#حياتي_الضائعة ج11
#قصةحرمان
..
"كلما نظرت إلى عينيك أحببتك من جديد
في عينيك انت' شيء يجدد الحب بيننا في كل مرّة "..
...
استغربوا الجماعه من دخلنه أثنيننه للبيت
أمي لبست عباتها واشرتلي شكو !!
ضحكت ودنگت
أخوي ماجد بغرفته ومجيد كاعد يتغده گعدنه يمهم نسوان إخوتي دخلن جوة
حسيت بأحمد مرتبك وميعرف شلون يفتح الموضوع
إجه ماجد من غرفته
أمي كل شويه تعاين ببوجهي وتأشرلي حست بالشغله
شربنه الچاي وبده ماجد بالحچي
ابو شهاب شلونك بالامتحانات !
أحمد تنحنح ..
الحمد لله خويه ابو نجاح اني جايك بعطيه وفزعه تفزعلي وانته خويي والله شاهد احبكم انته ومجيد واعزكم
الله يعزك أبو شهاب رگبتي الك ..
رجع أحمد يتنحنح ..
مجيد أشر لأمي تأخذني وتطلع
طلعنه بس شنو لزگنه آذاناتنه بالباب
حتى نسمع الحچي ..
خويه ابو نجاح باچر الصبح ننروح المحكمه وتجي ويانه انته ونطلگ رنا من محمد
ماجد استغرب من السالفه
ليش اكو خبر من محمد شصار گول !
خويه أني رايد رنا بالحلال وأني أولى من الغريب وبنات محمد بناتي ميربن بحضن غيري
بقى ماجد محتار واعتقد مااقتنع بالسالفه وگله لأحمد انته بعدك صغير وطالب واصغر منها
اني هنا متحملت ودخلت يمهم
خويه ماجد اني مااگدر وحدي ع المسؤولية وأحمد سبع وگدها لو نسيت وگفته بمرضت نرجس وتبرعلها بالدم
حسيت بأحمد تشجع من دخلت
كمل كلامي وكال بناتچ ربن بحضني من الصغر وتعلقت بيهن ومااكدر ع فراگهن ..
كلمه منه وكلمه مني وهو بقى يلح ومتمسك بيه چان كلش كدامهم
أمي هم دخلت وگالت الهم يمه أحمد رجال ومو صغير واختكم حلوة وشابه شلون تعيش وياه بنفس البيت بدون زواج والناس مترحم
عاد لهنا افتهمو السالفه بأسلوب امي
أخذت نفس قوي وفرحت
عاشت ايدج يايمه فضيت النزاع
المهم ..
بعد هالجلسه والنقاش اتفقنه الصبح نطلع للمحكمه ونبدي اول مرة بسالفه الطلاگ والباقي ع الله
أمي هلهلت وفرحتلنه واخوتي هم حسيت بيهم تغيرت نظرتهم للموضوع بقن نسوانهم ميتات من القهر ومرته لماجد كامت تشمر بالحچي
من هذا رفضتي أخوي .. اثاري مخليه أحمد جوة أبطچ ..
سكتت عنها ومارديت متهمني المهم الله رحم بحالي وأحمد رجال سبع وماكو مثله بالدنيا يكفيني بناتي متعلقات بي وهو هم يحبهم
بقينه عد أهلي سولفنه واتفقنه ع الموضوع واخوتي كالوا رنا بعد متعيش وياك بنفس البيت بعد ميصير الا تعقدون وتصير حلالك
هاي مجانت بالبال صدگ ولافكرنه بيها انقهرنه أني وأحمد
كتلهم عاد بس بليل لأن غراضي والبنات هناك شلون واحنا مو مراهقين ومن هالحچي لحد ماقنعو وشرط أمي تبات ويانه ونجاح هم يبقى عدنه من المحل ويبات وي أحمد بغرفته
تالي اتفقنه الحمد لله ورجعنه والفرحه مالامتنه
بيومها طبخت عشه مميز سويت كبة ودجاج اني وأمي وكل شويه اشبگ امي وابوسها صدگ فرحت وأمي هم كالت يمه والله أحمد خوش ولد والحمد لله ماوافقتي ع اخوها للبومه مرت ماجد
تعشينه وأحمد عيوننه تلمع وبس يحصل مجال يغمزلي لو يبوسني بالهوة
ونضحك ونتشاقه ..
يالله ..
ديم الفرحه عليه دخيلك ..
ماادري ليش متشائمه وخايفه .. گلبي مقبوض وحاسه محمد بعده عدل ويرجع وترجع مصايبه الصبح لكيت أمي مسويه ريوگ ومستبشرة وتهلي بينا وفرحانه كلش ..
صدگ چان يوم مميز
تحضرنه بس نرجس بقت يم نجاح بالمحل واخوتي وامي رحنا سوه بسيارة ماجد للمحكمه وأحمد گال ابقن انتن بالسيارة نشوف الوضع وبعدين تجن
دخلوا وبقيت أحچي لأمي عن سوالف محمد وشگد فرق من السمه للأرض بيننه وبين أحمد اصلا أحمد ملاك وماكو مثله
بس خايفه .. بداخلي عصرة وخوف من المستقبل ..
أمي چانت كلش متفائله وتهديّ بيه وتكلي بلكي والله ومن أحمد تجيبين الاولاد وتعيشين بجالهم وظلت تبني آمال ..
بعد اكثر من ساعه رجعوا مدنگين وفشلانيين ووجوههم تعبانه
ماقبلوا يحجون شئ
أمي بقت تلج وتلح .. تالي أحمد گال لازم ترجعون للبيت هاي السالفة مو بهالسهولة طلعت
واحد يدزنه ع الخ ويردون شهاده وفاة الوالده وحضور خواتي من البصرة وتقارير القضيه من الشرطه ومعامله من دائرة النفوس وطلعت شلغه صعبه بيها مراجعه لأكثر من دائرة بالدوله ..
صدگ طلع ضني بمحله وخوفي من الفرحه ماتتدوم ونعصر گلبي وحسيت بآمالي انگطعت وأحلامي تهدمت ..
بقيت الطريق كله ساكته مااعرف شگول بعد اللي سمعته
رجعنه لبيت اهلي نسوان اخوي صبن الغده ماتغديت لا اني ولا أحمد
بقه الكل صافن علينه
حسيت بأحمد اتفشل والشغله صعبه ومنعرفلها والعطله هاي 15 يوم ويرجع أحمد ينشغل بالدوام والدراسه
أمي كالت يمه لاتأيسون انشوف مومن (شيخ) يطلگ منا وأحمد يعقد عليها منا
وسالفه الحكومه واسطات وعرف شوكت مادبرت خل تدبر
بقينه صافنين ع حجايتها لأمي
طفرت من مكاني وشبكتها وتبوس
صاحت ولچ خايبه تخبلتي !
بقوا يضحكون عليه
أحمد گال اني اكول اروح للبصرة اجيب خواتي اثنينهم يشهدن وياي وماجد يروح للشرطه يسأل ع معامله طلاگ لاخته شلون بحجه تريد تتزوج
وبعدين نشوف شيخ يعقد ..
تنحنح واشرلي وانتي رنا ديري بالج ع نفسچ وع البنات مااتاخر ان شاء اللة زين گام وودعنه وطلع اخوتي لحكوا لبرة گلبي انعصر شلون يروح البصرة وخاف يتأخر عليه
بدون ما حس لبست العباه وركضت وراه اخوتي صاحوا وراي ماحسيت بيهم
مشيت ورة أحمد دخل لبيتنه دخلت وراه حس بيه التفت شمرت روحي بين ذراعه وع صدره شهگت شبگني وتحسر
حبيبتي ..يغاليه ..
أصبري لازم شغلتنه تصير قانونيه ومحمد بأي وقت يطلع وسالفه الشيخ متمشي ع الدوله
أحمد فدوه لا تروح للبصرة
ضحك وجر آذاني ..ولج شكو بالبصرة غير اجيب خواتي
رجعت شبگته حييل كل قوتي
حسيته ارتبك بقى يشم بيه وباسني رأسي
رنا فدوة لاتسوين هيچ اخوتج ع ساعه يجون وشيخلصني منهم ويشوفونه بهالمنظر ونجاح بالمحل فدوة اروحلج
أحمد ماريد تروح گلبي مقبوض والله
ابقى هنا ونعقد مؤمن ومحمد حتى لو يجي نتصرف مو من حقه يرجعني
شفته ضاج وبقى يتأفف ..
رنا فدوة هالسوالف متصير هيچ لوتدرين اليوم بالمحمكه واحد يدزنه ع الخ ومحد انطانه حجايه مضبوطه ولاتنسين السالفه بيها جريمه ..
شفته مصرّ ومابيها مجال دخلت لغرفته وجمعت ملابسه بجنطه وگلبي معصور عليه وهو اخذ مستمسكاته وفلوس وخليتله اكل بالطريق لان مسافه بعيده وطلع لزمت متنه و رجعت شبگته گلي ..
تالي وياچ ..
يالله شگد دافي جسمه ونفسّه شگد ارتاح من اشمّه ..
لزم خدودي رناوي من ارجع اريد اشوفج عروس زين
أخذي فلوس من المحل وروحي لصالون واشتري ملابس جديدة زين رنا حبيبتي راد يبوسني بس اجت أمي واخواني وعمي اخو ابوي هم افتهم بالسالفه واجه
بقت حسرة ابوسه قبل لا يروح
اتفقوا بينهم شيسوون برة بالطارمه
واني دخلت جوة ودموعي تصب وخايفه ..
...
يتبع ..
،#قصةحرمان
