#رقم مجهول
الجزء الاول
بقلم ..... رشا الاسدي
الدنيا ليل ... اريد انام بس ماكادره انام اتكلب بالفراش
بهاي الليله جنت هواي فرحانه لان باجر اول يوم الي اداوم
بالجامعه لذلك مو جايني نوم
محظره ملابسي والسجلات ومبتسمه وكل شوي اطل عليهم
طبعا اني الوحيده من بنات العائله سمحولي اداوم كليه من دون مااكون مخطوبه او مزوجه
اسمي هديل من عائله معروفه وغنيه
بابا وعمامي سلمان وماجد يشتغلون بالتجاره والعقارات
اني اصغر وحده باخواني ومدللة بابا علاقتي بابويه اقرب من علاقتي بامي
ابويه وعمامي هواي يخافون علينا احنه البنات
ممنوع نختلط مع اي احد دايما يراقبونه واذا لزمو او حسو باي وحده من البنات عدها علاقه او احد حاول يتقربلها ياويلها وياسواد ليلها
وتنحرم من كل حقوقها
ومن ضمنها تنحرم من دراستها
بالاضافه الى العقوبه بالضرب
بيتنا وبيت عمامي واحد بصف الاخ
بيحث جنا احنه البنات بنفس المدرسه وماجرينه سياره تودينه وتجبنه من المدرسه للباب البيت
طبعا هذه الشك والخوف والحرس يشمل بس البنات اما ولد العائله فلا كلشي عدهم عادي
اني الوحيده الي قبلو اكمل كلية من دون مااكون مخطوبه والسبب ابن عمي سلمان يداوم وياي بنفس الكليه
اكو سر بالعائله هو الي خله عمامي وابويه هيج حرصين علينه ومحد يعرف بهذا السر
هذي مقدمه بسيطة عن عائلتي
كعدت الصبح ويه دكت النبه .... ماشبعانه نوم وبنفس الوقت متلهفه للدوام
بدلت ملابسي ونزلت اتريك ماما وبابا جانو يتظروني ع الريوك
وبدت الوصيا ديري بالج من اصدقاء السوء ولاتختلطين بالطلاب
وووووهواي وصايا واني اهز براسي
لحدمااجه ليث ابن عمي اخذني بسيارته
وصلنا لكليه العلوم
اول ما دخلت للكليه شفت لافته مكتوب عليها " نجتمع غرباء ونفترق احباء" لفتت انتباهي وعجبتي هذه المقوله
طلع قسمي كيميا واني جنت هواي احبه هذا االاختصاص
ليث حصلي خط نقل ويه بنات ٢ بمرحلته وحده منهم حبيبته سرى والثالثه اخت حبيبته اداوم كليه تربيه وهمين مرحله اولى وجانو حبابات
واخذني ليث للقسم و منزلين اسماء مرحله اولى ومسوينا شعبتين اني طبعا بشعبه باء .. وشفنا الجدول ورحت للقاعه
احس بروحي كانما طالبه اول ابتدائي كلشي مااعرف ولا اندل وراها ليث عافني وكلي بينا اتصال
دخلت للقاعه وبديت اتعرف ع البنات..... البنات معزولات عن الولد
لفتت انتباهي بنيه جميله جدا شكرى وعيونها خضر كاعده لوحدها ولابسه اسود
بس الون الاسود ماماثر ع جمالها ...
رحت يمها .... سلام اني اسمي هديل
هلو هديل اني لمى
عاشت الاسامي ليش كاعده لوحدج
مااعرف بس مالي خلك اختلط حاليا
الظاهر الشخص الي لابسه عليه اسود عزيز عليج
دمعت .،، اي اختي
مسحت دموعها... وانقهرت عليها لزمت ايدها
حبيبتي البقاء لله كلنا ع هذا الطريق
والنعم بالله
بهلاثناء اجنت بنيه اسمها نورا جانت مزوجه قبل شهر يعني عروسه
قصيره جانت وتارسه وبشرتها حنطيه وملامحها حلوى
وبعدها اجت طالبه ثانيه اسمها هند طبعا هند الانوثه الطاغيه انيقه لبسها كله ماركه والميك اب والعدسات جسمها حلو ومخصر وهي اطول وحده بينا وجانت طفوليه ومرحه ودلوعه ع الرغم ان لمى احلى منها بس هي ملفته للنظر اكثر
بدينا نتعارف وحده ع الثانيه
هند ... لمى شلون اتوفت اختج
لمى ... اثناء والولاده
نورا ... وطفلها الي ولدته
لمى ... ولدت بنيه زينه واحنه جاي انربيها انه وماما
ماصرلها هواي من توفت توها طلعت من الاربعين
اني ماردت اسالها لان حسيت كل كلمه تكولها عن اختها تاخذ الف حسره
ودموعها ماوكفت وهي تحجي
رسا غيرت الموضوع ... نورا زوجج ازوجتيه عن حب
لا وين خطبة اهل لاحب ولا بطيخ
هند ... يمعوده هو اكو حب بهلوكت كلهم كلاوجيه
ليش هند لسه الدنيا بخير مو كل اصابيعج سوى
يمعوده يجي اليوم واذكرج بكلامي
