#قصة #حلا
#
بعدها ثكلت عيوني وجسمي دخت وبديت افقد الوعي افتح عيوني احس منير شالني وخلاني بتابوت وسدة عليه
وبدت الدنيا تتحرك بيه .. اختنكت ....
....
فتحت عيوني لكيت نفسي بمكان خرابه يعني بيت قديم مهجور وحلكي مسدود بقطعة قماش واديه مربوطه علئ ضهري
حاولت افتح ايديه مكدرت تعبانه وجسمي مو الي احسه
ضليت دايخه .. بعد ربع ساعه فتح منير الباب ودخل
كلي ها صحيتي .. لتخافين عن قريب رح اخلص منج واخلصج
فتح حلكي .. كتله منير ليش هيجي تسوي علئ شنو ناوي
كال رح ابيعج الواحد واذا سألو عليج بلبيت اكلهم شردت ويه واحد
وانتي ترتاحين واحنه نرتاح ... صرخت عليه خاف الله منير اني عرضك وبجيت كال اش لا عرضي ولا شي
اني محتاج فلوس وانتي زيادة علينه .. تريدين تروحين
تزوجين وتعيشين بنعيم واحنه لا مو ... تفلت بوجهه وضربني وسد حلكي .. كال خليج هيج مثل الجلب لااكل ولاشرب
ضليت ابجي وادعي ربي يخلصني .. اوووف احس روحي رح تطلع
ورا يوم هم اجه منير يشوفني ... وهو واكف يمي دك تلفونه وجاوب كله لا هسه خابرت واتاكدت من هلشي هلساقطة سوتها وشردت ..يلا اجيكم ونحجي سد تلفونه كعد كبالي
كال تعرفين منو هذا الي اتصل .؟؟ معرفتي موو
هذا حبيبج سامر .. متخبل عليج ويدور .. بس هسه انصدم بيج وقنعته انج متحبي وشردتي ويه واحد غيرة
فتح ايديه وشمر مي بصفي وطلع وقفل الباب
اني ابجي واصرخ ومحد يسمع .. كلت اكيد سامر اتاكد
لان اني كتله مااعرف شنو مشاعري اتجاهك
بهاي الاوقات سامر بلغ الشرطة يدورون بدون ميحسون اهلي
وامي تدعي عليه وتتبرا مني وتكول هيه مجرد خدامه جبناها خلي تولي الله ليوفقها جابتلنا العار
سامر راح الامي وكلها اني انخدعت بحلا ورايد رنا
وامي طارت من الفرح هيه ورنا ومنير فرح من كلبه
وبدا يقوي علاقته بمنير ويحاول يعزمه ومنير يكله عندي شغل هليومين بس اخلص منه اطلع وياك وين متريد
كله ماشي سلم سامر وراح منير طلع اجر تكسي
واجاني كال يلة حضري نفسج وشد حلكي واديه واني ادفع بي بس مااكدر اقاوم لان مماكله ولا شاربه والمخدر جان قوي وجسمي ضعف حيل
دك تلفون منير كله تعال جاهزة ... فد ربع ساعه اجه رجال وسلم علئ منير انطا فلوس .. وبدا يجرني من اديه واني
ادفع بي بس جان ضخم كلش ... ومنير يكلي بيباي ويضحك
طلع خلاني بصندوق السيارة ديسدة عليه جان تجي ضربه علئ راسه
اوف ربي شكد فرحت بوكتها لمن شفت سامر بدا يضرب بي بوكسات ودفرات وهو ضرب سامر علئ خشمه بوكس ونزف
وجان جايب الشرطه ويا لزمو منير والرجال
طلعني سامر وفتح حلكي واديه وحضني وانفجر بلبجي
حضني لدرجه حسيت ضلوعي رح تتكسر بين اديه
وبدا يصيح حلا اموت من دونج والله لتعوفيني وحضنته وبجيت ويا
اخذني البيتهم شافتني امه بهلحاله وشافت سامر ينزف خشمه
تخبلت واجت تركض علينه كالت شبيكم وين لكيتها يمه سامر
كلها يمه اني احجيلج كل شي بس هسه المهم حلا اريدها ترتاح
امه اجت حضنتني وباستني وصاحت هدئ يمه تعالي بساع
اجت هدئ تركض كالت هاي شكوو ؟؟ كلها سامر هدئ اخذي حلا ترتاح واني احجيلكم كالتله امرك
واخذتني كبل للحمام سبحتني وبدلتلي وجابتلي الاكل
وانطتني مسكن الم ونمت
سامر حجالهم كل شي وحجه شلون خطط حتئ يكسب منير
واهلي واكتشف انو اهلي ماعدهم علم ب الي سوا منير
كعدت ماادري بيش ساعه دايخه .. نزلت لكيتهم كاعدين سامر واهله كلولي هلا تعالي ... كعدت وياهم كلي حلا شلون صرتي كتله زينه .. كالت امه يمعودة كل شويه ويدخل للغرفه يباوعلج ويطلع ممصدك لكاج اني باوعتله وابتسمت
كال والله ماافوتها لمنير النذل .. دخلت امي اتعيط وكلبت البيت ليش هيجي اتسوين ب ابني الله ليوفقج ولايسعدج اليوم موتج علئ ايدي . .. كام سامر وكلهاا اششش
اني بعمري ممجاوز علئ مرة لتجبريني اجاوز عليج
ابنج خطفها ولزمنا لزم الايد جاي يبيعها افتهمتي
ابنج عار وبلا غيرة وشرف وكعدت بلكاع انهارت وتبجي
اني بجيت وياها اجت تتوسل بيه حلا اخوج هذا طلعي
حلا اتنازلي فدوة يمه ... حلا ابوس ايدج
اني كتلها لا يمه كومي الله يخليج هسه اروح واتنازل
بس منير هواي اذاني كالت والله اخلي يسافر بس طلعي
كتلها ماشي صاح سامر حلا كل عقلج تحجين ؟؟؟ كتله اي
كال متتنازلين كتله اترجاك منير خليني اتنازل رح اتصير مشاكل هواي بسبب هلشي .... كال براحتج
اتنازلنا وطلع منير ... كلتلي امي امشي للبيت .. سامر كال
ممنوع ... هذا بيتها وبس وهيه بحمايتي واني مسؤول عنها
كلتله امي شسالفه سامر كلها عمه اترجاج لتناقشين
حتئ ابنج ليدخل سجن مرة ثانيه وميطلع خليها هنا
كالت ماشي وراحت ... كتله سامر شبيك
ماجاوب وصعد الغرفته رحت ورا كتله ليش مجاوبني
يتجاهلني وميجاوب ... كتله احجي .. كال شحجي ؟؟
بساع اتنازلتي ضحكت عليج بدمعتين وانتي السوا بيج مو قليل ... هذا يستاهل السجن باجر يسويها ب اي بنت
كتله .. سامر هاي امي .. كال هاي ام ؟؟
كتله هيه ربتني اني ماانسئ انها جابتني البيتها وكلتني من اكلها كل هلسنين
كال حلا جابتج خدامه افهمي .. كتله سامر جاي تجرحني بهلكلام ... كال اها مني تنجرحين ومنهم لا
كتله اتعودت علئ جروحهم اني اعتبرتهم اهلي لان هذا جان حلمي الوحيد .. اترجاك عوفني علئ هذا الاعتبار
كال غبيه والله بس احبج ... كتله اني هم .. كال شنو انتي هم
سكتت كال ها شو سكتي شبيج متكوليها
ضحكت وهو وجهه معصب كال كوليها ... كتله ... احبك
رجعت الضحكه الوجهه لزم ايدي وباسها
كال يلا انزلي اتعشي ... نزلنا اتعشينا .. كال سامر تعالي ادليج علئ غرفتج .. طبيت للغرفه اتجنن وجبيرة
اتفاجئت من جمالها وترتيبها كلي ها شلونها كتله تشبهني ضحك كلي صرتي مغرورة بسببي
كتله صوجك كال يلا نامي وجبتلج تلفونج ذاك ع الشحن كتله اوكي راد يطلع كتله سامر ... كلي عيونه
كتله شكرا ... كال انجبي وراح
هههههه مجنون احبه الله جابه منقذ ... افتر بلغرفة
واباوع لوحات معلكه فجأة دك الموبايل رديت كلي ها حلا
عبالج نفسج خلصتي كتله منو انت كال رح تعرفين باجر
وسد اني كلبي راح من الخوف وارتعبت كلت معقوله منير جاي يهددني .. مااكدر اكول لسامر يروح يتعارك ويا
خليها علئ الله وضليت اتكلب لحد منمت
اجه الصبح بدلت لان هدئ جايبتلي ملابس خطيه بلخزانه
نزلت شافني سامر كلي جاهزة كتله اي تريكنا وطلعنا واحنه بلسيارة دك اغنية حمزة القيسي .. انا اذكرك بلنوم واحسك غافي ب احضاني ... واخاف بنومك انت تشوف غيري واني تنساني
كلي ها شلون صرتي كتله تمام شلونه خشمك كال مابي شي
كتله لا كبران كال ولج تعيبين عليه ام حلك وضحك
كتله شبي حلكي كال يخبل هههههه
دخلنا شافتني دعاء وحضنتني وحجيتلها كل شي
دك تلفون سامر كال حلا اني رايح بشغله مهما يصير لتتحركين من المعهد اني اجي اخذج كتله ماشي
راح حضرت الدرسين وهو ماكو دك موبايلي رديت
كال هاا عبالج مااسويها كتله منو انت احجي
انت منير ضحك كال حبيبج بيدي اني ولا قطرة دم بقت بيه
كتله اترجاك لسوي بي شي ضحك وسد ادك علئ سامر مغلق
.... يتبع
قصص عراقية واقعية
