#نصف البدر✍
🌕 الحلقة 23
فاطمة ما قدرت تتحمل صدمة ولدها الشافته فجأة واقف على رجلينه وصدمة بدور بالعملتو في صحبتها وصدمة أولادها وهم بيخسروا بعض قدامها، جاها هبوط حاد في الدورة الدموية وفجأة انهارت كل قواها ووقعت من طولها، أحمد شال أمو وطلع، بدور جرت وراه لزاها وقفل فيها الباب بالمفتاح بقت تخبت في الباب من جوة.... يا أحمد حرام عليك أفتح الباب ده عايزة أشوف أمي..... رد ليها من ورة الباب ،تحرم عيشتك الحصل لأمي ده كلو بسببك انتي خليك محبوسة في البيت ده زي الكلاب لا من شافك ولا من سمعك ولو أمي حصلت ليها حاجة ما ح أرحمك سامعة ، وجرى بي أمه على أقرب مستشفى
بدر بهناك يادوب وصل الجامعة زي ما اتفق مع بدور واتصل عليها عشان تطلع ليه..... يسعد نهارك يا جمييل.....ردت عليه وهي بتبكي، بدر ألحقني أنا واقعة في مصيبة..... يا ساتر مصيبة شنو انتي وين؟.... أنا في البيت اتشاكلت مع أخوي وأمي وقعت ساقها المستشفى وحبسني في البيت....طيب أنا جايي عليك
يلا أحمد ساق أمه على نفس المستشفى الودى ليها براءةوفي نفس الوقت مشى يتطمن عليها برضو.... كيفك براءةبقيتي كيف؟..... أهلا أحمد بخير الحمد لله انت كيفك؟.... ما كويس والله.... خير مالك؟.... أمي وقعت فجأة واسي راقدة في الانعاش ..... ألف سلامة عليها أنا ح أمشي أتطمن عليها، بدور لييه ما جات معاك؟.... أسمعي يا براءةبدور أختي أنا وأنا البقول ليك أبعدي عنها خالص هي ما بتشبك لا في أخلاقك ولا في أدبك ولا في تصرفاتك.....لييه بتقول لي أبعد عنها بدور عملت شنو؟.... ما ح أقدر أحكي ليك التفاصيل بس صدقيني هي ما بتحب ليك الخير اعتبريها نصيحة من أخ وابعدي عنها.... حاضر يا أحمد ح أخد بنصيحتك
أحمد شكلو اتشد لي براءةوطيبتها واعجب بيها ، قطع حديثهم تلفون من محمد..... وين انت يا زول ليك يومين ما ظاهر من المطار تاني ما شفتك..... أهلا يا محمد أنا في المستشفى والله..... يا ساتر مستشفى شنو تاني ما تكون حصلت ليك حاجة...... لا أنا كويس بس أمي التعبت فجأة وجبناها المستشفى.... لا حولااا سلامتها وريني ياتو مستشفى وانا مسافة الطريق ح أكون عندك
بدر سايق العربية ماشي على بدور مبسووط وبيقول لي نفسه دي فرصتك يا بدر بدور في البيت براها اخوها مخاصمها وامها في المستشفى ومافي زول حيلاحظ غيابها أنا لازم أستغل الفرصة دي، وأخييرا حتقعي في فخي يا بت يا بدور هههههه
أول ما وصل دق جرس الباب، بدور جرت على الباب... مين؟.... أنا بدر يا بدور.... ألحقني يا بدر أنا محبوسة وأمي في المستشفى عايزة اشوفها..... طيب أرجعي ورة أنا ح أكسر الباب
بدر كسر الباب وبدور جرت عليه حضنها وقال ليها.... ما تخافي حبيبتي إنتي ما براك أنا جنبك، بدور عاينت ليه في عيونه مستغربة ...حبيبتك؟.....أيوة حبيبتي وروحي كمان أنا اكتشفت إني بالجد كنت عميان يا بدور عشان ما عاينت ليك من الأول لكن أوعدك من اللحظة دي ما ح أسيبك أبدا..... أنا ما قادرة أصدق عيوني حاسة نفسي بحلم.... لا ده ما حلم وانتي احلى حاجة في واقعي يلا نمشي؟ ..... نمشي وين؟ ..... عشان نشوف ماما ولا ما عايزة تشوفيها.... حضنته وقالت ليه الله يخليك لي يا رب
ركبوا العربية وبقوا يلفوا على المستشفيات بدر ينزل يستنى جوة المستشفى شوية عشان يقنع بدور إنه بيسأل عن أمها ويطلع يقول ليها قالوا ما عندهم، بعد ما مشوا أربعة مستشفيات بدور بدت تفقد الأمل في إنها تشوف امها وبدر بدا يحنكها..... يا ربي إنتي وين يا أمي والحاصل عليك شنو..... ما تخافي حبيبتي ان شاء الله ماما حتكون كويسة وانتي شايفة عملنا العلينا وما لقيناها.... والحل طيب؟..... أنا عندي فكرة حلوة.... فكرة شنو يا بدر.... رايك شنو أوديك تسلمي على أمي وتتعرفي عليها وتقعدي معاها لحدي ما تطلع أمك بدل تقعدي براك.... لا ما ينفع أمك حتقول علي شنو لمن أقابلها بي عباية وانت حتقول ليها شنو؟ ..... يا ستي العباية مالها طالعة زي القمر بالعكس بالعباية حتقول عليك بت مؤدبة ومحترمة بعدين انت ناسية انك حتبقي مرتي يعني ح أقول ليها دي البت الاخترتها من بين كل البنات وعايزة اعرفك عليها بعدين أخطبها .... مرتك؟..... أيوة مرتي يا بدور انتي متخيلة اني بلعب بيك يعني ولا شنو انا نهائي ما من النوع ده اها نمشي؟
حيحصل شنو وبدور حتوافق ولا لا؟؟
