ياسر: صعدت بالطياره اجيت اريد اكعد بمكاني لكيت وحده كاعده بمكاني واني جنت ضايج فول اتعاركت ويه امي تريد تزوجني وحده من بنات خواتهه كتلهه ماريد ازوج وصار كلام مني ومنهه فبست راسهه وطلعت بسرعه كلش ضايج لان خفت اتاخر عالطياره اجيت لمكاني اباوعلهه بنيه حلوه ورشيقه وحنطاويه كلش معانيهه حلوه وعيونهه كبار عبالك بحر يحجن بوحدهن كتلهه هذا مكاني كالت اريد اكعد يم الشباك اكعد بمكاني كتلهه شنو شعبالج انتي ابيتكم حتى تكعدين يم الشباك فهي كبل باوعتلي بنظره غريبه اكيد حقدت عليه وكامت كعدت بمكانهه والطريق كله حاطه الهتفونات بأذنهه وحاطه عطر يكتل بس اني شايل فكرة العلاقه والحب والزواج من بالي لان البنات خاينات ومو وفيات شكلهن حلو من الخارج بس داخلهن اسود.
جنا: كضيت الطريق كله حاطه الهتفونات بأذني وهو هم حاط هتفونات ومغمض ومرجع الكرسي ليوره بس كلساع اباوعله بدون ميدري مادري صح ضجت منه وحقدت عليه من وره اسلوبه بس ماعرف ليش كلساع اباوعله😔. كاعده اني وسمعت وحده صاحتني من الكرسي الوراي باوعتلهه طلعت مره عجوز كتلهه هاا خاله اؤمري كلتلي يمه بعد شكد ونوصل كتلهه خاله والله مادري اول مره اسافر لألمانيا خلي اسأل هذا الولد باوعت عليه ضليت متردده اكعده او اسأله خاف عباله دا اتحجج احجي وياه
ياسر: اني سمعت المره تحجي وياهه بس سويت نفسي نايم وضليت انتظر تسألني بس تاخرت
جنا: اوف ضليت متردده بعدين اتجرأت وسالته كتله بلا زحمه ورجعت عدتهه هو ميسمعني بعدين وخرت وحده من التفونات من اذنه جان يباوعلي اجت عينه بعيني ضل مركز بعيوني اني كبل دنكت وكتله بلا زحمه هذه الحجيه تسأل شكد ونوصل
ياسر: شفتهه خجلت ودنكت من باوعتلهه حلو الخجل عليهه. كتلهه بعد ساعه تقريبا ونوصل كلتلي شكرا كتلهه العفو
جنا: كلي بعد ساعه ونوصل بس حيل خجلت من ركز بعيوني اكيد صدفه ميقصد😖. بعدين كلت للحجيه خاله بعد ساعه ونوصل كلتلي مشكوره بنيتي كتلهه العفو. وره شويه حطيت الهتفونات بأذني ونمت
ياسر: شفتهه نامت صار عندي فضول اباوعلهه وهي نايمه معانيهه حلوه بعدهه صحيت ع نفسي كلت شنو هاي شدا تسوي انت متعجبك اي وحده ورجعت حطيت الهتفونات وهم نمت
جنا: حسيت احد دا يكعدني فتحت عيوني شفته هو دا يكعد بيه كلي اكعدي وصلنه شنو منايمه ابيتكم ووياهه ابتسامه استهزاء. ضليت صافنه هذا شبي وياي ردت ابجي الا شويه بس كلت فشله من الناس ولازم اصير قويه ماخلي هذا المكروه يتغلب عليه
ياسر: وصلنه وهذه نايمه كعدتهه كتلهه شنو منايمه ابيتكم باوعتلي وخزرتني رادت تبجي خرب ضحكتني بس لزمت نفسي كدامهه وعفتهه وكمت
جنا : بعدهه نزلنه من الطياره هو يمشي كدامي كلت اي واخيرا راح اخلص منه وفعلا اخذت الجنط مالتي وتوجهت لباب الخروج لكيت دا ينتظرني واحد علمود يوصلني لجامعه اسلم اوراقي واروح للقسم الداخلي حتى استلم غرفتي وفعلا وصلت سلمت اوراقي ورحبو بيه ووصلوني لغرفتي طبيت لكيت وحده بالغرفه سلمت عليه
رند: هلاوو اني رند زميلتج بالسكن
جنا: اهلا وسهلا واني جنا اتشرفت بيج حبي
رند: اليه الشرف حبيبتي. انتي عراقيه مو
جنا: اي من بابل وانتي
رند: والنعم من الحلاويه اني سليمانيه
جنا: هلا والله بالكراد هههههه. بعدهه تعارفنه وتفقنه نكون اصدقاء. ونوب خابرت اهلي طمنتهم وصلت .انوب عزلت غراضي صار الليل كلت خلي انام تعبانه اجه ابالي هذا الولد ابتسمت ع تصرفاته وياي بالطياره يعني مو كلش اهتميت وصراحه اني كل همي ارجع لاهلي ماخذه الدكتوراه وارفع راسهم بعدهه نمت. وره يومين بديت اخذ ع المكان وعتمد ع نفسي بس بعد سبوع يبلش الدوام والمحاضرات. الصبح كعدتني رند
رند: اكعدني كافي نوم
جنا: ولج شكو من الصبح مكعدتني
رند: اني يوميه متعوده اركض من الصبح وانوب انتي هم تركضين وياي منا وهيج دوام لازم تبدين تتعودين تكعدين من وكت
جنا: وانتي شعليج ماريد اكعد روحي😴
رند: كومي والله ماخليج تنامين
جنا: خرب كعدت يبوووو عليج اخلص من امي تجين انتي😡
رند: عفيه بالشاطره يله بسرعه بدلي
جنا: غسلت وبدلت لبست تراك رياضي لونه اسود واحمر كلش حلو وكبوس ولفاف ع ركبتي لان الجو وبارد مو مال البس حجاب ميدفي وحذاء رياضي. طلعنه اني ورند ركضنه شويه وجان يدك تلفون رند اضاهر هذا الحب مالتهه لان كلتلي روحي كدامي شويه واجي
كتلهه اوك ضليت اتمشه والهتفونات بأذني فالتفتت ليوره اريد اشوف رند اجت ماحسيت الا واحد اصطدم بيه وكعن الهتفونات وتلفوني اطشر من الوكعه خرب صفنت ع تلفوني بالكاع كلت الا احركه هذا الوكع تلفوني وبضوجه باوعت طلع هذا نفسه الولد الي جان وياي بالطياره.....
وللحكايه بقايه 😉
