ذكريات من الماضي الجميل

طفولتي

نشئت بمنطقه شعبيه والدي موظف بسيط خريج سادس ابتدائي مثقف يعشق القراءه هو من مواليد 1930 وقته يعني الي مكمل سادس ابتدائي مثقف والدتي ربة بيت مخلصه ثاني متوسط ايضا مثقفه هوايتها القراءه لذالك كنا جميع افراد الاسره نعشق القراءه اني ترتيبي بالعائله السابع كنت طفل عادي
البيئه المحيطه هي تحدد شخصيتك اني تربيت بمنطقه شعبيه قانون الي اعرفه ان لم تكن ذئبا اكلتك الذئاب يعني الضعيف يضيع اختي الجبيره ربتني لان والدتي انشغلت بيبتي تمرضت من اجيت للدنيا جنت كلش فقير واخاف اختي الجبيره كامت تكعدني وتضربني متخليني اغمض وهي اشترتلي اول بايسكل بحياتي اعتبرها امي الثانيه لحد الان متزعل مني ومازعل منها ابد اخويا الجبير مو بس اخ اب الي هو دخلني عالم الملاكمه تعرفون بالمناطق الشعبيه تصير غيره من واحد ينجح بمجال لذالك بدو الاطفال الي بعمري يغارون هذا الي يكول شنو امجد اكدر اكتله ويجي يحاول يضربني واني هم اردله الضربه ونتعارك وتصير عداوه وتتكرر العركات والمشاكل والدتي كلش طيبه علمتني اساعد الضعيف حرام نضرب اضعف من عدنا او ناذي حيوان حتى من جنت اصير عصبي اريد اضرب واحد نرفزني بس اشوفه الخوف بعينه اتركه ماضربه اتركه حتى لو غالط عليا او ماخذ شي مني بدت مشاكلي تكثر بالمنطقه ويا الشباب الي يعرفني يحبني واكو من يغار مني جنت رشيق وطويل وسريع لذالك فزت بطولة العراق عام 88 لفئة الشباب لوزن54 بالملاكمه بده تسمي ينعرف بالمناطق اي صديق يكلي محتاجك اروح وياه حتى لو انضرب لاعبالكم جنت طرزان ومحد يكدرلي لا جنت شاب عادي بس اعرف شوكت اتعارك واعرف قوانين العركه دائما اكون اني الاول بالضرب بس مجنت ادور مشاكل مو مثل ماتخيلتو مرات العركه تنفرض عليا مره صديق يطلب واحد فلوس رحت وياه اخذنا الفلوس العصر كاعد بكهوه اجه شقي سامع بيه خطر سريع بالسجينه اجاني كلي انت امجد كتله تفضل كال شلون تدخل منطقتي كتله نطلب هذا فلوس ورحنا شنو المشكله جاوبني انت تعديت عليا وهسه لازم اضربك كتله الكهوه شهود انت ضربتني جفيني شرك فعلا حسيت بخوف منه لان سامع بيه كلش سريع بالسجينه واني ماستخدم سجاجين بس ايدي جبرني اطلع وراه بره الكهوه حتى نتعارك واني ماشي اخذت طبله حديد بيدي اول ماوصلته ضربته بالطبله الحديد بوجه وبعدها استلمته بوكسات على وجه لحد ما وكع من وكع كومته غسلتله واخذته غديته حتى اتجفى شره بالمستقبل قبل من نتعارك ماكو عشاير وفصول تعاركنا رجل لرجل مرات اكو يروحون يشتكون للشرطه القاضي يستدعيني اطلع بكفاله وراها اعتذر للي ضربته يتنازل لان الي اتعارك وياهم بيدي بس ماضربهم بسجينه او استعمل سلاح كثرة الشكاوي عليا ومشاكلي زادت بيوم امي والعجايز مال المنطقه كاعدات اني جنت سادس علمي زينت شواربي وشعري صفر حتى انجبر ماطلع من البيت اقره للبكلوريا
اكو عجوز ام صديقي حيدر كالت لامي
ام حيدر..دادا ام امجد ابنج عليه تابعه
امي ..يا شلون دادا
ام حيدر..متشوفين يوميه واكع بمشكله
امي..وتالي دادا شسوي
ام حيدر ..لازم تكدين من 7 بيوت وتشتريله شي يلبسه
امي..شنو لاعيني شلون شيكولون علينا تالي عمري اكدي
ام حيدر..معليج احنا نلملج صديقاتج خوما صدك تصيرين مكديه
امي..يابه لو يعرف ابو امجد الا يموتني
المهم ام صديقي حيدر جمعت فلوس وانطتها لامي تشتريلي فانيله حيدر ابنها بنفس الليله اجاني
حيدر..امجد لك جبان اطلع
امجد..خرب شجابك امشي ولي طلعت لاف خاولي على شواربي كبل عيب نزين شواربنا
حيدر..لك متستحي تزين شاوربك ويضحك
امجد..شتريد امشي ولي خلي اقره عندي بكلوريا
حيدر ..لك رايح التحق للجيش وكلت ماروح الا اشوفك
امجد..يلا روح اخاف تتاخر
حيدر..ماروح اريد اضحك عليك وجر الخاولي وبقى يضحك
امجد..ارتاحيت يلا ولي نص المناهج ممكملهن
حيدر..تعال ابوسك باسني من خدي افيش بوستك تخبل
امجد..تخسه تف على شاربك ولك انا اخو حره وسديت الباب بوجه واحنا نضحك جان مبدل عسكري وشايل جنطته جنا اني وحيدر اكثر من اصدقاء واخوه من ينزل من الجيش يجيني للمدرسه يبقى كاعد على الحايط لحد ماكمل ونطلع سوه نصيع اسرار علاقتنا سوه جنا شله سيد علي وشيرزاد وحيدر واني اني جوكر ارهم وياهم كلهم ياهو عنده مشكله يجيني اني وحيدر جنا ندور بنات واني وشيرزاد ندور عركات واني وسيد علي نحل مشاكل المنطقه ثاني يوم اندكت الباب بقوه اني بالحديقه الضهر كاعد اقره لابس تراك وفانيله الي جابتها امي بمشورة ام حيدر الي راح تبعدني عن المشاكل
اندكت الباب طلعت لكيت سيد علي وشيرزاد يبجون دموعهم نازله اني حافي جنت وبالفانيله
امجد ..شكو شبيكم
سيد علي وشيرزاد ..سوه بصوت واحد حيدر كتلوه
امجد..يخسون ميعرفون صديقي منو همه انتضروني ابدل ونروحلهم نكتلهم
سيد علي ..كتلوه حمزه مات
امجد..شنو شلون شوكت محسيت على نفسي رحت ركض لبيت حيدر خافي ومصلخ ابجي حيدر جان اخويا مو بس صديقي هو من البصره اصله جان رحت للبيتهم شفت الشرطه بابهم وعياط وامه تلطم اني ممصدك البارحه جان يمي شوكت ومنو كتله رحنا جبنا الجثه من الطب العدلي وكالو لازم ندفنه بالنجف رحت وياهم بس الطريق كله مشايف حيدر بالتابوت فوك الكوستر ابجي بحركه جنت لحد ماوصلنا النجف رحنا للمغيسل صار تقريبا الوقت ب3 الفجر المغيسل طلب واحد يساعده اهله اني تبرعت اساعده وكتها اول مره اشوف ميت وجثه من طلعته من التابوت واتاكدت حيدر انهاريت من البجي هذا حيدر صديقي جنت طول الطريق اتمنى غلطانين معقوله مات بعد ماشوفه حيدر اكعد ولك وين رحت وخليتني ابو ضحكة الحلوه ولك اكعد شتريد تسوي سوي البارحه طردتك من بابنا ولك اكعد يابه ويامن بعد امشي واضحك والمن لو ادري مطاردتك من بابنا وابجي بحركه عليه دخلو طلعوني بالكوه من المغيسل طول الطريق اتمنى جذب لو اني حلم واكعد شريط ذكرياتي انعاد عليا ضحكنا مقالبنا سوه من واحد يفلس ياخذ من صديقه مناكل اكله بحدنا الا سوه ولك حيدر ارجع والتوبه اطردك اصيح مثل المخبل يلزموني ادفعهم واضرب الي يلزمني اريد ادخل اجره من المغيسل وارجعه ويايه للبيت رحنا دفناه واني ممصدك اول مره ادفن انسان حبيته وخاويته من كلبي رجعنا لكركوك جانت اختي الجبيره يمنا خطار اني مطلعت من البيت صارة عندي حاله نفسيه اغمض اشوف وجه حمزه مشايف قبله واحد ميت افز اختي
اختي..يمه اني راجعه لبغداد اخذ امجد يوصلني وهم يغير جو خطيه
امي ..اخذي يمه خطيه نفسيته تعبانه على اخوه حيدر
فاتحة حيدر اهله سووها بالبصره هناك عمامهم وعشيرتهم اني ثالث يوم من مقتل حمزه اخذت اختي الجبيره اوصلها لعيالها لبغداد وصلتها لبغداد بقيت 3 ايام هناك خابروني اهلي كالو المكافحه اجتي لمت اصدقاء حيدر واجوي عليك اني هم رجعت مرحت لاهلي رحت للمركز مال الشرطه
امجد..السلام عليكم اني امجد انتو طالبيني
المفوض..انت امجد
امجد..اي اني هو
المفوض..انت متهم بقتل حيدر
امجد..شنووو ليش وشلون
..
للحديث تتمه راح نعرف شلون وليش بالبارت الثاني
.....
#امجد