رقم مجهول

رقم مجهول -٢-

سديت الخط .. رجع اتصل مارديت قفلت الجهاز
نورا ... منو ؟؟؟
والله ما ادري يكلي معجب....
هند.. هههه اي ومعجب شبيج خفتي وجهج صفر....
لا والله وشترديني اسوي ست هند
هند.... عادي كليله كل الهلا بيك تفضل
ضحكنا ....
لمى .. مو توه دزلج مسج وكاتب اسمج
اي لعد اني ليش رديت عليه
لمى .. منو تتوقعين واحد من الكليه
لا ما اتوقع لان منين يعرفون رقمي بس اتوقع واحد من ولد عمي خلي اشوف ليث وانطيه الرقم
هند .. ولد عمج ماعدهم شغله وعمله ينصبون عليج هاي بنات العالم كلها

لا هند اخاف يردون يشوفني انطي مجال اذا احد اتصل بيه او لا
اني مو حاجيتلكم عنهم
نورا ... اي صحيح .. هذاك ليث اجه
اي همزين اجه اني الصراحه مالي خلك ابد لهاي السوالف
ليث.. السلام عليكم شلونكم بنات
وعليكم السلام
ليث اجيت والله جابك خلي افتح الجهاز اكو رقم غريب اتصل عليه
ليث ... وانتي ليش رديتي عليه
مو دزلي مسج كاتب اسمي اني توقعت وحده من صديقاتي
ليث .. خلي اشوف
تفضل .. ها اها جاي يتصل انته رد
ليث ... الووو الووو ما ترد... سد الخط هاي دازلج مسج خلي اشوف .. هديل ليش قفلتي الخط .. خلي اسجل الرقم عندي واني اشوفه بعدين

اي عفيه ليث
رجعت للبيت ردت اكول لبابا بس كلت خلي اشوف ليث الاول اخاف واحد من ولد عمي او يمكن بابا يريد يختبرني
شفت دازلي مسجات ع الواتساب
ردي عفيه ماخسرانه شي بس نتعرف انطيني مجال بس اسمع صوتج بس احجي وياي
سويتله حظر
صار دنيا ليل رحت لبيت عمي حته اشوف ليث
ليث .. ها هديل
ها ليث شنو صار ع الرقم
ليث ... اتصلت عليه ما يرد وسالت اخواني ولد عمي يكولون مو احنه
لعد منو
ليث .. اخاف واحد من الكليه بمرحلتكم
بس ليث منين يحصل رقمي
ليث .. عادي من بنات مرحلتكم
خلي باجر من نداوم هم اتصل وعندي ولد صديقي يشتغل بشركة اتصلات هم اروحله بلكي يكدر يساعدنا
يله اوك شكرا ليث دوختك وياي
مرت عمي جانت تباوع وتضحك حسبالها اكو شي بينا علاقه او كذا
اعرفها من نظرة عيونها
عفتهم واني محتاره بالموضوع.... احتمال يكون بابا
رحت للبيت وحجيت لبابا ع الموضوع بابا ضاج كلش وعصب وكلي احتمال ولد وياج بالكليه
بابا اني وصيت ليث و باجر ان شاالله يشوف الموضوع
من ردت فعل بابا اتاكدت مو هو
ساعه ١٢ دزلي رسائل ع الماسنجنر ع الفيس دخلت ع صفحته فارغه واسمه مجهول الهويه وصورة البروفايل ولد لازم تلفون داير وجه
وكلشي مناشر بصفحته
اهوو اليوم شلون اخلص سويتله بلوك ونمت
ثاني يوم بالدوام اتصل بيه رقم غريب غير الي اتصل بيه امس
اهووو شيخلصها اليوم
وحجيت لصديقات ع الموضوع وهم كالو اكيد واحد ويانه
هند ... انطيني الرقم واني اصرف
تسوين فضل هاي ارقامه اثنينهم
بالاستراحه اتصلت بيه هند وراحت ع جهه حته تاخذ راحته بالحجي
شويه واجتي
هند ... لج هديل هذا واحد يحبج ويردج الج
ويكول ماعوفها ولا ابدلها باي وحده
نورا ... لالا مامعقوله يعني انتي هند وماكدرتي علي
هند .. اي والله شبيج كلي ما اعوفها لحد ما ترد علي
ههه هذا مخبل اكيد .. يعني هسه هو عاف هند ولمى واجه عليه
لمى ،،، وانتي شبيج حبيبتي همين حلوى تخبيلن
اي صح حلوى بس مو بجمالج ولا بجمال هنوده
هند .. ومنو كلج هو من الكليه اخاف جوارينكم او اي احد من اقاربكم
انتي ما تحسين ان اكو احد يباوعلج يراقبج
والله ما ادري ما منتبه
هند .. انه راح انطي الرقم لحيدر وهو يشوف اذا كان طالب ويانه او مو ويانه ...
( حيدر طالب بمرحلتنا بس بشعبه الثانيه ومعجب بهند)
اجه ليث هو سرى ( حبيبته) وسلمو علينه
ليث ... هديل الرقم انطته لولد الي يشتغل بشركة الاتصال ودك اسمه بالحاسبه طلع الرقم مجهول ومابيه اي معلومات .....
والحل ليث
ليث ... غيري شريحتج ولا تنطين الرقم بس لصديقاتج المقربات

وراها راحت هند لحيدر ونطته الرقم وكالها انتضري لباجر
وهو كل شويه يتصل بس ما ارد ودزلي مسجات واحد من المسجات جان
....هديل اليوم شطاله طيرين العقل....
ظليت اتلفت اني هذا الرقم راح يخبلني
رجعت للبيت وغلقت الجهاز .. اني عادتي من ارجع من الدوام انام العصر وباليل ابلش ادرس وراها الزم الموبايل ادردش ويه البنات
بلعشا سالني بابا ع الرقم بعده يتصل
فحجيتله كلشي وكلي ديري بالج بابا هذا اكيد واحد نصاب سمع باهلج حالتهم الماديه زينه ومتمكنين كال خلي انصب عليها
امي ... اي ماما ديري بالج جاي نسمع بلاوي بهلوكت يسون علاقات ويه بنات ويكلها دزيلي صورج حته اشوفها لامي حته اخطبج وبعدين يهددها بالصور مقابل فلوس
اي صحيح كلامكم بس لا تخافون علي انه كدها وكدود
بابا ... هديل بابا ديري بالج واحجينا كلشي يصير اول باول
صار باباتي
صعدت لغرفتي فتحت الجهاز والاكي كومه رسائل ع الواتساب
اهووو ... رسائل غراميه واشتياق وردي احجي وياي
جاي احضره ومسح الرسائل انتبهت ع مسج كاتب عن موقف صار بمرحلتنه بين طالب وطالبه .... معناها هذا طالب ويانه
ثاني يوم بالدوام جنا كاعدين اني ولمى ونورا شويه اجت هند وحيدر
سلمو علينا
حيدر ... هديل الرقم مو لاي طالب بشعبتنه ولا بشعبتكم احتمال بغير مرحله او بغير قسم او احتمال يكون عنده جهاز ثاني
حيدر هذا الشخص ويانا لان البارحه كاتب موقف صار بشعبتنا
حيدر .... معناها هذا وياكم
والحل يا جماعه
نورا ... هديل شنو رأيج من ندخل للقاعه قبل لايجي الاستاذ واكيد الطلاب كلهم موجودين انتي تتصلين ع الرقم
هند .. اي خوش فكره نورا ..واني اوكف بالباب حته من يجي الاستاذ الهي بكم سؤال علما تكملين مكالمتج
لمى .. اي واحنه ننتبه وياج ع الطلاب اذا احد رن جهازه معناه هو
حيدر .. فعلا خوش فكره وانه هم اكعد اخر ستيج وانتبه ع طلاب شعبتي

اوك ان شاالله من تبدي المحاضره
قبل لاتبدي المحاضره بخمس دقايق وكفت بالمكان الي يكوف بيه الاستاذ وهند بالباب ونورا و لمى كاعدين بالاخير اتصلت ع الرقم ظل يرن ....