ذلك الغريب ١١
زينب الموسوي
وافق يقدم معامله بس لازم انتظر الجواز حتى اثبت بالقنصليه اني امريكيه كنت نايمه بالليل وفزيت على صوت ضرب نار واسلحه وزجاج يتكسر وصريخ الاطفال اريد اعرف شديصير الضرب مستمر وحتى حچي نسيته نزلني غسان وكل الي بالبيت گعدوا تحت الدرج والرياجيل شايلين سلاح بقى الضرب ساعتين من خلص سالتهم شنو هذا الضرب گالوا عشيره هجمت على عشيره هاي حرب ياعشيره صواريخ وقاذفات ياعشيره عدها هذا الاسلاح. كل العشاير عدها وباچر احنا نرد عليهم
اذا عدكم هالگد سلاح ليش متتبرعون بيه للجيش الي يخلص عتادهم ويظلون محاصرين هاي امور متفتهمين بيها انتي. فهمني زين عليمن شنو اسباب هاي الاشتباكات
خلافات عشائريه هدأت الامور رجعت لفراشي واني ارجف تلفونات الولد مابطلت وتهديد ووعيد خاصة ابو غسان عبالك قائد عسكري الصبح ولا واحد راح للدوام والسلاح والزلم انملى البيت ماادري منين هذا السلاح انواع منو يبيعه الهم وشنو هذا الخلاف سالت النسوان نفس الجواب عشاير بيناتها. يعني على ارض فلوس نسوان شنو الخلاف هنه همه ميعرفن باليل طلعت سيارات وسلاح وزلم معقوله ماكو سيطره تشوفهم بس اكيد ياخذون طرق بعيده وتكررت هذي الحوادث اسبوع ليله عشيره غسان تضرب وليله العشيره الثانيه اسمع جرحى وقتلى بالموضوع قررت اراقب وافتهم ماابقى بغرفتي وماادري شيصير اعرف من امريكا هذا السلاح والضرب والزلم دانما وراه اعمال غير قانونيه واني عايشه بنصهم وابني راح يتربى وياهم كان تنظيف الديوانيه عدهم كل يوم على وحده لكن خالتي متخليني انظف لان حامل ولان الديوانيه كبيره اصريت انظف اني ويوميه اريد اسمع حچي ابو غسان وتلفوناته شبيها
دخلت سلمت عليه رد عليه
بنتي انتي حامل عوفي التنظيف
لا عمو اخلص وقت ومراح اضايقك هسه اخلص ظليت انظف لحد مادگ تلفونه اخذه وطلع يسمونه البراني رحت اسمعه بدون ميدري سمعت اشياء غريبه ومبالغ دفاتر وشدات ومن ضمن الي گاله احنا خلينا بالكرستال الحشيشه مامرغوبه
حفظت الكلمتين وصعدت لغرفتي ورا ماكملت تنظيف دخلت على الگوگل طلعت معنى كرستال وحشيشه مخدرات تغرق المحافظه كتبت اسباب الخلافات العشائريه بالمحافظه طلعت يتعاركون على تجارة المخدرات وهاي العز والفلوس والاكل الي ينشمر يوميه من تجارة المخدرات ظليت حايره اگول لغسان اظل ساكته فضلت ابقى ساكته واقنع غسان اسافر اجيب هناك رفض هذا الشي
اني مناقصچ تجيبين هنا وتسكتين ترى الضغط عليه بالشغل واصل حده زين وعليه تحقيق واحتمال انفصل او استقيل
على شنو التحقيق غسان
مقاولين ميخافون الله انطيهم مناقصات ياخذون فلوس المقاوله وينهزمون
يعني المخدرات مالها شغله
يامخدرات شدتحچين انتي
انت وابوك تاجرون بالمخدرات والسلاح هذا حتى تحموون تجارتكم
والله لو مو حامل واخاف على ابني مااخليچ عايشه دقيقه بعد مااسمع هذا الحچي ابد والله اخلي حياتچ ثمن
الغضب الي چان بيه اكدلي صحة معلوماتي اني بنص تجار مخدرات
ظليت اخابر ماما يوميه على الجواز لحد ماگالت وديته على عنوان غسان ومن وصل غسان گلي انطيني ابني وروحي روحه بلا رجعه بعد شهر استقال غسان الحزب الي هو بيه ضاغط عليه حتى لتصير فضايح ظليت انتظر ولادتي وتصورت الموضوع سهل انطيهم الطفل واسافر لكن من ولدت انولد ويه ابني علي الشعور بالامومه والحنان والخوف على هذا الكائن الرقيق الي ماله ذنب بهذا الوسط الي انولد بيه من طلعت من المستشفى صارالضرب والهلاهل هواي حياة هذا الطفل راح تكون سعيده اذا تلگوه بالنار والضرب
كرست كل وقتي لابني شوفته الصبح كان مصدر سعاده الي وسط هذا الواقع المفروض عليه وغسان جاب مره للبيت تساعدني بيه مكنت اعتمد عليها الا مرات من اريد انام واتعب من السهر خاصة الظهر اخليها يمه المره اسمها ام نايف صار عمره شهرين طلبت من غسان اخذه اسجله بالقنصليه حتى تطلعله اوراق امريكيه ثبوتيه وافق ورحت سجلته بالسفاره سالني ليش متسافرين مو گلتي تجيبين وتروحين لاهلچ
انطيني ابني وبعد متشوف خلقتي ابد
وابني تاخذيه هناك وبعد مااشوفه وتربيه مره
اقدملك معامله وتعال يمتى متريد احسن ماباقي تاجر بالمخدرات وتدمر شباب محافظتك
اسمعي زين انتي هسه الي متريدين تسافرين لان متگدرين بدون علي والبقاء عندي بشروط شغلة المخدرات تنسيها وتسكتين وكل الي اريده يصير بدون متناقشين ميعجبچ اذبچ بالدرب واخليچ تتحسرين على شوفت ابنچ
كان هذا اسلوب غسان كل مااعارض بشي يهددني ياخذ ابني وتحملت اهاناته وضربه والشغل الي ميخلص بيتهم لحد ماكرهت كلشي بحياتي اول ماكرهت اهلي وغسان وظليت عايشه حتى اربي ابني وماانحرم منه فكرت الف مره اخذه وانهزم بس اوراق علي واوراقي عند غسان وماعندي احد يساعدني واكثر من هذا صارت بينهم وبين تجار خلافات وبدوا يخافون باب البيت يقفلوها بسلاسل والشبابيك كلها حديد وناس رايحه جايه على ابو غسان ومن سألته جاوبني مشيات بينا وبين تجار يطلبوونه فلوس
وليش متنطوهم فلوسهم
غشونا بالبضاعه احنا اغبياء ندفع فلوس بضاعه مضروبه نايمه على گلوبنا
البضاعه مخدرات مو
ليش متنچبين احسن ماابتلي بيچ
غسان تجار المخدرات ماعدهم رحمه يدخلون علينا يكتلونه كلنا
واحنا تايهين عدنا الناس الي تحمي
تحميكم بفلوس والي يدفع اكثر يصيرون وياه
كلهم ولد عمامنا لاتخافين
بقيت اسمع التلفونات يوميه اتفاق شكل ويوميه مشيه وعرك وصياح وضرب كنت افكر بوسيله تنقذني اني وابني مالگيت غير الدعاء الله يفرجها
بيوم احد كان غسان وابوه رايحين لمركز المحافظه وعلي بدا يسنن واليل كله يبچي ومنايم وجه الصبح نام صحت ام نايف وصيتها
ام نايف فدوه لعينچ علي نايم واني سهرانه الليل كله راح انام وخليچ يمه من يفز. گعديني حتى انطيه العصاره تهدأ الالم سوده عليه يصرخ من اسنانه
روحي يمه نامي واني يمه ارتاحي
الليل كله منايمه خليت راسي ونمت بين النايمه وبين لا سمعتها تخابر واحد اسمه جبار ماركزت واخذتني النومه
