ذلك الغريب ١٢
زينب الموسوي
صحيت من نومي ساعه وحده الظهر معقوله علي لحد الان نايم رحت على غرفته السرير فارغ نزلت يمكن ام نايف نزلته للمطبخ لان وكت غدى دخلت المطبخ خاله وين علاوي
فوگ خاله بغرفته. لا خاله مو بغرفته خليته يم ام نايف ام نايف راحت لبيتها من شوكت خاله شتحچين ابني وين ام نايف وين بيتها تلفونها غسان وين ابني وين وديتوه
ولچ يمعزايه وين راح الولد. وبدا الكل يركض بجهه معينه ويدور والخوف كبل ادينا ورجلينا اتصلوا بغسان كان قريب خالتي طلعت للحرس برا موجود بس واحد گال اجيت ب١٢الظهر جبار كان بمكاني اتذكرت اتصلت بواحد اسمه جبار قبل لاانام وصل غسان وابوه دخلوا عليه ويامن اتفقتي واخذتي الولد
غسان اريد ابني لاتخبلوني وتذبون الغلط عليه اريد ابني هسه
انتي اتفقتي وياها وخطفته
لك غسان شدتحچي اذبحني بس جيب ابني اتصل بيها منين جبتها وين عنوانها وهذا جبار اتصلت بيه سمعتها لاتضيعون الوقت اريد ابني
اخذتني خالتي واني مااعرف شسووي ميت مره ردت اطلع الشارع ويلزموني ظلوا يتصلون التلفونات مغلقه طلعوا اخوان غسان يدورون العناوين كانت كلها وهميه لحد العصر اجى اتصال لغسان عرف علي خاطفته الجهة الي تطلبهم فلوس ومنطين لام نايف فلوس ومتفقه ويه جبار يساعدها تطلعه
بدوا يجتمعون وكل شويه خطه وقرار واني اتوسل بيهم انطوهم فلوس بس خلي يرجعوه باليل طلعوا جابوا بنيه هم مخطوفه البنيه كانت دكتوره وكانت تسد عيادتها واخوها وياها ضاربين اخوها على راسه وخاطفيها صعدوها للغرفه واتصلوا باهلها البنيه اهلها مخاطفين ابني بس من عشيرتها ومقربين من الشيخ
غسان شتسوي انت ابنك عد عصابه وانت تروح تخطف وحده متخاف ليكتلون ابنك
انتي اسكتي لو حريصه على ابنچ محد خطفه
يعني اني السبب مو اجرامك ولا اختيارك لام نايف والحرس مو گلت كلهم عمام
روحي عني هسه خليني افكر
غسان ميراد تفكير انطيهم الفلوس ورجع علي سوده عليه هو مريض واسنانه يمه علاوي شديسون بيه هسه
طلع غسان من الغرفه ومر اليوم الثالث جتي ناس للديوانيه واني اسمع كل كلمه ودموعي مابطلت نوم مشايفته باليل اجى رجال بيده ملحف علاوي اعرفه شفته من شباك المطبخ ركضت فتحت الباب باوعت علاوي ابني اخذته بحظني وگعت بالگاع التموا كلهم عليه يريدون ياخذونه مني مانطيته لاي واحد ونفس الرجال اخذ الدكتوره يرجعها لاهلها بين مصدگه وبين لا باليل شفت علي بس نايم لابچى لا جاع بديت احرك اديه ورجليه حتى يگعد شفت على اديه اثار ابر صحت غسان يمكن اني غلطانه شافه گلي الصبح اخذه للدكتور بقيت يم سريره الفجر بدا يصرخ وميقبل يرضع واعراض هواي ظليت شايلته اليل كله وهويبچي طلع الصبح اخذنا لمستشفى اهلي تحاليل وفحوصات عرفنا منطيه جرعات مخدرات حتى ليبچي والمخدرات مااثره على الكبد ومضاعفات كثيره من سمعت كلام الاطباء هان عليه كلشي اخذت ابني وركضت للشارع اريد انهزم مو كافي اني حياتي ضاعت ومحبوسه بنص ناس مجرمين غسان كان وياه السايق. لحگوني ودخلوني للسياره غسان كل غضبه طلعه بيه ضرب ومسبه لحد ما وصلنا ضليت اصرخ واعيط يريدون يفتهمون شيصير هو حچالهم وبدوا يسكتوني ويگولولي ناخذه للامارات
لا امارات ولا غيرها انطوني ابني اسافر بيه وكل الي تريدوه اخذوه اكتب الكم تعهد يصير زين واخذوا ابوه يروح وياي اوصله لهناك وارجع رهينه عدكم بس انطوني ابني ديموت حرام عليكم
متسافرين هناك يسالوچ شلون اخذ مخدرات هذا طفل امريكي ميسكتون عنه
يعني خايف على روحك مو عليه انطيني تقارير الاطباء وبيها مسجل مخطوف
ماكو تقارير انتي شتحچين اخذه لدبي وكافي
والله احرگ نفسي وافضحكم اطلع اروح للقنصليه انطوني ابني
مكان عدهم جواب الا الضرب والحبسه واخذوا علي مني توسلت بخالتي تنطيني موبايل انطتني اتصلت بامي
شگول عليچ يمه ابني اذا مات انتي الي كتلتيه شمرتيني حتى ماسالتي نفسچ ليش مااتصل بيكم متعرفين تجين زياره تشوفيني شسويت وعاقبتيني هيچ
على كيفچ يمه مريم غسان يگول علي مابيه شي واخذ لبغداد وديعالجه واذا تريدين اجيچ
لا اريدچ ولا اريد شوفتچ بس انتي وبابا وسنان اكبر مجرمين بالدنيا
ورا ماسديت التلفون اتصلت بالسفاره طلعت رقمها من الموقع الالكتروني كانت جهاز رسائل الي يجاوب تركت رساله الهم بس حتى لو يجاوبون رقم عد خالتي
اتصلت برحاب
هلو رحاب شلونچ اني مريم
مريم وين چنتي صارسنه مامتصله
رحاب مااگدر احچي هواي اتصلي بالشرطه على اهلي حتى يضغطون على غسان ينطيني اوراقي اني محبوسه هنا وهذا الرقم لتخابرين عليه اني احاول اتصل بيچ
مريم اهلي ميقبلون تصير مشاكل بين اهلنا ميخلوني اتدخل
لافدوه رحاب ماعندي غيرچ سوي حل ذولي مو اهلي واني بس اوصل افضحهم
بقيت انتظر واني اشوف ابني يموت وحتى رضاعه بطل عايش على المغذيات وكل شويه اتوسل بغسان يتركني اسافر ميقبل ومرات اتعارك وياه
ثاني يوم الفجر اتصل سنان بغسان گله انطيني مريم
لچ متستحين من الي سويتيه بابا وماما راحوا تحقيق شلون اتصلتي بجي عندچ رقمه لحد الان والشرطه تجرجر اهلي من وراچ
وانت محد جرجرك اسمع سنان گدامك يوم واحد تقنع غسان يعوفني وينطيني اوراقي واخذ ابني وعالجه والله الا ادفعكم ثمن حياتي وحياة ابني مااتصلت بجي اني اتصلت برحاب بس خافت تبلغ عنكم وتصير مشاكل واكيد اتصلت بجي حتى تنقذني وتنقذ ابني طلعوا احن منكم عليه شسويت وعاقبتوني وحرمتوني من عيشتي ودراستي وانتم مرتاحين هناك
وحتى القنصليه اتصلت بيها وانطيت عناوينكم هسه تشوف اذا مادخلتكم السجن هذا غسان خليه ينطيني اوراقي
حچوا غسان مقبل وسمعته يگول لاخوي الطفل حالته متاخره بعد ميفيد لاسفر ولا علاج ومريم تريد تجي تتونس تسوي نفسها تحبه اكثر مني
وظلوا بنقاش وعرف اهلي محققين وياهم ورايدين رقم تلفوني ومكان اقامتي وخاف لا يجوون على العنوان واحچي عن مخدرات وسلاح وخطف قبل اسافر انطاني اوراقي وراح حجز الي طياره باليل سات حالة علاوي اخذ ابوه لللمستشفى ومقبلوا ياخذوني ورا نص ساعه اتصل على اهله علاوي مات
