#نصف البدر🌕
الحلقــه الاخيييييييره
♥♥♥♥♥♥♥♥♥
********♥♥♥♥♥♥♥
بعد مرور ثلاثة أشهر....
بدور التزمت واتحجبت،و بقت تلبس محتشم، بتصلي الفرض في وقته ومهتمة بدراستها ومستقبلها، الليلة بالصدفة فتحت الدولاب وقعت علبة الخاتم الاداها ليها مخضرم يوم ميلادها رفعتها وبقت تتذكر كل لحظاتها معاه، لمن كذب عليها عشان يتكلم معاها والورقة المكتوب فيها ( بحبك يا بدور)، ولمن جا يتقدم ليها في البيت، والعيد ميلاد، بقت تبتسم والدموع جارية من عيونها يادوب أدركت قيمته وحبه ليها وندمت شديييد على العملته فيه.
طلعت من البيت ماشة على الجامعة لمحت في الموقف الراجل العجوز الاتكلم معاها أول يوم ليها في الجامعة....إزيك يا عمو متذكرني؟.... أهلا يا بتي ملامحك ما غريبة علي... أنا اسمي بدور وانت نصحتني قبل كدة وانا رديت عليك باسلوب ما كويس.... أيوة أيوة اتذكرتك ما شاء الله تبارك الله بقيتي كيف بعد الحادث؟ أنا كنت قلقان عليك.....تسلم يا رب أنا كويسة الحمد لله وجيت عشان اعتذر ليك وعايزاك تسامحني ، طلعت من شنطتها قروش، إتفضل دي.... يا بتي لمي قروشك عليك أنا ما عايز قروش أنا شفتك بس زي بناتي وحبيت أنصحك بس الحمد لله شكلو الحادث كان لخير ورحمة من ربنا.... فعلا الحمد لله كلو لخير أنا بس عايزاك تسامحني وتدعي لي يا عمو....ما مشكلة يا بتي أنا مسامحك و ربنا يحميك ويبعد عنك أولاد الحرام يا رب.... اللهم اميين تسلم يا عمو ما اتحرم منك، بعد مشت العجوز صفق بيدينه وقال سبحان مغير الأحوال من حال إلى حال.
وصلت الجامعة مشت المكتبة لقت مخضرم قاعد يقرا كالعادة، قعدت في الكرسي القدامه هو أول ما شافها قام.... مخضرم استنى.... نعم خير.... لو سمحت عايزة اتكلم معاك... أعتقد إنه الكلام انتهى من زمان.... أنا عارفة إني غلطت في حقك كتير وبتمنى إنك تسامحني وتعفي لي صدقني أنا اتغيرت يا مخضرم وندمانة شديييد على العملتو فيك، وبقت تبكي وتبكي متأثرة، مخضرم قلبو حن وحس إنها بالجد اتغيرت من شكل لبسها واسلوبها.... طيب أهدي وأقعدي ارتاحي المسامح كريم وأنا سامحتك لله والرسول، بعد هدت شوية... طمني عليك انت اخبارك شنو.... أنا تمام الحمد لله خطوبتي كانت الاسبوع الفات....خطوبتك؟.... أيوة مالك مستغربة، بدور سرحت بعييد وعرفت إنه حلمها وأملها ضاع للمرة التانية..... سرحتي وين؟.... ها؟ لا ما سرحت مبروك وربنا يتم ليك على خير.... الله يبارك فيك يا بدور وعموما بقولها ليك للمرة الثانية لو احتجتي أي مساعدة أنا موجود وح أكون ليك زي أخوك واحد ....تسلم يا مخضرم ويا ريت تسلم على خالتو وتعتذر لي منها وأنا ح أتكلم معاها بنفسي مرة تانية ، مشت منه وهي زعلانة ومحطمة عشان فقدت الإنسان الكان بحبها و بقدرها وبعمل المستحيل عشان يرضيها.
أحمد كان مرة مرة بتصل لي براءة يتطمن عليها وشكلو كدة بدا يحبها ويحاول يتقرب منها،و في نفس الوقت العايز يتصل بمحمد عشان يتقابلوا ويصارحه بمشاعره ناحية براءة، محمد اتصل عليه.... كيفك يا أحمد أنا عايز أقابلك عايزك في موضوع مهم شديد....سبحان الله اسي كنت ح اتصل عليك انا كمان عايزك في موضوع مهم، بعد اتقابلوا.... محمد: اها احكي لي شنو الموضوع المهم، أحمد: لا إنت الضربت أول وحتحكي أول....طيب يا سيدي أنا قررت أخطب وعايزك تساعدني.... بالجد؟ ألف مبروك حبيبي دي منو المحظوظة دي.... متذكر صحبة بدور ديك القابلناها في المستشفى وحكيت لي عنها....براءة؟؟!!.....الله يفتح علييك يلا عجبتني شدييد واستخرت ربنا وقررت أخطبها رايك شنو؟ ، أحمد سرح وقلبو اتقبض والعبرة خنقتو.... اها حتساعدني؟ ..... طبعا يا حبيبي ربنا يتم ليك على خير، حضنه وعيونه مليانة دموع....اها وانت موضوعك شنو؟.... لا ما تشغل بالك ما حاجة تستاهل.... وأنا القلت حتكلمني عن بدور.... بدور؟.... أيوة يا أحمد بدور في النهاية أختك والبني ادم خطاء وكلنا بنغلط بس المهم نتعلم من غلطنا ويغير فينا عشان نبقى أحسن، بدور محتاجة ليك يا أحمد إنتوا ما ليكم غير بعض عشان خاطري سامحها وأمشي رجعها وكفاية زعل ... حاضر يا محمد معاك حق
