مو كفني بمكاني
.....شنو هو
تقدمت منها وجريت راسها وبستها قوي
ودفعتها عني
ومن عفتها جانت مغمضه عينها وجسمها برجف
كتلها
....خلي تفيدج المحاكم اريد اشوف شراح يطلع وياج لو انتي لو اني
طلعت ووصعدت بالسيارة ولمن كعدت وشغلت السيارة
وذكرت البوسه الي بستها الهاً وكمشت شفايفي حسيت بشعور
غريب وعبالك اول مرة طعم البوسه احسه مختلف
رجعت للبيت وشفت منار كالبتها مناحه وكاعدة تبجي وخدودها حمرة وعيونها منفوخه و شريط مال دوة يمها
....هاي شكو شبيج
....شنو الي مابيه
....شكو احجي
.....اني مداعرف راسي من رجلي كلي شنو الي ديصير وياك
كل شويه مخابرتك ورايح
اني شنو هنا شنو دوري فهمني ترة اعصابي انهارت
وكلبي يوجعني احسه من القهر راح ينفجر
....هسه شتريدين
....انت تريدني لولا
....هسه شنو هالحجي شنو الداعي الى
....ليش دتتهرب من الأجابه كلي.
...اكلتي
...لتغير الموضوع
....اكلتي لولا
..اكل سم ان شاءالله الله ياخذ روحي وارتاح
وكامت راحت للغرفه وسدت الباب قوي بحيث صوت الباب رج البيت
انتجيت على الكاونتر وظليت صافن
وكلت خلي اروحلها خطيه
رحت للغرفه وفتحت الباب جانت نايمه وتبجي
كعدت يمها وجريت راسها وخليته على رجلي
...منار اني تائه وعايش بدوامه ومداكدر اطلع منها
مداكدر اقرر شي اريد اعرف شنو قراري مداكدر
اريدج اصبرين عليه شويه اريد اشوف وين راح ينتهي طريقي
...واني بهذا طريقك لولا
...اكيد
كامت كعدت وجرت يدي وخلت يدها الثانيه عليها
....اني كلبي يوجعني اني ندمانه بس بنفس الوقت مااكدر ابعد عنك احسك مثل الاوكسجين اخاف يخلص وحياتي توكف اني كلش حبيتك بالذات من اني صرت يمك كمت احبك اكثر
....اني خايف عليج لتحبيني هلكد
....لتحجي هيج الله يخليك
....لتنطين اكثر من ماتاخذين.
...يعني انت متحبني لعد شلون كلتلي احبج
....اني كتلج احبج بس اني هسه افكاري متشتته
ودايخ
....انت المن تحب بس كلي صدك تحبني لو دتقشمرني
....منار كومي بدلي خلي نطلع وناكل برة لان جوعان
....اوكي
وبعد متحضرنا طلعنا كعدنا بمطعم
وبعدها فريتها واحنا بالسيارة وطلعت اغنيه
ا(( انا حنيت ))
وجان المقطع
((من غبت عني واني صدكني مرايه مكسورة
وجرح يعكس جرح
من ضعت مني وقلبي تعبني
مااحس اني على قيد الفرح
عيوني تشتهي شوفك
واذوب بلمسة جفوفك
حبيبي من البعد انا مليت
تعال لحضني دفيني
وعوض عمري وسنيني اموت من الحزن بعدك اذا مااجيت))
يالله هاي الاغنيه اخذتني لغير عالم بحيث حسيت نفسي فقدت الشعور بالمكان وماحسيت الامن من منار طفت المسجل بعصبيه
وباوعتلي وظلينا ساكتين الطريق كله
ورجعنا للبيت
ولمن نمت اجتي منار نامت على صدري
وباوعت عليه وضحكت
....تعرف انت كلش حلووو كلما اباوع بوجهك كلبي يذوب بيك
...هههه هاي عيونج الحلوة
...بس
...لاكلج على بعضج حلوة
....يعني انت ماشفت احلى مني
اجتي رواء على بالي
مجاوبتها
...انتي حلوة
تغيرت نظراتها
...يعني اني احلى وحدة عرفتها
...اني هوايه عرفت حلوات ههههه
...ليش مجاوبني
...مو اني اعرف وين تريدين توصلين
...اي لعد جاوبني
...ماكو داعي لهاي المقارنات يامنار
....ليش
...لا ن مراح اجاوبج
...ليش متقبل جاوبني
....لان هي مرتي وانتي هم مرتي
....بس انت كلت راح نطلك على شنو اتفقتو
....حتى اذا اطلكتها راح تبقى ام ولدي ولاتتصورين فد يوم احجي عليها او اسمحلج اجيبين طاريها بسوء
....هيج تحبها
...هذا ماله دخل بالحب هذا احترام
احترام لحياة نكظيها ويا شخص
....ها اي مبين
...شنو الي مبين
....لا سلامتك
تصبح على خير راح انام
...وانتي بخير
منار دتتعذب واني سبب عذابها بس اني مدالكي الصح
ولا داكدر اخطي بعيد عن رواء
بس ليش ماجنت احسها مثل ماهسه احس بيها
ليش من بعدت عني بديت اريدها
اني راح اظلم وحدة منهن بس منار مالها ذنب بشي
منار تحبني واني اشوف نظرات الحب بعيونها
واحسها مريضه بيه
اذا اعوفها. راح تنتهي
وتنتهي حياتها وهي وكفت بوجه امها علمودي
اني ليش ماابعد عنهن اثنينهن احسن حتى لااحس انو اني ظلمت وحدة
حتى لمن احس بالوجع يهده وجع تأنيب ضميري
سحبت الباكيت مال جكاير واخذت منه جكارة وشعلتها وكمت اشربها
وجانت منار تلوب كل شويه تتحرك
وتتغطى وتتكشف ومتعرف شسوي
....منار
...ها
...تعاي نامي بحضني
تقربت مني عالسريع وحضنتني قوي مثل الواحد الي كامش طير بيدة ويخاف يعوفه لايطير منه
....شكد ارتاح من اني بحضنك انسى كل الدنيا
من تحجي كلش تاذيني
...نامي
واني هم نمت
ومثل كل يوم دوام رحت
ولمن خلصت
دوامي طلعت تمشيت على سيارتي فتحت الباب وطلعت مسدسي خليته على المقعد الي بصف السايق وشغلت السيارة
وشفت طالع بالشاشه انو عندي واحد من العجلات
بنجر
نزلت رحت شفته جان صدك نازل كلت هسه اروح اسوي رجعت فتحت الباب داصعد
سمعت واحد يكلي
....ضابط هشام
نداريت وبهتت
وكفت بمكاني ماتحركت وعبالك فصلت والدنيا وكفت بيه
وبعدها بلحظات
سمعت اصوات واحد يكول
.... ذب السلاح
ويعيد بالكلام ويكول
دنكلك ذب السلاح
يتبع ....
#الكاتبه #روجمان
