الجزء الرابع عشر
ثاني يوم داومنه ... هند ماداومت
اجت اختها ضحى اخذتلها اجازه مرضيه
استاذ طارق داوم بس هواي متغير عن قبل
جان قبل من يدخل القاعه يضحك ويشاقه ويه الطلاب
هسه بس دخل نطى محاظرته وطلع
حته الطلاب انتبهو عليه وبدو يتسألو شبيه استاذ طارق
وهند شعجب مامداومة؟؟؟
ماحبينه نحجي بالموضوع الي يسال نكول مانعرف شي
هذا الاسبوع جان كئيب جدا
الاسبوع الثاني هند داومت ... هواي فرحنا بجيتها
وصحتها نوعا ما احس ... بس شكل وياها الضغط
نفسيتها بعدها تعبانه وماالها واهس
ومن احد من الطلاب يسالها عن اخبارها
تسكت وماترد
اول محاضره عدنا لاستاذ طارق
قبل لا يدخل للقاعه صاحلي استاذ طارق
هديل من رخصتج شوي
نعم استاذ
كولي لهند لاتدخل بعد لمحاضرتي
ليش استاذ
بدون ليش ... ولا تخاف مااسجلها غياب
بس ..
هديل كتلج بدون ليش وبس ... يله روحي كليلها خلي تطلع من القاعة
صار استاذ
دخلت وحجيت لهند ... هند دمعت عيونها وطلعت من القاعه
هو يله دخل
وصيت نورا تطلع وراها
نورا استاذنت منه وطلعت
خلصت المحاضره لكيناهم نورا وهند ينتظرونه بالحديقه
طبعا هند عيونها حمر
رحنا لمكانه المفضل الحديقه الي بضهر القسم
نورا راحت اشترتنا لفات فلافل وعصير
كعدنا ناكل ونسولف
لمى ... هند لاتضوجين وتقهرين نفسج حبيبتي محد يستاهل تضيعن صحتج عليه
اني ... يابعد قلبي هنوده ولا يهمج الله يعوضج بالاحسن منه
هند ... عادي متعوده مو اول مره
نورا ... بس هند هلمرة تاثرتي كلش تاثرتي
هند.... اووف يمعودين انسى شبيكم
وباجر عكبه تصير سوالف مثل ما نسيت ذاك الحقير
وصار سالفه وحته اكره نفسي من اذكرها
هم انساه لطارق
الله كريم هنوده
لمى ... شلون صار الوالد
هند ... لا الحمدلله صار زين
و كال بعد ماتظلون هنا .. هنا مالنا عيشه بعد
نورا .. لعد وين ترحون
هند ... راح نسافر لتركيا ومناك نقدم ع لجوء
وبابا يبقى هنا بالعراق يم مرته بس بين الفتره والثانيه يمر علينه هناك
بس ينتظروني اكمل امتحانات وبعدها نروح
اني ... هند ولو يعز علينا فراقج بس هذا احسن حل
هند .. والله انتو اعز من خواتي احبكم والله
وصدكوني وماراح انساكم بيوم ...وراح اظل اتواصل وياكم
لمى .. ان شاالله حبيبتي احنه هم ماننساج
نورا ... وهنا تشوفيلي واحد تركي
بلكي مهند يحيى وعمار براحتج
هههههههههههه
لمى ... عاد هي حلوى وطويله مثلهم
نورا ... بعد اختج هنوده مو تنسين هم شوفيلي واحد وياج
هند .... هههههه لاما انساج ... بس وين الكه واحد قياسج
اذا انتي طولج شبر
هههههههه
نورا ... عابتلج هنيده ..... صدك هند بس ماكتلي شلون عرف استاذ طارق بعلاقاتج السابقه
هند ... مريه جوارينه تصير صديقة امي اجتنا ذاك الاسبوع
مسولفلها ابنها .. يكول جنت واكف اني وصديقي ع الشارع العام
واجت سياره عاليه بيها عائله رجال جبير ومريه جبره وياهم مرة عمرها بالثلاثين وصاحب السيارة شاب ضحم
جان اكو رياجيل كبار من المنطقه واكفين بوقتها
الرجال الجبير نزل من السياره وسالهم ع عنوان بيت ام ضحى
وسالهم عنكم وع هند
واحد منهم كلنه مانعرف
بس واحد من الرياجيل كله مو خوش عائله وسمعتهم مو زينه بالمنطقه
بناتهم دايحات ويه الولد وبالاخص بتهم هند الي مره صاحبت اثنين من ولد بيت شيخ ... جانو كاعدين يمنه وشالو منا لان صارت مشاكل بينهم بسببها
حته واحد منهم طلق مرته وعاف جهاله علمودها وبعدين كلتله مااريدك
وصاحبت ابن فلان وابن علان
هم من سمعو الحجي صعدو بالسياره وراحو
امي من سمعت حجي صديقتها كالت هسه اروح اهد عليهم
كلتلها ماما ليش تهدين قابل الي حجو افتراء لو جذب
ماما كلامهم كله صحيح
ماما كالت منا ورايح بعد ماكو وحده تعتب الباب بس الدوام
لا صديقه ولا سوك ولا مولات تكعدن بالبيت وتنجبن
وحده من خواتي كلتلها بعد وقت ماما وظلت تهز بيدها
بس ماما صارت زينه ويانا ظلت تكعد يمنه وتسولف وتضحك
بابا همين صار زين ويه امي
لمى ... هذا جان درس لامج وابوج بس بعديش
هند ... اي صح
نورا ... بنات ما منتبهين ع شي
لمى ... شنوووو
نورا ... كل احنه وكعنا بمشاكل وازمات عاطفيه اله بعض الناس
اني ... منو لج اني كش كش كش خمسه وخميسه
شنو هاي عوضه عوضه
البنات كامو يضحكون
ولج نويرا شرايده مني
نورا ... والله كلنا مرينا بازمات عاطفيه ومشاكل اله انتي
اي حبيبتي لان اني الوحيده بيكم افكر بعقلي قبل قلبي وحريصه وحذره من كلشي
هند ... وعمار شلون تفكرين بيه بعقلج لو بقلبج
عمار ... عمار كلشي بيه يفكر بيه ... صح احبه ومرتاحه وياه
بس احس اكو غموض بشخصيته
هند ... لا تبالغين وتوهوسين ترى عمار يحبج
ماادري عندي شك ووهس بس اتمنى شكي مايكون بمحله
نورا .. حبيبتي هديل والله اشاقه وياج الله يجعله من نصيبج
لمى ... اي ان شاالله ع الاقل انتي بس بينا تزوجين الحبيته
امين يارب
نورا ... ويمتى ناوي يتقدمج
والله ياست نورا علما يتخرج ويشتغل يله
نورا ... الله كريم
مرت الايام هند ماظلت تدخل محاضرات استاذ طارق
وجنه احنه نشرحله المحاضرات
وحاولت تبعد نفسها عنه حته الطريق الي يمشي بيه هو تعوفه وتمشي بغير طريق
والمكان الي بيه غرفته ماتفوت منه
مره جاي ننزل الدرج اني وياها فجاءة استاذ طارق صار بوجهنا
جاي يصعد الدرج ارتبكو اثنينهم وظل واحد صافن بوجه الثاني
استاذ طارق اتافف وصعد نزلنا وهي ساكته
باوعت بوجهها اشوف عيونها غركانه دمع
هند جانت جدا صادقه بحبها لطارق
بس ليس كل ما يتناه المرء يدركه ع كولة الشاعر
والظروف جانت اقوى منها
بدت الامتحانات النهائيه
هند اهله بدون يحظرون للسفر
لمى دخلت بشهرها
صار اخير يوم بالامتحانات
وبدى تسليم الكتب ولازم نسوي برائة الذمة
لمى وهند سووها
بس اني ونورا خليناها ع باجر ...
لان عمار كلي خليها ع باجر حته نطلع اني وياج للمطعم واتوادع وياج
ونورا كالت هم اخليها ع باجر خلي اشبع من الكليه
اصعب يوم مر علينا خلال السنوات الاربعه هو هذا اليوم
معقوله راح نفترق معقوله بعد مانكعد سوى مانضحك وننصب ع الطلاب
بعد محد تشكي همومها للثانيه
ظلينا نبجي
القسم او بالاحرى الكليه صارت عبارة عن عزه
الطالبات يبجون ويتوادعون
والطلاب كانما مرة وميت رجلها وتنحب عله
اووف هاي هو بعد راح نتفارق
وراح تظل بس الصور تذكرنا بالكليه وذكرينا بالايام الحلوى
كل مكان بالكليه اله ذكرى جميله
هذا المكان كعدنا بيه هذا ضحكنا هذا زعلنا
وووو
اربع اسنين مرت كانما اسبوع ... اذكرت اول يوم من اجيت اسجل
اني وليث وشفت القطعه المكتوب عليها
تجمعنا غرباء وافترقنا احباء
هند اهله ينتظروها لان موعد طيارتهم العصر
ابوها اجاها للكليه وقبل لاتروح انطتنا رساله وصتنا نطياه لاستاذ طارق ع باجر
لمى كذلك اجه عليها الخط ونطتنا رساله نطيها لياسر
بعدها رجعنا اني ونورا
ثاني يوم داومت اني ونورا ... عمار جان ينتظرني حته نطلع
كمت تسليم الكتب وبراءة الدمه
اتصل بيه وكتله بس اودي الرساله لاستاذ طارق اني ونورا
ماقبل اروح وظل يحجي علي ..كلي خلي نورا توديها
سلمت ع نورا وطلعت اني عمار
صعدت بسيارته حسيته مرتبك ومتوتر
شغل اغاني رومانسيه واني مندمجه وياه حته ماحسيت ع الطريق منين يروح
احجي وياه يهزلي براسي اي ويبتسم
انطاني معطر كلي شمي هذا حلو
رش ع وجهي
بعدها ما حسيت بشي
