ثانوية المراهقين -١-

١

لدينا احلام كبيرة مع اننا نملك القليل...الحياة بالنسبة لنا لون وردي وقد تتعكر بقليل من الاسود...العناد قاسم مشترك بيننا...بداخلنا ضجيج وصخب الام واحزان ولكن من الصعب التعبير عنها...لذلك احيانا نكتفي بالسكوت...او نعبر عنها بتصرفاتنا التي توصف بأنها غير مسؤولة....لا نحسب مع الكبار ولا حتى مع الصغار نحن فئة عمرية مميزة ويطلق علينا لفظ #عمر_الزهور.

■ ثانوية المراهقين ■
          ● الجزء الاول ●
       💕 الفصل الاول 💕
استيقظت على صوت صراخ والديها...خللت شعرها بيدها قبل ان تمط شفتيها المكتنزتين بعدم اكتراث ...فقد اعتادت على شجاراتهما المستمرة ...اخذت هاتفها من الكومودينة المجاورة لها وبدأت بتصفحه...سمعت صوت قدمين متجهة نحو غرفتها..وبسرعة شديدة اغلقت هاتفها قبل ان تدسه تحت وسادتها وادعت انها تغط في نوم عميق.
كان والدها الذي فتح الباب..نظر اليها طويلا قبل ان ينحني ويقبل جبينها قبلة مملوءة بحنو الاباء عدل غطائها ثم اتجه للخارج.
تململت في فراشها وهي تبتسم وما هي الا دقائق حتى استسلمت عيناها للنوم.
صباح اليوم التالي :
اخترقت اشعة الشمس عينيها استيقظت بتكاسل وهي تنظر لوالدتها التي كانت تزيح الستائر بسرعة لدخول الشمس.
دلال ( امها ) : يعني هسه دا كلو نوم ؟
فلة وهي بتفرك عيونها بنعاس : في شنو يعني ؟
دلال : انا  سايقاك معاي الليلة عزومة عند صحبتي
فلة وهي بتستوعب في الكلام : شنو ؟ لا لا لا ما حينفع يا ماما انا الليلة عندي يوم مهم شديد.
دلال : واللي هو ؟
فلة : الليلة في مسابقة مهمة جدا بتاعت سباحة فيها تأهل وكدا.
دلال : خليها المرة الجاية
فلة : يا ماما كيف يعني المرة الجاية...هي دي مرة كل سنة.
دلال بلا مبالاة : خلاص السنة الجاية.
فلة وهي بتقوم من السرير : يا ماما انا اليوم دا مستنياهو من متين ؟
دلال : مش السنة الفاتت شلتي كاس المدرسة...خلاص تاني ما ضروري
فلة : ماما ابوس يدك...اليوم دا مهم شديد..طيب اقول لي كوتش سارة شنو ؟ وصحباتي المعاي كلهم معتمدين علي.
دلال بي صوت حازم : عايني ما تتكلمي كثير حتمشي معاي يعني حتمشي معاي صحباتي كلهم جايين بي بناتهم انا والداك على شنو...ولو جبتي سيرة المسبح دي تاني وقسما بدين الله العظيم امنعك من السباحة وتاني المسبح تشوفيهو في احلامك...امشي سريع جهزي نفسك والبسي الهدوم الجهزتها ليها...وبعديها تعالي اسرح ليك شعرك.
سكتت وهي بتهز راسها قبل ما تدخل الحمام .
يلا تعالو بقا نتعرف على بطلتنا:
فلة عمرها 17 سنة نازلة 3 ثانوي بعد اسبوع...اصحابها بقولو ليها حبشية لانها بتشبة الاثيوبيات الجميلات سمراء...عيونها واسعة...انفها حاد...متوسطة الطول لكن مايلة للطول...شعرها لي نهاية ضهرها...بتعشق السباحة دي هوايتها المفضلة...شخصيتها قوية...بس اكبر عيب فيها انها عصبية ما بتقدر تتحكم في اعصابها ودا كلو بي سبب امها...بتنفس عن غضبها بالجري يعني لو زعلت منك وكتحت تاني ما بتقدر تجري وراها ولا صعاليق الجاهلية زاتم ( ناس ثالث كيف تمام ✋)
لمن تزعل شديد بتتلعثم و بتبدا تتمتم...هي اكبر واحدة وعندها اختين صغار تاني..
ياسمينة ودي عمرها 15 سنة داخلة اولى ثانوي ...ملامحها قريبة لي فلة بس هي لونها افتح ...اقصر منها بشوية...حنعرف شخصيتها في الفصول القادمة.
نرجس دي اخر العنقود...شافعة قليصة وفصيحة وشايفة نفسها اميرة عمرها 8 سنوات.
دلال ( امهم ) امرأة جميلة شديد ومهتمة بنفسها بي طريقة ما طبيعية...بتصمم الفساتين والثياب...متسلطة شديد وبتحب تتحكم في حياة بناتها خصووووصا فلة عايزاها تمشي بي هواها بس وما بتخليها تعمل الهي عاوزاهو ودا السبب المخلي فلة عصبية...بتحب تستعرض بي فلة...ثقتها في نفسها اتقلبت لي غرور...بتحب الطلعات والسفر والعزومات والتسوق...مشغولة دايما مع صحباتها وفي شغلها وما مهتمة بي راجلها عشان كدا بيتشاكلو كثير.
عماد ( ابوهم ) مع انو عمرو اتجاوز الخمسة واربعين الا انو محافظ على شبابو راجل مهندم وملتزم...شغلو كثير شديد وسفرو كثير...بناتو ديل عند بالدنيا وما بيرضا فيهم بس لمن يقوم عليهم بيوريهم الادب 😂.
نرجع لي فلة....
دخلت اتسوكت واخدت ليها دش...طلعت من الحمام وهي بتعاين للساعة كانت 2 ونص ضهر...لقت ياسمينة قاعدة ليها في السرير...اول ماشافتها ضحكت وهي بترجع بي ضهرها لي ورا : الجبرو على الطلعة منو ياناس الجبرو منو ويو ويو ( بكسر الواو 😀)
فلة : ما ناقصة ابو ظرافتك انا 😒.
ياسمينة : انتي يا غبية لاقية الطلعة دي ياريت لو انا كنت في محلك.
قعدت بي زهج في الكرسي : ياريت والله...هسه حامشي هناك حالقا بنات صحباتها المرض ديل والعجب الاسمها مي دي حتشتغل لينا بابا جاب لي الشوز دي من ايتالي وبابا ساقني معاهو دبااااااي ( دبي بي لهجة ناس هناية 👸) الفصتان دا اشتريتو من شانيل وانتي عارفة انا الناس الكدا ديل ما بحبهم...بالاضافة لي انو هز ار حتكون هناك. ( حنتعرف عليها قريب 😉)
ياسمينة : كدي سيبك من دا المسابقة بتاعتك.
فلة بي استسلام : شكلو ماف طريقة 😔
ياسمينة : كوتش سارة ضربت سالتني منك وميرنا برضو قالو مابتردي.
فلة وهي متوجهة على الدولاب : قفلت التلفون...حأعمل شنو يعني غايتو بس الحمدلله😔
ياسمينة : احمدي الله كثير انا موديني مع نرجس قال شنو قال ناس الكشافة مودينهم رحلة...قادرة تتخيلي منظري وسط الشفع ( الدادة دودوي )
فلة بانكسار : الله يكون في عونا بس.
قطعو كلامهم بي صوت امهم وهي بتنده على فلة عشان تجيها...قامت بي سرعة ومشت ليها.
دلال : تعالي اسرح ليك شعرك.
قعدت ليها وبدت تسرح ليها فيهو...طبعا حركات الامهات بتخت ليها الفرشة من نخرتها وبتجرها لي فوق تحس بيها عايزة تسلخها مش تسرح ليها 😂 ( انا طفولتي كلها في الحالة دي...ابكي ولا اصرخ طوالي بي الفرشة في نص راسي واسكت 😂)
موجت ليها اطراف شعرها قبل ما تقسمو على اتنين جزء فوق وجزء تحت...خلت التحت مفكوك والفوق ضفرتو ليها ضفيرة هندية.
قبلتها عليها وبدت ترسم ليها الايلاينر في عيونها ( دي الحسنة الوحيدة فيك يا خالتو 😛)
رجعت لي ورا شوية وهي خاتا يدها في وسطها وبقت بتعاين لي قبل ما تقول ليها : امشي البسي بعد دا.
امها كانت شدة ما مسيطرة عليها حتى هدومها بتخليها تلبس على كيفها و بي مزاجها بس.
لبست فستان زهري انسيابي عليها ومعاهو جكت من الشيفون الابيض لبست حلق لاصق على شكل نجمة وعملت غلوس شفاف...شالت شنطة جلدية صغيرة وختت فيها هدوم السباحة وهي بتقول في نفسها : احتمال تغير رايها منو عارف.
دلال لبست داك يا توب الحرير والدهب ولبست شبط كعبو عالي...والمشية تحلف تقول عارضة ازياء ( وانا مشيتي ولا مشية برعي بتاع الورنيش)
بعد ما جهزو كلهم طلعو دلال قفلت باب الشقة ونزلو...ركبو العربية.
طول الطريق الام شغالة نصايح لي فلة...افردي ضهرك اقعدي قعدة مستقيمة...اتكلمي بهدوء وثقة.. وهي شغالة تهز في راسها بمعني كويس.
نرجس فتحت شنطتها وطلعت دفتر الرسم
نرجس بي حماس : ماما ماما شوفي رثمت شنو
دلال بي عدم اكتراث : ما هسة يا نرجس بعدين بشوفها
نرجس بي انكسار : طيب
نزلوهم في مقر الكشافة...قبل ما يتحركو على بيت صحبة دلال .
نزلو من العربية بعد ما بركنوها...كان في عربات كثيرة...والبوابة مفتوحة...البيت كان عبارة عن فيلا فخمة جدا...بيندخل ليها بي ممر طويل محاط من الجهتين بي حديقة جميلة ومنظمة وعلى جهة الممر قايمة اشجار نخيل دا غير اعمدة الانارة...قدام كدا على جهة الفيلا في كنبات مختوتة وجمبها صفر البوفيه...كانو نسوان كثار ومعاهم بناتهم واي واحدة جاية تستعرض بي نفسها وبتها....فلة بدت تسلم على صحبات امها...انفها اتزكم من ريحة العطور والعود والصندلية...وبدت التعليقات هي ماشاء الله دي بنتك....حلاتا خطبتها لي ولدي...بنتك ماشاء الله سمحة...طبعا دا العايزاهو دلال.
فلة اول ما بعدت شوية منهم مسحت خدودها بيدينها الاتنين من بوسات النسوان...شالت نفس قبل ما تمشي على جهة البنات وسلمت عليهم...كانت ساكتة وما بتتكلم ولا متفاعلة معاهم لانها حست بيهم سطحيات لي درجة المبالغة...وفعلا البت الكانت بتتكلم عنها بدت موالها : بابا قال سايقني معاهو اسبانيا....السلسلة الذهبية دي جابوها لي من داماس...الميكب بتاعي كلو من ماك .
كانت حاسة بي ملل شديد ...سمعت صوت ما بيغباها وهو بقول : نورتي
رفعت راسها ولقتها هزار.
ردت ليها ببرود : بي نورك.
عاينت لي امها وهي بتأشر ليها يعني اقعدي كويس...اتأفأفت وهي بتفرد ضهرها...شوية كدا بدا موضوع الغدا...اي واحدة شالت صحنها وبدت تملا...فلة اكتفت بي سلطة وشوربة ( حوووومارة) قعدت بعيد اكلت شوية وقامت...عاينت للساعة لقتها 4 ونص...كان فاضل نص ساعة بس والمسابقة تبدا...مشت لي امها وهي بتتمنى انو توافق ليها تمشي.
قعدت قريب منها وهمست ليها : ماما اها مش كدا جيت وصحباتك شافوني😀...يلا عليك الله خليني امشي فاضل نص ساعة بس ...والمسبح قريب من هنا.
دلال وهي ضاغطة على اسنانها ومخبية الغيظة دي بي ابتسامة : انا قلت شنو ؟ امشي ارجعي محلك سريعة عندي كلام تاني معاك.
فلة برجاء : ماما عليك الله .
دلال : فلة 😒.
هزت راسها ورجعت محلها...عيونها قلبت حمرا من الزعل واتملت دموع دنقرت راسها عشان ماف زول يشوفها ومسحتهم ( والله لو في محلك اجعر والم الناس كلها )
قعدت في الكنبة وهي بتهز رجلينها بعصبية.
مي : By the way يا فلة انا متحولة مدرستكم السنة دي.
فلة : ت ت تمام والله...ك ك كويس ( بتمتم لمن تزعل)
ما قدرت تستحمل القعدة شالت شنطتها وقامت مشت على جهة الحديقة...لمن اتأكدت انها بعيدة وماف زول حيسمعها ولا يحس بيها رمت الشنطة وصرخت بي عصبية قبل ما تبدا تشلت وتنطط فوق الشنطة  وهي بتقول : انا مالي ومال عزومااااااتك 😠😡😠😡😠😡.
جاها صوت ولد بيتنحنح بي وراها : احم احم
نطرت عيونها 😲رجعت شعرها لي ورا قبل ما تقبل وراها عشان تشوف دا منو.
فلة باندهاش : محمد كروزو ( يلا حنقول ليهو كروزو بس من الليلة )
كروزو : فلة ؟؟؟؟ جابك هنا شنو ؟
فلة : انت الجابك هنا شنو ؟
كروزو وهو بيدخل يدينو في جيبو : دي بيتي.
فلة : يا زول ما تكذب انا بعرف بيتكم.
كروزو : اي ما رحلنا.
فلة وهي بتستوعب : يعنيييييي العزومة دي عشان البيت الجديد ؟
كروزو : بالضبط كدا
طبعا فلة حركات امها ما ادتها فرصة تستفسر منها العزومة لي شنو وعند منو ؟
كروزو : مالك هايجة كدا وبتنططي في الشنطة.
فلة بي ابتسامة سخيفة قبل ما تدنقر وترفع شنطتها :
والله اعتقد كدا ما من خصوصياتك ( الجبهة في مطار الخرطوم حصلو ودعوها قبل ما تسافر)
كروزو بي احراج وهو بيمشي يدو في شعرو : احم اها طيب تمام اوكي.
مشت قعدت في اقرب كنبة وهي بتصلح في شعرها .
كروزو قعد جمبها سكت شوية قبل ما يقول ليها : مش انتي الليلة عندك مسابقة ؟ ( يبدو انك لم تتب يا فتي ام تريد لجبهتك السفر الى كل انحاء العالم)
فلة بي حزن : ما بي سبب عزومتكم ماما رفضت امشي .
كروزو : طيب عادي هسه ارح نمشي وهي ما حتعرف .
فلة رفعت راسها وهي بتفكر قالت بي تردد : احتمال تعرف...بعدين حنمشي بي شنو.
عاينت لي ساعتها : فاضل 15 دقيقة بس والمسابقة تبدا.
كروزو : ما بتعرف لانها هسه مشغولة مع كلام السيدات الجوة..بعدين عادي انا بوصلك.
فلة بي سخرية: يا زووول احلف...عايزني اركب مع واحد عمرو 17 سنة وماشايل رخصة ؟
كروزو : 3 ايام وحاكمل ال18 بعدين انتي من زمن رخصتك تطلع الا تكمل السن القانوني ؟؟؟ تعزهم بي حاجة حلوة وبيطلعوها ليك طوالي.
فلة وقفت على حيلها وهي مبتسمة بي شقاوة : يعني امان ؟
كروزو : شديد.
فلة مسكت شنطتها وجرت على البوابة وخلتو واقف متنح فيها...فرملت جمب الباب وهي بتنده عليهو : محمد يلاااا 😀.
كروزو : ثواني اجيب المفتاح...قام جاري لي جوه طلع اوضتو بي سرعة فظيع ( سونيك 😂) وجا نازل قبل ما يطقش اختو.
غنوان : بسم الله على وين جاري كدا ؟
كروزو وهو جاري : قريب قريب.
غنوان : سوق براحة.
طبعا ما سمعها في اللحظة دي هو بكون وصل الشارع 😂.
وهو جاري في الحديقة لقتو هزار.
هزار : كروزو ازيك.
وقف وهو بحرك في رجلو عايز يجري وما عايز يحرجها: تمام الحمدلله
هزار : كنت عايزاك في موضوع.
كروزو : معليش بس هسه شوية مشغول عن اذنك.
هزار بنت خدورية طولها متوسط شعرها كيرلي...بتاعت حركااااات...بتديك احساس عمرها كم وعشرين وهي يادوب 17...واخده حريتها على الاخر في اي شي...كانت صحبت فلة المقربة في اولى وثانية بس لي سبب مجهول حصل بينهم خلاف وبقو ما بطيقو بعض خالص حنتعرف عليها اكثر في الفصول الجاية.
هزار مشت ورا كروزو وشافت فلة واقفة جمب البوابة والشمار حرق ابو ابوها وبقت عايزة تعرف في شنو بالظبط طبعا دا غير الغيرة الاكلت معاها جنبه..والغيرة بتاعت البنات الزي هزار دي كعبة لانهم بيحقطو ( بيحقدو) وبينتقمو ( على قول حبوبة منقا قهرتك بالقاهر والنبي الطاهر يا يمة )
ركبت العربية وهي بتعاين للساعة :فاضل 9 دقايق حنوصل ؟
كروزو بي ابتسامة ثقة : كدي اربطي الحزام وخليها علي ( نصيحتي لكي يا اختاه اوعك تركبي مع ولد عمرو بين 17 _23 وهو معجب بيك عشان حيعمل ليك فيها بول ووكر وهو واحد من الاتنين يا قلب بيك العربية يا قلب بيك العربية 😀)
المهم اتحرك بالعربية وطبعا السواقة بسرعة والتخطي يخلوهو ليهو....فلة تشيل وتعاين للساعة...لحدي ما وصلها...نزلت بي سرعة قبل ما تقول اي شي...صرخ ليها بصوت عالي : حاستناك .
باب العربية اتقفل براهو ...فتحو وقفلو تاني قبل ما يشد على الدريكسون ويصرخ بي فرح : yes yes yes
يلا تعالو اعرفكم بي كروزو دا.
ما تشوفو الظرافة دي ....عمرو 17 وبعد كم يوم حيدخل في ال18 بس بديك احساس ولد عمرو في بداية العشرينات...طويل كدا وصوتو خشن عندو دقينة خفيفة ( لاحظو دقينة ما دقنة)...الموووووهيم دا مكره ناس المدرسة كلهم ...عاجب البنات ومجنن الاولاد انسان عنيف بي طريقة ما طبيعية بيضرب اولاد المدرسة ضرب شديد سمعت كلامو انت حبيبو ما سمعت كلامو الله قال بي قولك...عندو شلة في المدرسة اسمها ال Black Shirts هم 7 ديل الرئيسيين وهو ال Boss بتاعم اما الباقيين تحت امرهم بيمشوهم على كيفهم...كروزو دا حتى الاساتذة بيخافو منه...دا مش متنمر دا متأسد ومتفهد ومتثعبن ومتفيل كمان...ومغرور لي درجة الوقاحة...والفي راسو بيعملو ماشي بي مبدأ ما عندي شي بي زول.. بس هسه الظرافة دي عشان فلة عاجباهو...حنتعرف عليهو اكثر ان شاء الله.
اما جماعة البلاك شيرتز دي حاجة قديمة شديد في مدرستهم كل سنة بكون في واحد زعيم وبكون عندو خليفة عشان يبقا هو الزعيم بعديهو...اللون الاسود حقهم براهم يعني انت في المدرسة ما تجي بي اي شي لونو اسود والااااااا.........
بس اعنف من كروزو دا ما جا واحد قبل كدا.
نرجع لي فلة.
دخلت المسبح جاتها ميرنا جارية وهي ما مصدقة : فلة واااااي لكن بالغتي انتي وين بنضرب ليك وما بتردي علينا دا يوم تتأخري فيهو قربت اجيك في البيت ( برضو  ما كنتي حتلاقيها 😛)
كوتش سارة شافتها من بعيد وجاتها جارية : فلة انتي وين من قبيل ؟
فلة وهي بتطلع شنطتها الموضوع طويل شديد بحكي ليكم بعدين.
كوتش سارة : خلاص امشي غيري سريع واعملي تمارين احماء بي سرعة ماف وقت.
دخلت على الحمامات لفت شعرها ولبست الطاقية البلاستيكية...غيرت هدومها ولبست هدوم السباحة البتتكون من قطعتين باللون الزهري من Nike شورت ومعاهو توب بيظهر بطنها المسطح ( عادي 😢 اساسا الماعندو كرش ما بيسوى قرش 😔)
كبت فيها شوية موية وطلعت بره مسكت النضارة في يدها وبدت تعمل في التمارين شوية كدا المتسابقات وقفو صف جمب حافة المسبح...فلة رفعت راسها قبل ما تلبس النضارة كانت بتعاين للامهات وهم جايين يشجعو بناتهم...حست بي فرق كبير بينها وبين البنات الجمبها ابتسمت لمن شافت ميرنا بتصفق وتصفر ليها...لبست النضارة واستعدت...لحظات من السكون عدت قبل ما تنطلف صفارة الحكم وكل المتسابقات قفزو في الموية برشاقة...الناس بقت منتبها مع اللابسة زهري...كانت متقدمة شديد على الباقيات وبتسبح بي سرعة وانسيابية كانها حورية ( عيني باردة 😌)
وصلت نهاية المسبح قبل ما تنزل لي تحت بي راسها وتدفع نفسها بي رجليها عشان ترجع لي قدام وماهي الا وثواني وكانت خلاص رجعت...والنتيجة طبعا محسومة...طلعت من المسبح وكل الناس بيصفقو ليها والكوتش مبسوطة منها...ميرنا جاتها جارية بالبشكير وهو فرحانة : مبروك.
فلة : الله يبارك فيك.
كوتش سارة : ممتازة يا فلة كدا حتكوني اتأهلتي.
فلة بسعادة : الحمد لله.
رجعت على جهة الحمامات ...دخلت تغسل جسمها من موية المسبح ميرنا كانت واقفة ليها جمب الباب : حصل شنو ما حكيتي لي.
فلة : بحكي ليك بعدين انا هسه مستعجلة لازم ارجع بي سرعة .
ميرنا : طيب ما مشكلة لكن لازم تحكي لي .( والله لو في محلك لو اقفلها في الحمام ما اخليها تطلع الا اعرف الشمار كلو ولا حريق الروح هسه لو متا ؟)
* ميرنا صحبة فلة المقربة قبطية...حلوة شديد وجنها كوريين وهي زاتها بتشبهم..رقيقة وملامحها طفولية عمرها 17 سنة...هي وفلة ماشين بمبدأ لكم دينكم ولي دين....ما قاعدين يهبشو بعض في النقطة دي واي واحدة محترمة ديانة التانية.
فلة غيرت سريع وطلعت.
طبعا كروزو في اللحظات دي ضرب لي اصحابو وحكا ليهم من الفرح.
واحد من اصحابو : يلا يا مان لازم تنجز وتطلع ليك بي خاجة كدا ولا كدا.
علت صوت ضحكات باقي الشلة ( مكالمة جماعية )
كروزو وهو بيمشي يدو في شعرو : لا لا دي ما شمال زي الباقيات انتو عارفنها كويس.
واحد تاني : طيب صورها لينا نشوفها لابسة كيف .
كروزو : طيب استناني 😏.
قفلت الخط في وشهم وقفل التلفون وختاهو في الشاحن وهو بيشتم في صحبو.
فلة فتحت الباب وركبت.
كروزو : اها كيف ؟
فلة بي ابتسامة : اتأهلت 💃
كروزو : مبروك .
فلة : الله يبارك فيك...يلا رجعني بي سرعة قبل ما ماما تحس بي .
اتحرك بالعربية وهو بيفكر يشيل رقمها كيف.. عارفها جنها احراج وخايف يخرب عليهو اللحظات.
فلة : كروزو
كروزو : ايون.
فلة : ياريت ماف زول يعرف بالحصل. ( ياختي وراهم زمان)
كروزو : طيب.
سكتت شوية ما تقولو ليهو : كروزو .
كروزو : نعم
فلة : سوق زي الناس.
كروزو : جدا
سكتت قبل ما تقول ليهو تااااني : كروزو ( ياااادي النيلة )
كروزو : اهااااااا
فلة بي ابتسامة : شكرا ليك....ما حأنسى موقفك دا.
كروزو : ولو ياخ 💃💃💃
وصلو الفيلا وجو نازلين وهم ماشين في الممر فجأة يلقو ليك ام فلة في وشهم ( تبشجةقةبثجحب فهمتو ؟ انا زاتي ما فهمتها )
دلال بي صوت حازم : كنتي وين ؟
فلة اتلعثمت في الكلام وماعرفت تقول شنو وحست بي مصيبة جاية.
كروزو وهو بيمد يدو : ازيك يا خالتو ان شاء الله كويسة ؟
دلال بي ابتسامة : اهلين يا محمد...تمام والله الحمدلله.
كروزو : احنا كناااا بنتمشى...اتكلمنا عن ثالث وكدا واتناقشنا اي زول حيدخل ياتو مجال والفهم دا 😉.
كروزو بي كلامو امتص الغضب من دلال : اهاااا تمام والله كويس....خلاص يلا يافلة نمشي بعد دا وشيلو ارقام بعض عشان تتواصلو .
مشت على البوابة وهي بتتكلم بالتلفون الضرب بعد ما خلصت كلامها معاهم.
فلة اتنفست الصعداء 😧...وعاينت لي كروزو : ما عارفة اقول ليك شنو...بالجد شكرا شديد.
كروزو وهو بيهبش في جيوبو : بي خصوص ارقام بعض تلفوني مالاقيهو ممكن اضرب بي تلفونك اشوفو وين ؟
فلة : بيكون في العربية .
كروزو : لا ما اعتقد ( شنو ما اعتقد في العربية وختيتو في الشاحن كمان).
ادتو تلفونها ضرب منو كم مرة واداها ليهو..
كروزو : شكلي خليتو فوق.
طبعا دا كلو عشان الرقم 😈...
فلة : مع السلامة
كروزو : سلام.
مشت بي سرعة لي امها قبل ما يركبو العربية ويتحركو.
كروزو رجع جاب تلفونو ودخل لي جوه.
لقتو هزار : هاي قبيل كنت ماشي وين مستعجل كدا.
كروزو وهو منتبه مع تلفونو عايز يسجل رقم فلة: مشيت وديت فلة المسبح.
هزار : تمام والله وهي مالا؟
كروزو وهو ما منتبه : امها ابت ليها عشان كدا.
هنا هزار ابتسمت بي خبث : اهااا....طيب فاضي هسه عايزة اتكلم معاك .
واثناء ماهي بتتكلم كروزو فتح التلفون وبقا بيتكلم مع صحبو قبل ما يغير وجهتو ويطلع برا ( الحركة كعععععبة ) خلاها خشمها ملح ملح .
هزار بي غيظ : طيب يا فلة ان ما وريتك ( عينك للفيل تطعن في ضلو😒)
رجعت قعدت في محلها من البنات .
فلة هي وامها لفو شوية قبل ما يمشو يسوقو ناس ياسمينة ونرجس.
المهم رجعو البيت واي زول دخل  يشوف مشاغلو ...فلة بعد ما غيرت ضربت لي ميرنا وحكت ليها بي كل الحصل.
ميرنا وهي بتضحك : يعني اليوم كان مغامرة 😉.
فلة : شديد
ميرنا : كروزو مالو حاسي بي شنو ؟
فلة : بري ما عرفتو.
دلال كانت قاعدة وبترسم في تصميم فستان زفاف...تلفونها ضرب فتحتو وهي بتعاين لي الفستان.
جاها صوت هزار : خالو دلااااال ازيك
دلال :منو معاي ؟
هزار : دي انا هزار ...بت جميلة
دلال : اهلين حبيبتي كيفك ؟
هزار : الحمدلله...كنت بس عايزة ابارك لي فلة عشان اتأهلت.
دلال وهي بتخت الدفتر : اتأهلت لي شنو ؟
هزار : انت ماعارفة يا خالتو؟  وداها محمد الليلة المسبح وفازت لو قريبة اديني ليها.
دلال جسمها كلو بقا بيرجف من الانفعال.
مشت على اوضتها وفتحت الباب .
فلة بقت بتعاين ليها باستغراب.
دلال بي ابتسامة : هاك هزار عايزة تبارك ليك
فلة : تبارك لي شنو ؟
دلال : كدي هاك ليها بتفهمي براك.
فلة شالت التلفون بي تردد جاها صوت هزار : فلة يا حبيبة هارتي...الف مبروك كروزو وراني انك فزتي حبيت ابارك ليك.
فلة بقت بتعاين لي امها بي رعب....وماعرفت تقول شنو...قفلت الخط في وش هزار وسكتت.
دلال :صحي الكلام دا ؟
فلة : م ماما انا
ما حست الا بي كف ناري في وشها.
دلال وهي بتشد ليها شعرها بقسوة وبتصرخ : يعني عاملاني طرطورة وبتكذبي علي صح؟
فلة بي الم : انا اسفة
دلال وهي بتضربها في ضهرها : بتخليهو يوصلك وبتكذبي علي صح .
لفت شعرها في يدها وجرتها لمن وقعت في الارض ( بغض النظر على اي شي...اعرفو انو الشعر القصير نعمة 😂)
ياسمينة ونرجس جو جاريات على الاوضة.
ياسمينة وهي ماسكة امها : ماما عليك الله فكيها.
دلال : ما ربيتك يا فلة لكن حاعرف اربيك هسه.
نرجس بقت بتبكي من الخوف.
ياسمينة : ماما حتطلعي ليها فروة راسها في يدك خلاص سيبيها.
دلال كانت بتضرب فيها بوحشية شديدة وترجيات ياسمينة ماجابت فايدة...اما فلة كانت بتبكي بي قهر لانو كلمت كروزو انو ما يوري زول...حست بي كره ليهو ولي هزار.
دلال طلعت ياسمينة ونرجس وقفلت الباب على فلة بالمفتاح وهو بتتوعد انها حتربيها من اول وجديد.
رقدت على بطنها وهي بتبكي شديد كل جزء من جسمها كان واجعها...لحدي مافي النهاية نامت من شدة البكاء.
الخاطرة الاولى :
( لا اعلم لماذا تكرهينني لهذه الدرجة...انا لست فتاة سيئة يا والدتي لكنني كذبت عليكي لانك حرمتيني من اكثر شيئ احبه لسبب سطحي...ما اعرفه ان الوالدات يعشقت ابنائهن ولكن يبدو ان العكس يحدث معي...فانا احيانا اتمنى لو لم اكن ابنتك ......فلة )
         □ نهاية الفصل الاول □
رايكم😀