ذلك الغريب ١ القصه قديمه ومنشوره في بيج قصص مروه وزينب
زينب الموسوي
حين نخلق منختار اهلنا ولااسمنا ولاحتى شكلنا نكبر ويبقى الاخرين حولنا يتصورون الهم الحق بفرض ارادتهم علينا ويملون علينا رغباتهم واحنا علينا السمع والطاعه اليوم القصه تتحدث عن حياة خطأ فرضت على فتاة نتيجة هذه الحياة ارتكبت بعض الاخطاء
مريم الطفل الثالث من بين عائله تتكون من اخ سنان الكبير واخت ريم واني مريم ماما تزوجت قبل متعرف بابا شخص بعد علاقه انكشف امرها من اهلها والولد تقدملها حتى يلمون الموضوع زواجه طول ست اشهر وتطلگت مگدرت تواصل حياتها وهي تسمع كل يوم كلمة اني انجبرت عليچ من زوجها رجعت لبيت اهلها كان عمرها ١٩ مطلقه في هذا العمر وبمجتمع مثل مجتمعنا ممكن تتصورون طبيعة الحياة الي عاشتها بيت اهلها من حسن حظها كانت جميله وعدها جار تقدم لخطبتها اسمه عادل اهله حاولو يمنعون هذا الزواج لان ميصير شخص ممتزوج يتزوج مطلگه وكانما هناك حكم سماوي يفرض هذا الشي لكن عادل اصر واخذ ماما اسمها سهير وتزوجوا بيت اهله وبدا دور العمه وهي الاله المسلطه على زوجة الابن وكل شويه عادل عاف بنات عمامه وخواله واخذ مطلگه المفروض يسوون منطقه عزل بين البشر والمطلقات حتى الناس ترتاح للاسف هذي نظرت مجتمعنا كبرت المشاكل بين ماما واهل بابا رجع ماما لاهلها وسافر لغير محافظه بعد شهر ماما عرفت هي حامل واتصلت بابا هناك ومن سمع بلغها تسوي جواز حتى يطلعون على الاردن سافرت ماما بس بقت مشاكل ويه بابا وصار عدهم توأم سنان وريم انولدوا بالاردن. ومرت الايام بيهم والسنين حصلوا لجوء بامريكا بهذا البلد تخاف على نفسك. وعائلتك من الانجراف وتريد تحميها باي طريقه اني انولدت بامريكا بابا كان مدرس اسلاميه وحرص على تربيتنا تربيه صارمه وعلى تعليمنا اللغه العربيه ريم لبست حجاب من عمر خمس سنين واني عمر اربعه وحتى سنان مكان مسموحله يختار ملابسه من وصلنا للاعداديه بدت تعليمات جديده بابا فرضها علينا. مااريد اختلاط بس بالعراقيين وممنوع اي ولد تحجن وياه واي وحده ملابسه حجاب متختلطن بيها وانت سنان بنات ممنوع لا عربيات ولا امريكيات حتى سلام ماكو مااريد احنا مو امريكان والي ميعجبه العراق موجود
هذا كان حچي بابا. بذاك الوقت تمنيت اساله انت الي جبتنا هنا امريكا مادزت علينا بس خفت من رده فعلهً مشت الحياة بينا وماما وبابا يراقبون ويحاسبون ويمنعون ابسط الاشياء بالمدارس عدهم درس الرياضه اهم درس ويكون مختلط وملابس رياضه لازم بابا اجه على المدرسه وتعارك وياهم ومقبل نلبس مثلهم اني وريم كانت درجتنا f يعني رسوب بس اتفقنا اني وياها نلبس بدون مابابا يدري اعرف خطا بس الي يعيش هنا لازم يقدم تنازلات ولو سامحلنا نلبس برضاه مالبسنا من وراه بابا وماما كانوا يمنعون نقاش باي موضوع لا وخلص يعني اذا اريد اروح للمكتبه استعير كتاب ويه صديقاتي العصر ميقبل حتى لو كان هذا الكتاب واجب يومي واخذ عليه درجه وحتى سنان كان يتعامل نفس الشي بابا كان حابسه بالبيت وحتى سياقه ميخليه يتعلم كان يگول احنا مسلمين اني رغم. طفله بس اعرف الاسلام دين يتطور مع العصور ويسمح بهواي اشياء احنا نعتقد حرام
