الجزء الثالث عشر
بقلم ..... رشا الاسدي
بدى الكورس الثاني .... الاوضاع لبنسبة النا احنا الاربعة جانت جيده وهادئة
بس ياترى شنو بعد هذا الهدوء ؟؟؟؟
وبدت حفلات التخرج بشهر الرابع
استاذ طارق وعد هند يتقدمها بشكل رسمي ورا حفلت التخرج
الله يتمم ع خير هلمره
اجه يوم حفلة تخرج دفعتنا .... الحفلة جاجنت بقاعه وكلش حلوى ومرتبه
اجو بيها الاهالي
هند اجو اهلها وحته والدها اجه ... لمى اجه زوجها واطفال اختها المرحومة
نورا زوجها وابنها وحده من اخواتها
اني اجت امي واخويه ومرتة
بس عمار ماكدر يجي اني منعته لان خفت من اهلي لا ينتبهون
كلنا كعدنا ع طاوله جبيره
كلش تونسنا بيومها ...
استاذ طارق جان جايب اخته وياه وعرفها ع هند
وهند عرفته باهلها
اكثر وحده كانت سعيده بحفلة التخرج هي هند
اني جنت اباع بالوجوه احس اكوشي ناقص
عمار جنت اتمنى اشوفه وبنفس الوقت اتمنى مايجي
جان هذا الكورس بدايتة نوعا ماحلوى وسعيده
بعد اسبوع الحفله ... جان يوم خميس
هند .... بنات ادعولي باجر يجون اهل طارق
..... يارب ايتممها الج ع خير يارب
جنا كلش فرحانين بهذا الخبر ... يارب يعوضها هلمره وتنسعد وياه
صار يوم الجمعه وجانت هند تراسلنا اول باول
وجانت متوتره وخايفه ... ابوها جاهم ع الغدة
بعدها صار العصر تركناها وهي هم ماراسلت
السبت نتصل بيها مغلق
ظل بالنا عليها كلما نتصل مغلق
قلقنا عليها بس لاصاير شي الها
صار يوم الاحد هند مامداومه واستاذ طارق نفس الشي
بنات اني العصر اروحلها للبيت
نورا ..، اني اجي همين
لمى ... اني مااكدر وانتو تعرفون بظروفي بس سلمولي عليها وطمنوني
ان شاالله
صار العصر اخويه اخذني لبيت هند ونورا بالطريق هم زوجها اخذها
وصلنا لبيت هند ... استقبلتني امها وصعدتني لغرفتها
نورا جانت وصاله قبلي بخمس دقايق
هند نايمه بالفراش وجها اصفر وعيونها حمر
هاي انتي هند مستحيل شصاير بيج
حظنتني وظلت تبجي تكسر القلب
حته صوتها رايح من البجي
نورا .... كافي هند مو زين ع صحتج
هند احجي شنو صاير
هند .... ولو مابيه احجي بس لازم افضفض
اي احجي
بيوم الجمعه جنا متحظرين اني وخواتي وحته سجى اجت
( سجى مزوجه وعدها خوات اثنين مطلقات وخواتها ٢ اصغر من هند بعدهم طالبات)
وبابا اجى يمنه ع الغدة
صار العصر واحنه ننتظر جيتهم
الوقت يمشي وهو ماكو صار الغروب مابينو
اخر اتصل وفصل الخط كلت اكيد بالطريق
عدت الساعه سبعه وماكو ... رجعت اتصلت هم ظل يرن وماكو رد
اتصلت مرة ثانيه رفضه
بعدها دزلي مسج لاتنتظرون ماراح نجي
قلبي نغزني
دزيتله مسج ليش شنو السبب ؟؟؟
مارد علي
كلتلهم لاهلي ماراح يجون بابا ظل يحجي
اني ماتحملت صعدت لغرفتي
وحسيت اكو شي ورا ربع ساعه تصل عليه
الو ها حبيبي
ههههه ... ياحبيب منهم الاول الثاني الثالث
شنو قصدك طارق
استاذ طارق مو طارق حاف ... فاهمة
اها العفو استاذ
اريد اسالج ... اني يارقم
شنو يارقم استاذ ماجاي افهم
لا تستغبين براسي وتسوين نفسج بريئه ... جاوبي ع سؤالي
سكتت ودموعي كامت تنزل وحدها
هااا جاوبي ... ليش ساكته لان جاي تعديهم مو لو ماتذكرين كم واحد لعبتي عليه
احجي
طارق قصدي استاذ والله احبك والله .... والله تغيرت وياك وتركت الماضي ورا ضهري
ههههه ماضي مو .... لعد اني هم اعتبريني ماضي
لان مايشرفني ازوج وحده جانت كوستر مال عبريه
لا استاذ الله يخليك والله اموت بلياك لاتعوفني والله اوعدك اصونك
واحافظ ع سمعتك والله .... والله اصير خدامة جوى رجليك بس لاتتركني
هند كافي مااريد اسمع صوتج لان اشمأز منه
ولج انتي وحده وصخة انتي ... ماريد اغلط واوصخ لساني بيج
روحي شوفيليج واحد مثلج وهم لو يرضى بيج لو لا
تبجين ها .... دموع التماسيح عوفيهم مو علي
ها نسيت منا ورايح مااريد اشوفج كبالي خير شر
سد الخط
ااوف ياربي ليش هيج دخيلك ربي ساعدني مو كادره اتحمل
جسمي كام يرجف وحرارتي ارتفعت وكوى كمت اتنفس
نزلت جوى اكو مرايه قبال الدرج شفت وجهي صار خريطة من البجي
بابا وماما جانو يداهرون ... دخلت عليهم وخواتي كاعدات
كااافي كااافي باعلى صوت صحت كاااافي
مره وحده بحياتكم بس عوفو مشاكلكم وعتابكم والتفتوًالنه
شوفو بناتكم شتلبس شتحط وين تروح وين تجي
انتي ( ع ماما اشرت عليها باصبعي) .... يوم بس يوم عوفي الطلعه وعفي الكياج والتلفزيون وكعدي يم بناتج
شوفي بناتج شجاي يصخمون من وراكم
يوم سحسسينا انج امنا مو ديكور انتي والمزهريه ذيج ماتفرقين شي
بابا دار عليها كلها مو كتلج انتي ام فاشله
اوكف انته اوكف بعد ماوصلك السره
انته همين فاشل وبعد افشل من امي
تدري ليش طول عمرك تفكر بولد يشيل اسمك
ههههههه ياسم هذا التفت لبناتك وشوفهم شلون شالو اسمك
هند احترمي نفسج وانتي تحجين
اشوف امي وخواتي يخزرون بيه
اني بوقتها صارت عنديه حالة هستريه مااحس بنفسي شنو اكول
بس جنت احجي باعلى صوتي
ومنو كلك اني محترمه هههههه اني وحده قح.....
بابا صاح ... هند (بصوت عالي )
اي والله بابا روح طلع واسال الجوارين كلهم بيت ام منال شيسموكم
بيت ام ال ......
اني ماراح اكول انته راح تعرف من الناس
طلع بابا وطبك الباب حيل
امي اجت عليه وظربتي كف بوجهي
اني وكعت بالارض اجت سجى جابتلي مي وغسلت وجهي
اشوف خواتي الاصغر مني يبجون وسجى همين
واني مسدوحه بالارض
امي تبجي ومااعرف شتكول
ظليت احس بغواش بعيوني ولزمني صداع قوي
شوي واجه بابا منتجي ع الحايط ولازم قلبه بس دخلج وكع بالارض
مااسمع بس صوت الصريخ
اني اغمى علي
فتحت عيني اني بالمستشفى ومعلكيلي مغذي
سجى جانت يمي .... وين بابا
لا تخافين بابا زين صار عنده ازمة قلبيه وعدت سلامات
وامي والبنات يمه
عفيه سجى وديني اله
وين بيج حيل ارتاحي هسه ولا يظل بالج
وامس العصر يله طلعنا من المستشفى
نورا .... وانتي ليش وكعتي
ارتفع عندي الضغط واله شوي جان صارت بيه جلطه بس الله لطف
اوف حبيبتي سلامتج ماتشوفين شر
الله يخليكم الي
بابا ظل يمنه امي تداريه
وموصي خواتي وامي مايحجون علي اي كلمة
ظلنا يم هند وسولفنا وضحكناها وبعدها رجعنا للبيت
.......
أنت تقرأ
رقم مجهول
أدب نسائيهديل ..... طالبة جامعية تروي لنا احداث قصتها مع زميلاتها ع مدى الاربع مراحل القصة فيها نوع من الغموض مع قصص واقعيه تحدث في مجتمعنا نتمنى لكم متابعة شيقه
