#حياتي_الضائعة ج5
#قصةحرمان
..
بقيت ساعات وي أكرم بالسيارة وتعاتبنه وتراضينه بطريقه العشاگ شگد چنت احلم بهاللحضات وهو چان مشتاقلي كلش وملهوف عليه بجنون ماحسيت بالوقت وماخفت وأني يمه بالعكس حسيت بأمان ورومانسيه ماعشتها بحياتي ولا عمري راح أعيشها
اتفقنه نتلاكه دائما بس نحذر وبسريه علما نشوف شلون نتصرف وشلون اصير حرة من محمد ونتزوج
وصلني قريب البيت وراح واخذ گلبي وياه
لكيت عمتي بالباب ونزلت عليه اهاين وين جنتي ووين رحتي هدت عليه شتايم خفت تحيل محمد عليه
كتلها رواء تخربطت وحولوني ع العنايه المركزة وماسكتت ولا هدأت گوه عافتني
كملت شغل البيت وبقيت افكر بطريقه افاتح بيها محمد حتى ننفصل ميهمني اذا أكرم ميگدر يعوف مرته المهم اني اصير حرة واعيش وياه بالحلال
بقيت كم يوم الوج ومامرتاحه وماعرف شلون افتح الموضوع احس لساني معقود
مرت الايام محمد تأخر بالشغل وكهرباء ماكو بس تصير ظلمه الدنيا اقفل البيبان وابقى ع الفانوس بغرفتي ونرجس مزعجه وتبجي هواي غفيت شويه سمعت الباب تكسر ركضت فتحتها چان محمد مبهذل گلي بدلي ولمي غراضج بسرعه اوديج لاهلج شكله متوتر چان وخايف ماقبل يحجي شصار وشكو ..
الجو بارد بشهر شباط چننه اخذت بطانيه لفيت رواء ومن الهبطه بس ارجف
صعدنه بتكسي وصلني بشارع اهلي وراح بنفس التكسي ونرجس كوة تمشي وصلت لبيت اهلي تفاجأ الكل ماعرفت شكول امي خذت البنات مني وابوي واخوي الجبير طلعوا ع محمد يدورون
الكل قلق ماعرفنه شبي محمد واني ببالي بس أكرم بوكتها وبداخلي اكول بلكي الله سببلي معجزة حتى اخلص من محمد واصير حرة
للصبح بقيت عد أهلي وجنت قلقه ع الموضوع ابوي كال خل نروح لأم محمد ونفتهم السالفة
امي راحت وياهم وللظهر يالله رجعوا يكولون ام محمد ناصبه مناحه وتلطم وتكول راح ابني طيرته ام كصت الفگر
مانقهرت منها بكد ما خفت أكرم يكون اله يد بالموضوع
مرن يومين واني خايفه من دگة الباب اجوا ضباط وشرطه وحققوا ويانه كلنه واخذوا اخوتي وابوي للمركز واخذوا مستمسكاتي ومفاتيح بيت محمد وراحوا
لمدة أسبوع مااعرف شنو الموضوع لحد ماتبين ان محمد متلاغي وي كم واحد ومتضارب وياهم وواحد منهم ميت وهسه منهزم وميندلوا وين
كلش خفت وشلت هم لبناتي ومصرفهم مااعرف محمد وين مخلي فلوسه حتى اتصرف بيهم
وماخلصت من أم محمد تنگ وتهد عليه بين فترة وفترة
ورة اسبوعين رجعت لبيتي الصبح كلت الملم غراضي واشوف أكرم شو مابين معقولة ماعرف بالسالفه !
بقيّت بناتي يم أمي ورحت وي اخوي لكيت البيت مگلوب وهوسه
جمعت غراضي الضروريه
اخوي راح يجيب سيارة انتهزت الفرصه وركضت لبيت اكرم
طلعت أمه وجانت نظراتها قاسيه وكلامها جارح هدت ببوجهي وبقت تتدّعي عليه كالت عوفي الولد بحاله يهجامت البيوت
وفشلتني رجعت مكسورة ومتفشله
ببالي چان اشوفه لأكرم اشتاقيتله ولازم يعرف بالاحداث الصارت من جانبنه ومصلحتنه اني وياه ..
جمعت غراضي بالسيارة ورجعت لبيت اهلي وخاطري مكسور ومااعرف شسوي ماعرف شنو مصيري بعد هالأحداث
بناتي يكبرن كبال عيني واني بحمه اخوتي وابوي وكلام الناس ميرحم ..
ورة شهرين من السالفه فد يوم سمعت
هوسه بباب بيتنا وزلم عرفت بعدين ذوله يقربون لجماعة الولد المقتول ويسألون على محمد خفت يتعادون لاخوتي لو بناتي وخفت اكثر من كالو يردون فصل انرعبت
بليل رحنا لمركز الشرطه وقدمنه بلاغ ضدهم والضابط وعدنه يحقق ويحميني اني وبناتي على ما يعرفون محمد وين
مرت الايام تمرضت ام محمد ع ابنها ضربتها جلطه وصارت مقعده بالكرسي واحمد چان بصف سادس ابتدائي وميكدر يداريها سمعت انها طلبت أجي اعيش وياهه واداريها بحجه متكدر ع فراگ نرجس اني هم ماقصرت اخذت قسم من غراضي وغراض البنات ورحت عشت وياها بس مادخلت الشارع انعادت ذكريات أكرم معقولة نساني وين كلامه ووعوده إلي وذاك الحب !
دخلت لبيت عمتي وشفتها ذليله وحالتها حاله وين راح التسلط العدها صدگ المرض يذل الأنسان ومنا فقده لمحمد هدّ حيلها
انتظرت أحمد من إجه من المدرسه اهتم بنرجس ورواء فرح من شافهم واني اخذت ام محمد للحمام سبحتها وبدلتلها چانت تعاينلي بكسر وهضم ولفيتها ببطانيه وطلعتها للغرفه نيمتها وسويتلها شوربه وانطيتها علاجها
وبعدين لزمت البيت كله غسل ومسح وتنظيف لحد ما صار يلمع
وأحمد ساعدني بالبنات شفتها فرصه اسأله عن بيت أكرم
أحمد .. شخبار الجيران والمنطقه !!
ماكو شئ جديد العالم كامت تخاف من عدنه من ورة مكسورة محمد وطلابته
وياريت مسلم نفسه ومنسجن ارحم من نظرات الناس اللي تحتقرنه والشرطه رايحه راده بسببه
وهذا انهزم الجبان
اوووف لادير بال يا عيني باجر تكبر وتنجح وتصير فد شي وترفع راسنه
شفته فرح بكلامي ..
تنحنحت شويه مااعرف شلون اسأل عن بيت أكرم ..
أحمد .. بيت ام أكرم شخبارهم !
ذوله صارلهم شهر مختفين قفلوا البيت وطلعوا ومحد يعرف وين يمكن راحوا للعمارة
شنوو !!
يتبع ..
#قصةحرمان
