الجزء السابع
بدت العطله الصيفيه وبديت اراجع ذكرياتي ويه الرقم المجهول
اذكرت كل الرسائل الغراميه والاشعار وكلامه وياي
حسيت اكو شي بداخلي مااعرف اوصفه
شعور حلو يمكن يكون ثقه بالنفس او غرور اوامل بالحياة
واذكرت كلام صديقاتي من كالولي انطيه مجال
ظليتج الوم نفسي
هسه اني شبيه مانطيته مجال ..
اوووف وشلون انطيه مجال وليث واهلي
لا خلي اسده للموضوع وما افكر بيه
اذكر كلام ام الخيره واحير بيه اكثر
ظليت ليالي وانه بس افكر بالرسائل والاشعار معقوله لهدرجه يحبني وما مل مني
اني احب المغني مروان خوري
ظليت من اسمع اغانيه اسرح بخيالي لبعيد واروح لدنيا ثانيه
اخذت شريحه لجهازي ومانطيت الرقم بس نورا وهند ولمى وكلت هلمرة اذا حصل الرقم يعني من عدهم
طلعت النتائج اني ولمى ناجحين بس نورا وهند نتيجتهم اكمال لان نورا جانت حامل باشهرها الاخيره والحمل متعبها وهند ملتيه بالعلاقات
نورا ولدت بالعطله وصار عدها ولد
ليث ابن عمي خطب سرى واتفقو السنه الجايه من يتخرجون يزوجون
وامتحنو البنات دور ثاني ونجحو وبدا الدوام
داومنا وكعدنا نذكر قصص العام الفات
وسالوني البنات ع الرقم المجهول كلتلهم ما اتصل هلمره ماكدر يحصل رقمي
نورا مسكينه تفكر بابنها ... نورا صح زوجها مو زين وياها لكن اهله كلش طيبين وبالاخص عمتها
وهي تكفلت بتربيه الولد
دايما تحمد بعمتها
هند كونت علاقه جديده ويه طالب بغير قسم
لمى هي وياسر يعيشون احلى قصة حب صح تصير مشاكل بينهم وغيره
بس حبهم لبعض اقوى من كل شي
وبدت ايام الدوام والدراسه والمحاضرات والمواد كامت تصعب اكثر من العام
فد يوم بالمحاضره اجاني مسج رقم غريب
.. هديل شخبارج مشتاقلج هواي ..
خلصت المحاضره وحجيت للبنات
هند .. هديل رحم لوالديج احجي وياه وشوفي شيريد مو مثل العام
نورا .. اي هديل ولا تكولين لاهلج ولا ليث
بس نريد نعرفه منو؟
ها هذا رائيكم
لمى .. اي هديل شوفي ترى ذبحتينا
بس هو منين حصل رقمج
اني هذا الي مخبلني شلون يحصل رقمي
دزيتله مسج .. هلوووو
راسا اتصل علي رديت عليه
الووو
الووو واخيرا حن قلبج علي
ما حن قلبي ولا شي بس اريد اعرف شتريد مني
رايدج انتي والله
اني ما فيدك صدكني
بس انطيني مجال اعتبريني صديق اخ ماخسرانه شي
زين اوك اريد اشوفك
لا ما تكدرين تشوفيني هسه
ليش
من يجي الوقت المناسب .
يمتى مثلا وشنو السبب
لان بس تشوفيني بعد ما اكدر اراسلك واتصل بيج واحتمال اخسر دراستي
يعني انته ويانه بالكليه
اي بس ما راح اكلج بياقسم او بيا مرحله اخاف تكلين لابن عمج واخسر كلشي
اهوووو هسه انته عفت البنات كلهم اجيت علي
شسوي غير حبيتج اول ما شفتج
هههه زين بس كلي شنو اسمك
لا ما اكدر اكلج او اسمي مجهول
ااوووف تعبتني ... بس سؤال منين كدرت تحصل رقمي
احصل ع كلشي خاص بيج بطريقتي الخاصه
اووف منك ... يله عندي محاضره هسه باي
اوكفي لحظه
سديته اول مره انتبه ع صوته حلو
حجيت للبنات ع الصار نصحوني بس انطيه فرصه
يعني عادي احجي وياه واراسله لحد ما اعرفه هو منو
شوي بديت الين وسمعت كلامهم
ظليت اراسله ويراسلني
بس اتفقت وياه تكون علاقتنا مجرد صداقه وبس
وما يحجيلي غراميات وحبيات ابد ....
قبل بعرضي اله
ظلينا نحجي بس مسجات كلام عادي عن الدوام وعن الدراسه وعن ولد مرحتنا وعن مواقف تصير بالدوام او بمرحلتنا
جان ينصحني اويحذرني من اشياء مامنتبه عليها ...
بديت اتعود عليه عنده طريقه عجيبه بالكلام اسلوبه حلو ومقنع ...
ظليت احجيله عن مشاكلنا بالكليه وحته مشاكل صديقاتي وجان ينصحني
ويساعدني
بديت شوي شوي اتعلق بيه بس ما ابين اله ع الرغم اني ماشايفته ..
يمكن اهتمامه بيه ومساندته الي وكلامه الحلو هو السبب الي خلاني اتعلق بيه ....
صار عندي فضول بس اريد اشوفه حلو اولا
جنت اتوسل بيه يدزلي صوره اله بس مايقبل يكلي مو هسه من يجي الوقت المناسب
اهلي ما حسو بيه ولا ليث لان بس مسجات بينا
بدى يحجي عن اهله هو يتيم وعنده اخت واخ واني هم حجيتله عن عائلتي بس مو كلشي احجيله لان اخاف
اخاف لا يطلع واحد ينصب علي ويريد يعرف معلومات عن اهلي
جنت جدا حذره وياه
خلصت السنه وصعدنا مرحله ثالثه
ليث اتخرج وازوج من سرى
بدت العطله ظل يدزلي اغاني واشعار ومقاطع مسلسلات تركيه مركبه ويه اغاني
هو يعرف بيه اني احب مروان خوري فدايما ادزلي اغانيه
ظليت من اسمعها اروح بعالم ثاني واسرح بخيالي وياه
صح ماشايف شكله بس يتهيألي يشبه الممثل التركي بوراك ( الي يسموه بقلاوه) لان جان دائما يدزلي مقاطع اله
ظليت احبه واحب وجوده بحياتي بس اخاف منه لان احسه غامض
بس مالمحتله ولا بينت حبي اله مجرد صديق لا اكثر
دايما اطلب يدزلي صوره اله مايقبل
بدى الدوام وحجيت لصديقاتي عن الموضوع
نورا... هديل حددي موقفج وياه السنه يا يكلج هو منو يا انهي كلشي وياه
نورا مو حته اذا نهيت الموضوع وياه يكدر يحصل رقمي
لمى ... عادي مثل قبل حكري
هند ... هديل انتي حبيته
ما ادري هند بس تعودت ع وجوده بحياتي اسلوبه وطريقه كلامه حلو وياي وما يوم ضغط علي بشي
هند ... يعني حبيتيه
ما ادري هند ما ادري بس شلون احبه واني ما شايفته
لمى ... عادي الاذن تعشق قبل العين احيانا
ماادري بس لازم احدد موقفي وياه مثل ماكالت نورا
اتصلت بيه ورد علي
الووو
شطالعه اليوم هدهد والله اشتاقيتلج
خجلت من كلامه
اكلك جوجو ( دلع مجهول) اريد اشوفك لان تعبت من التفكير اريد اعرفك انته منو
هديل ما اكدر هسه من يجي الوقت الناسب
ااوووف صار سنه كاملة وما اجه الوقت المناسب لعد يمته هذا الوقت يجي وانته شتريد مني
رايدج انتي هديل
تعبت منك حته اسمك ما اعرفه .. اذا ماتكلي انته منو انهي كلشي وياك...
هديل ما اكدر صدكيني وثاني شي انه ما مضايقج مجرد رسائل عادي بينا..
اذا ما تكلي انته منو بعد لا تتصل
هديل ليش تلحين
تكول لو انهي كلشي
لا ما اكول
هاي هو انتهى كلشي بينا وسديت الخط...
حظرت الرقم من تلفوني وحته من الفيس بوك بس ما غيرت الشريحه
كلت للبنات ايدوني وكالو عوفيه فتره ويرجعلج
صح صعب قراي بس لازم احدد موقفي وياه
فد يوم كاعدين اربعتنا اجه ياسر وياه بنيه
الكل دارت ع لمى باستغراب منو هاي؟؟؟؟
