ذلك الغريب ٧
زينب الموسوي
اتصل جي باليل وكان يحچي بصوت ناصي وسالته
امك وابوك ميعرفون دتخابر
لا ميعرفون ناموا يله اتصلت
وحتى بالشغل متحچي وياي گدامهم الا بامور العمل ومتگلي بيبي وهاي سوالفكم تصيح اسمي وبس
اريد اسالچ شلون متحملين ليش عايشين اذا الحب تخفوه شنو قيمة ااحياة زين والي تكرهوه هم بالسر
لا شلون بالسر الا نگله متشوف الدول العربيه مگلوبه لان احنا نعرف نعبر عن الكره
اني مااگدر احنا عايشين حتى نحب وننحب ليش نضم خلينا احنا مختلفين انتي تريدين تضمين عن اهلچ بس اني مااگدر اهلي يفرحون من يشوفوني احب
بس احنا ماوصلنا لهنا
انتي ماوصلتي تحبين التعقيد اني وصلت
جي احنا من عالمين مختلفين
هاي حياة مو جنه وكلشي بيها كامل شوفي امريكا ماكو فرق بين البشر كلها متساويه والمشاعر موبدينا الله نزلها علينا منگدر نتحكم بيها انتي عربيه مسلمه واني امريكي مسيحي يعني شنو الي اگدر اسويه اخلي قوانين لگلبي هاي عربيه لازم مااحبها اذا هيچ ميسموه حب يسموه عنصريه
مرات تحچي حلو واصدگ ويعجبني حچيك بس مو دائما مرات
واني شوكت اعجبچ من تحسين گولي لتظلين متمسكه باحنا وانتوا
اوكي وعد اذا حسيت اتجاهك بالحب اگول
سديت التلفون بيني وبين نفسي يامريم ياچذابه اذا حسيتي بالحب لعد هذا شنو بث تجريبي اشتغلت وياهم بعد الامتحانات وامه اسمها اودري صارت صديقه اليه وجي كان يعبر عن مشاعره گدامهم ولامره خلوني احس اني اختلف او غريبه لكن امه كانت ممقتنعه بالحجاب وتگلي انتي زغيره وافهمها الحجاب ماله علاقه بالعمر مدام مسلمه لازم اتحجب مرت شهرين اشتغل وياهم ومرات امه هي توصلني للبيت ومرات تطلع تحتاج شغلات تاخذني وياها حبوني وحبيتهمً والاهم حبيت ابنهم
جي شاب متعود على طبيعة علاقتهم يعني الشاب من يعترف للبنيه بالحب لازم علاقتهم تتطور وتتحول الى علاقه جسديه ماعدهم ينتظر الزواج وبيوم كان المطعم مشغول كله ايطاليين گرايبهم واصدقائهم وتعبوا هو والده وتاخرنا كانت امه موجوده واريد اطلع حتى توصلني شفت جي گبالي ولزم ايدي وكان يريد يتمادى اكثر دفعته
جي العلاقات عدنا بدون لمس ممسموح ادري متعرف لذلك مراح ازعل بس مره ثانيه مااكدر حتى اشوف وجهك بعد
وشلون تعبرون عن مشاعركم واحد للثاني
حچي وتسفط چذب وصدگ اغاني شعر هدايا لحد ماالله يشوف حل
يعني شنو الله يشوف حل
يعني لو واحد بالعلاقه يطلع چذاب وكلمن يروح لحاله او يتزوجون
اول مره اسمع على هاي العلاقات وانتوا من الحچي خايفين وسريه
لعد مثلكم يخلف منها تلاثه وبعدين يتزوجها
مااگدر استوعب هذا الوضع
انت حر گتلك احنا من عالمين مختلفين وحبيت تجرب وجربت هسه عندك تختار العلاقه بينا مستحيل علاقتنادتتطور لجسد اروح اني اتاخرت
كنت بسيارة امه وادركت حجم الخطا الي ارتكبته لعبت بالنار ردت اتفاخر گدام صديقاتي عندي صديق امريكي ونسيت ورا هاي اللعبه مشاعر تخصني وتخصه كانت اودري كل شويه تسالني في شي خطا صار وحزينه عليه
اي نسيت اگول الكم اليوم اخر يوم اشتغل تعرفين الكليات راح يبدي دوامها
وخبرتي جي لو ميدري
نسيت اگوله
اتصلي بيه لان يزعل اذا ماعرف منچ
راح اتصل من اوصل الموضوع صعب عليه همين وصلت البيت قفلت تلفوني ورجعت لارض الواقع جي ميگدر يتحمل هيچ علاقه وحتى لو قرر يتقدم لاهلي والدين واهلي ميوافقون الاحسن ابتعد واداوم كليه انسى مرت يومين جهازي مغلق وماما سالتني عن شغلي جاوبته تعبت مااحب الشغل والكليات راح يبدي دوامها وسنان وعدني يجيبلي سياره العصر جتي رحاب عليه
هلو رحاب شعجب تذكرتيني
اني لو انتي جهازچ مقفول تعاي اريدچ بموضوع
تعالي نصعد فوگ
بغرفتي عرفت سبب جيتها
جي خابر وامه خابرت ليش تاركه الشغل
رحاب مااگدر احچي تركت الشغل وخلص
هذا الشغل تركتيه وجي شنو السبب
بتول غلطه من البدايه واستمرت يوم يجر يوم الولد عباله يحب عربيه وهاي هيه ومتصور العربيه بس تلبس حجاب والباقي عادي
فهميه انتي مو تعوفيه هو يتصل وامه تگول اخاف احرجها بس اتمنى اتعرف على اهلها
اي فدوه هذا الناقص بعد امي وامه
شكو خلي تجي باعتبار تشتغلين عدها وصرتن صديقات
وهذا الحچي يعبر على امي لچ امي مواليد سبعين تعرفين شنو يعني عاشن حرب ايران وحرب الخليج والحصار تعرف نوع الصاروخ وهو بالسمى محلله سياسيه واقتصاديه وجاسوسه وكلشي تفتهم تجي اودري الفاهيه وامي ماتلگفهااسكتي الله يخليچ خلي ينسى الموضوع واذا خابرچ گوليله والله ماادري شتگولين
مريم احسن افتحي التلفون وتفاهمي ترى والله يدز امه ماادري حظچ وين گاعد
لو حظي گاعد چان الله خلقه عراقي مسلم الا بيها لوفه ميصير راح افتح الجهاز وافهمه اگلچ الامريكان هم من تعوفه حبيبته يحزن وينشر منشورات حزينه وينزل صوره المغذي اهم شي المغذي
اكيد وتدخل وحده على الخاص تگله منشوراتك ليش حزينه يگلها لان حبيبتي عافتني تگله اصيرلك حبيبه وتبدي القصه من جديد بس هاي سوالف بناتنا مو الولد مو هنا بامريكا كلشي بالعكس
والله خطيه شورطه ويايه
مو اگلچ حظچ گاعد وجماله ماعدها احساس
عندي احساس بس الي صار خطا وكافي بعد هسه اسبوع يشوف غيري ويعيش حياته كافي الولد انسگم
باليل فتحت التلفون واعرف رحاب خبرته يتصل واتصل بعد نص ساعه
شنو الي صار تركتي الشغل وقفلتي التلفون حاولت الزم ايدچ فهمتيني هذا مامسموح وخلص تصرفچ شنو معناه
جي وين رايحين بعلاقتنا ترى نترك بعض هسه اسهل بهواي من بعد يوم اوشهر احنا مو مثلكم انتم تحبون من اجل الحب وبس متفكرون باچر.شيصير وشنو الي راح تاخذوه من هاي العلاقه احنا لا نحسب الحب ربح او خساره وانت شاب امريكي ليش تربط نفسك بعلاقه راهب وراهبه مو حياتك هاي لاتضيع وقتك اختار بنيه وابدي وياها
والتلاث اشهر الفاتت سوا شنو كانت
تجربه ومانجحت ارجوك افهمني لايمكن تعيش حب على طريقتنا
كل هاي حجج انتي متعرفين تحبين وعندچ مشاعر البشر لعبه وسهله اني اتفرج افلام عربيه ومترجمه مابيها الي تگولين عليه بيها حب ومواعيد وكلشي مثلنا واكثر
هاي افلام سينما ابدا مو مثل الواقع الحقيقه البنيه يذبحوها اي علاقه محرمه بينها وبين رجال غريب والي يذبحها ميدخل السجن ادخل على الگوگل واسأل ليش اچذب عليك لو الي تگوله مسموح
يمكن لان متحبيني
هذا اسلوب حتى تخليني اگول لا احبك واحلف
يمكن
بس ماكو فايده حتى لو اگولها
لاتخلين حواجز وتظل علاقتنا مثل متريدين
ليش ماصرت عراقي او عربي هم ميخالف
عنصريه متحبين امريكا وحاسه نفسچ متورطه لان اني امريكي
لا حچيك مو صحيح لكن البنيه العربيه من تحب اول لحظه تخلي بالها نهاية المطاف زواج او تعتبره علاقه فاشله حتى لو حبيبها تدعمه سياره ويموت وهو جاي يخطبها
انتي فظيعه تدرين الحب مابيه حسابات تحبين وخلص
بقت علاقتي جي وامه تعرفت على امي كصديقه والامر الجديد من بدا دوام الكليه جي ظل يمر عليه ومرات نطلع سوا ومرت سنه على علاقتنا مثل علاقة اي اثنين عرب مابيها تجاوز بيوم راد يتعرف على سنان اني على طول احچيله على اخوي وشگد احبه
وشراح تگله لسنان منين عرفتني
اكوله الحقيقه هو شاب ويفتهم وعلاقتنا مابيها خطا
ميصير جي ماكو اخ يقبل اخته عدها صديق
يمكن سنان يختلف نجرب
وانت ليش تريد تتعرف عليه
يمكن نتزوج صار سنه سوا ونحب بعض
تزوجني اني والدين ميصير اخذ مو مسلم
لاتدخلين الدين بالموضوع انتي ابقي مسلمه واني مسيحي
ميصير المسلمه ماتاخذ الا مسلم وحتى لو تصير مسلم اهلي ميقبلون.
هسه انتي جربي وبعدين نعرف يقبلون او ميقبلون
بعد الحاح منه قررت احچي ويه سنان مريت عليه للشقه الصبح قبل ليروح للدوام
سنان اريد اگلك شي اعرف هو خطا ويمكن تصير عصبي بس حاول تفهمني اني اعرف ولد امريكي صار سنه
شنو يعني تعرفيه وسنه هسه يله تگولين
من اشتغلت بالمطعم وظل يخابرني ونحچي سوا وبس وهو ناوي يتزوجني
انتي مخبله شنو يتزوجچ امريكي شلون ترضين شنو ديانته
مسيحي من اصل ايطالي وادري صديقة ماما امه
ماشاءالله خوش نسب روحي هسه مريم للبيت وبعدين نتفاهم
عندي دوام بالكليه
ماكو كليه ارجعي للبيت وانطيني رقمه هذا الكلب
نطيته الرقم واني بين مصدگه وبين لا معقوله وين كان عقلي في وحده تسوي الي سويته وتعترف لاخوها
