#حياتي_الضائعة ج 6
#قصةحرمان
...
بالتسعينات چانت وسائل النقل بسيطه واكو صعوبة بالتنقل بين المحافظات واحنا بالحله بمنطقه قريبه للجنوب ومو هالكد اندل بالأماكن ولا طالعه من محافظتي ابد ..
انصدمت من عرفت بعائلة أكرم اختفت
ليش هيج بدون مايودعني ولا ينطي خبر !
ماادري تندمت بلحظات لأن سلمته نفسي وصدكت بي
الحمد لله لهنا وانتهى كلشي وماصار شي بيننا بس ع الخفيف وراح ومانفذ وعوده
لو أمه اللي هانتني آخر مرة
واكيد زوجته وابنه اهم مني
بقت ببالي أفكار ووساوس ومگدرت انساه
كل يوم اكول بلكي يرجع ومرات افكر باختفاءه اله علاقه باختفاء محمد اللي حتى الشرطه ماعرفت وين !
بعدها استقريت تقريبا ببيت عمتي وماقصرت بحقها ولاتذمرت حتى بناتها اثنين عدها متزوجات بالبصرة اجن زارنها ورجعن بنفس اليوم ووصني عليها وراحن وبيت محمد عرضناه للبيع لأن بقى فارغ
مرت شهور وحالت ام محمد من أسوء لاسوء تحنّ وتونّ ع محمد لحد ماماتت وارتاحت وريحتني لأن كلش تعذبت بمداراتها ومكدرت اعترض لو اتذمر منها
بعد الفاتحه كلفت ابوي واخوتي يشوفون احد يشتري البيتين وننتقل ببيت جديد يم اهلي قريب وبناتي يمهم اكثر أمان واحمد مااعترض وفعلا بعناهم وصفينه الحلال والبنات اجن اخذن حصصهن وراحن واشترينه بيت صغير قريب ع اهلي واستقرينه هناك والفلوس الزادت اشترينه اثاث جديد وصبغنه البيت وفتحنه محل صغير من البيت نعيش منه بي غذائية وشغلات بسيطه طورنا شويه شويه يفتحّ بي احمد من يجي من المدرسه وبالعطل يگعد بي وابن اخويه ماجد نجاح الجبير هم يعاوننه بالمحل
مدرسة أحمد قريبه صارت نجح للمتوسطه وكام يكبر گدام عيني وملامحه بدت تبين اكثر صار يشبه محمد تقريبا بس اضعف واطول ونرجس جانت متعلقه بي كلش لدرجه متنام الا بحضنه
من بعد اهلي ماعدي أحد بالدنيا غير بناتي وأحمد صار جزء مهم بحياتي وحاولت بگد مااگدر اوفرله الحنان والعطف اللي ماشافه من أحد وجنت اهتم بكل تفاصيله وأكله وغرفته دائما نظيفه ومتعطرة وملابسه مكويه ونظيفه وبمرور الايام بقت سالفه محمد مجهولة والشرطه سكتت عن السالفه بس اني ماگدرت انسى بقيت ادور بغراض محمد واوراقه وأسأل دائما عن جماعته من اروح للمركز الصحي اتعمد أمر من مكان شغل محمد اكول بلكي احصل خيط يوصلني اله لو اعرف وين اختفى ..
مرت الايام وابوي تمرض ورة شهر مات وجانت صدمه اللي وللكل اكيد بس حسيت بحيلي انهد وافقدت سند اللي ماعدي احد بعده وأحمد صغير چان وأمي بقت مكسورة خاطر واخواني ملتهين بجهالهم ونسوانهم
مرت شهور وبناتي يكبرن گدام عيني واني هم اشوف نفسي كبرت اكبر من عمري بسبب التفكير والخوف من اللي جايني وضاملي الوكت نسيت انوثتي ورغبتي كامراءة نسيت أكرم واندعيتله الله يوفقه وي زوجته وينساني
چنت مبهذله نفسي حتى شعري كصيته وانهلس من الحجاب وضعفت والنحول ملى جسمي واني بعدني بعمر ال 17 صرت
بيوم رجعت من السوگ الصبح شفت جماعه شباب واكفين بالمحل شكلهم مو من المنطقه استغربت وواحد منهم بقى يعاين عليه بحقد من فوگ ليجوة خفت منه لفت انتباهي عيونه كبار وحواجبه معقوده ونظراته غريبه
دخلت للبيت الباب صايرة من غير جهه وافتريت من جوه من جهة المحل اكو شباك ع الطارمه يطل بقيت اتصنت خفت لاتكون واحده من طلايب محمد وظلت ورانه ونبتلي
بناتي مرات عد أمي يبقن ومرات نرجس تبقى وي أحمد بالمحل متعلقه بي كلش
تصنتت بس مافتهمت منهم شي
بقيت الوج ..
لازم اعرف شنو الموضوع !
رجعت لبست عباتي ارد اطلع من الباب إجه أحمد انردمت بي ضحك
آني خايفه وقلقه صحت بي
ولك شو تضحك شكو منو هذول الزلم !
ماكو شئ رنا هاي شبيج جماعه متيهين من الرمادي جايين ع ناس واشتروا مني شوفي
طلع فلوس من جيبه شوفي الله رزقنا شكد اشتروا لو هيج الشرايه لو متنراد
صارلنه شكد مكدسين جاي وشكر وجكاير اشتروا بالجمله
اخذت نفس شوي ولو بعدني قلقه وممرتاحه
أحمد فدوه اروحلك لخاطري دير بالك ولاتسولف بسالفه محمد وسوي روحك متعرفه زين !
هاي شبيچ رنا شجاب طاري محمد هسه !
هااا .. لا هيج بس كون تحذر فدوة
ولو ماريد هالسالفه ترجع ببالج بس ميخالف احذر
شطابخه ع الغده جوعان
ياا عزة ..
شبيچ !!
نسيت اللحم والمسواك ع الميز انشدهت بذولي الزلم هسه ركض اسويلك باميه ع عظام اللي تحبها
بسته بالهوة وغمزلته ضحك وراح للمحل فدوة لطوله شكد أحبه لأحمد صار كلشي بحياتي وسندي بالدنيا
ركضت للمطبخ حضرت الغده بسرعه وجهزته تغدينه سوة وعيوني بدون مااحس تتأمل ببوجه أحمد ماعرف شيجيني من احساس بس ارتاح نفسيا وأحس بأمان ...
يتبع ..
#قصةحرمان
