#حياتي_الضائعة ج9
#قصةحرمان
..
اللي صار بهاليومين غير مجرى حياتي كليا'
چنت متوهمه أني حبيته لأكرم طلعت غلطانه مچان حب چان مجرد رغبه وردت منفذ للخلاص من محمد
هسه تغير كلشي تغيرت افكاري ومشاعري ..
أحمد عوضني عن حرماني وگف وياي وساندني وصار أبو لبناتي
شگد چان يحبها لنرجس ومتعلق بيها بس مال يتبرع بالدم الها وتصير جزء من روحه خلاني احترمه واقدره اكثر من قبل
...
طلعت نرجس من المستشفى أمي اخذتلها اجازة مرضيه من المدرسه علما تتعافى وحياتنا بالبيت صارت كلش حلوة أحمد ملى البيت بالحنان والعطف وحتى رواء تعلقت بي چنت أحس بنفسي طايرة ومرتاحه بشكل مينوصف
كل اللي تمنيته عائله بيها حب وتعاون وضحكه مسموعه وربي عوضني بأحمد وبناتي اللي همه قطعه من گلبي ..
بعد أيام
نرجس رجعت للمدرسة وصحتها كلش زينه وأحمد انشغل بالامتحانات چانت نص السنه بوكتها وشته بارده
اني مكضيتها بين بيت اهلي وشغل البيت ومرات اروح للسوگ
وبيوم مرت ماجد أخوي اجتني للبيت وفاتحتني بموضوع زواج اخوها مطلگ مرته وعده بنيه ع اساس نجتمع والبنات يعيشن سوه واني بعدني حلوة وصغيرة وملت راسي بالحجي ..
بقيت محتارة
مااكدر ارتبط بعد وخاصه بعدني على ذمة محمد وأحمد شلون اعوفه !
كلش شغلتني هالسالفه وكمت افكر ونفسيتي تعبت
بليل دا أغسل مواعين وتفكيري چان مشتت وكع ماعون من ايدي ع كف رجلي انجرحت وبقى الدم يطلع هواي نرجس ركضت شافتني خافت
كتلها ماكو شئ حبيبتي هذا معجون احمر ماصدكت شردت
كعدت بالكاع ولفيت رجلي بمنشف انملى دم
حسيت بدوخه
أحمد دخل للمطبخ بعد ماصاحته نرجس ركض سحب رجلي وتچاني ع الحايط خلى رجلي بحضنه وضغط ع الجرح انگطع الدم
عيوني غوشت بس ابتسمت لأن فرحت من شفت لهفة أحمد وخوفه عليه
كلي سلامات يغاليه ماكو شئ
الله ...
اجت كلماته ترس اذني وطابت كل جروحي ..
طلب مني الزم ركبته وفعلا حضنته وگع حجابي جنت لابسه دشداشه بنفسجي ردن وطويله بس تتدمرت دم من رجلي
لفيت ايديه اثنينهم ع ركبته وغمضت حسيت بي شالني لغرفتي
نفسّه شگد حلو ودافي ..
نرجس ورواء يصفگون وسمعتهن يكولن عمو شال ماما ويضحكن
خلاني ع الچربايه ومدد رجليه جاب شاش لف الجرح ورفع دشداشتي لزمت ايده
أحمد اني أبدل فدوة لعمرك ما قصرت
حسيته تفشل دنگ
براحتج ردت اساعدج
دار وجهه
إذا تحتاجين شئ بس صيحيني اجي ركض زين
أخذ البنات وطلع بس بقى الباب مردود
نزعت الدشداشه وخليتها ع جهه بقيت بالاتك ولفيت نفسي ببطانيه
فتحت شعري وتمددت
فكري راح يم ريحته ..
شگد طيبه ..
جسمه الدافي ..أنفاسه ..
لحيته رغم خفيفه بس شگد بيها رجوله ..
ماادري شگد مرت ساعات بس غفيت فزيت تالي الليل الوقت جان بال 2
نزلت من الچربايه طلعت دشداشه جديدة لبستها وطلعت اشوف البنات مالهم حس
رحت لغرفة أحمد شفتهم نايمين مثل الملائكه وأحمد حاضنهم اثنينهم
تمنيت عندي كاميرا بهالحظه واصورهم شكلهم يجنن
رديت الباب ورجعت للمطبخ لگيته نظيف ومرتب حتى المواعين غاسلهم
شلون تاليها كل يوم أحس بنفسي اتعلق بي اكثر
مااگدر أعيش بدونه لو مااتخيل بناتي يربن بحضن الغريب
شسوي هسه !
لازم ارفض كل واحد يتقدملي ماريد اعوف أحمد ..
ثاني يوم كعدت من وكت علمود امتحانات احمد ونرجس حضرت الريوك
أحمد گلي صباح الخير
أخذت نفس ورديت صباح الخير والعافيه عليك يغالي
رفع حواجبه مستغرب تريگ وطلع واحس بنفسي اريد اركض وراه واشبگه واشمه ..
بدلت لنرجس تروح وي بنات أخوتي للمدرسة واخذت رواء ورحت لبيت اهلي
نسوان اخوتي موجودات واخواني يطلعون للشغل وجهالهم مدارس
أمي رادت تطلع للسوگ كتلها يمه اريدج بشغله لاتروحين
كعدنه بالغرفه ومرت ماجد عرفت علمود أخوها گعدت يمنه وبقت تقنع بأمي
ظلن ينگن براسي ومحد يفيدچ ومنو لبناتچ والمرة ميصير تبقى بلارجال
كتلهم مستحيل بناتي يكعدن بحضن رجال غريب وأحمد موجود
أمي كالت يمه أحمد بس يكمل دراسته مصيره يتزوج مو يظل مكابل بناتچ
ياريت لو ذبحتني ولاحجت هالحچي
جسمي صار نار ..
مااتخيل أحمد يجيب مره غريبه بالبيت واني اسمعها واشوفها يمه أموت ..
گلبي وجعني
تعاركت وياهن بدون ماانتبه لنفسي صرت عصبيه وكتلهم محد يجيب طاري الزواج كدامي ومستحيل اوافق
اخذت رواء وطلعت واعصابي منهارة كلش
دخلت لبيتي انفجرت بالبجي
ظليت ادّعيّ ع محمد
الله ينتقم منك لو ميت ومخلصني من طاريك وسجنك
علگت التلفزيون وعليت الصوت لرواء تلتهي ودخلت لغرفتي شبعت بجي
عيوني انتفخت حتى مالي واهس اطبخ غده
محسيت بالوقت شفت قريب جيت نرجس وأحمد من الامتحان كمت غسلت وجهي وطلعت بتيته وطماطه گشرتهم وگليتها كملت حضرت الاكل ورجعت لغرفتي
مالي نفس لكلشي
سمعت صوت أحمد بالمطبخ لأن غرفتي قريبه منه
كملوا غده وبقن البنات بالصاله ع التلفزيون
أحمد دگ باب غرفتي وتنحنح ..
عدلت نفسي ولفيت الحجاب
گوة حجيت بصوت مخنوگ تفضل ..
اليوم مامنتظرتني ع الغده ليش ؟
سكتت مارديت شگله اني بلا أكل ومالي نفس حتى للحچي !
تقرب مني گعد بصفي ..
طلع كبسول انطاني وكلاص مي
اخذي هالعلاج الجرح اللي برجلچ خاف يلتهب
لزم أيدي بس لاصخنتي !
شبيهن عيونچ ؟
رنا .. شكو شبيچ !!
أخذت نفس تحسرت حييل ودموعي نزلت
عيونه لمعت وتأثر واستغرب ..
اقترب مني وحجه بصوت ناصي
شبيچ يغاليه ..!!
مسحت دموعي بحجابي
.. أحمد ...
اخو مرت ماجد يريد يخطبني
بعدني ماكملت الحچي طفر من مكانه
شنوووو !!
هسه احرگ الدنيا ع رأسه ليش يابه مو ع ذمة زلمه انتي !!
تفاجأت من كلامه اشرتله يگعد
اهده أحمد يازلمه تقصد !!
محمد الجبان اللي ..
اششش لاتكملين
واني مو زلمه كدامچ !!
أحمد مو قصدي
عافني وعيوننه تجدح نار وطلع من الغرفه
ركضت لحكته خفت يروح لمرت ماجد اخوي ويسوي مشكله
راد يطلع من باب البيت جريته من قميصه
يتبع ..
#قصةحرمان
