اسف من وصلت لوفاة زوجتي الله يرحمها مكدرت اكمل
...
بيوم عرفاة عيد الاضحى طلعنا نتسوك اني وياها ويا بنتي الصغيره تسوكنا ورجعنا جانت هي راكبه بالصدر واني اسوق وبنتي الصغيره وره وصلنا راس شارعنا المغرب انفجرت عبوه من جهتها اني تصوبت بيدي وبصدري محسيت بالي بصدري بس ايدي لان الشضيه بالعظم اذتني الله يرحمها هي شضايا بصفحتها واديها وبصدرها بنتي مابيها شي الحادث كان قريب من ابن اختي هو نقلنا للمستشفى فقدت الوعي بعد ما امتلى صدري بالدم ومحسيت الا بعد يومين اني بالمستشفى واجهزة تنفس لان رئتي مزروفه محد كلي هي مستشهده اسئل يكولون بخير اليوم الخامس طلعت مجبسين ايدي وعمليه بصدري كالو بعدها بالمستشفى اصريت يودوني الها والدي الله يرحمه كلي انت رجال وفقدت اخوتك 3 وزوجتك هم فقدتها الى رحمة الله من كلي والدي حسيت جمدت الدمعه بعيني ماعرف شسوي بقيت مصدوم مكدرت ابجي نفس الشي من وصلني خبر اخوتي الطلاب الي خطفوهم من كلياتهم بالطائفيه وكتلوهم مرت عليه اسؤ سنه بقيت مصدوم من اشوف اطفالي احضنهم كمت انومهم كلهم بحضني على الجربايه اخاف يطلعون للباب مابقى بيا حيل اشوف نضراتهم وهم محتاجين لامهم بنتي الصغيره من صوت الانفجار والدم ايضا مصدومه كامت متحجي اني نفسي كمت ماحجي عبالك اهبل بس فاتح عيوني وحلكي بالبيت الشغل ماروح ابد اخاف اترك اطفالي بنتي الجبيره بعد ماجانت اول رسبت لكثرة الغيابات مرت سنه صعبه عليا وعلى عائلتي واطفالي فقد الام مؤلم الاب ميعوض حنان الام مستحيل اني فقدت حبيبه وزوجه وصديقه بعد سنه وصلني خبر زواج اسماء مكمت اهتم بشي غير اطفالي حسيت كبرت 50 عام وعجزت بالكوه رجعت الضحكه لاطفالي بس من اضحك يوجعني صدري ماعرف اثر الشضيه لو فقدان الحبيبه بعدها بعامين توفى والدي بحضني جنت متماسك وطبيعي من اجه اخويا الصغير وكام يبجي اول مره ابجي مثل الطفل ماعرف دموعي سالت على اخوتي لو حبيبتي لو والدي جان عمري 43 بس بجيت مثل الطفل وهسه عايش من اجل اطفالي وبس صرت ام واب اللهم عشت حياتي الحمدلله خلي هم يعيشون حياتهم ان شاء الله بالصيف ازوج بنتي من هسه اتخيل يجيني نونو من بنتي والعب وياه هسه عمري 44بس احس عمري 70 اتمنى ازوجهم بعد ميكملون دراستهم واعتزل العالم كله اشتري كوخ صغير بمنطقه جبليه حلوه واسوي مكتبه وحديقه للورود احب الورود وزراعتها والقرأه هوايتي الوحيده اسف دوختكم واتاخرت بس اكتشفت اصعب شي على الانسان يكتب مذكراته لان يعيد فتح جروحه ويرجعله نفس الالم اسبوع صارلي حتى اكلي قل وكأبه ماكدر اكتب اتهرب من الكتابه اكتب وامسح
سلامي للمجميع
#امجد
أنت تقرأ
ذكريات من الماضي الجميل
Romanceانا لست بسياسي معروف او فنان او عالم انا رجل اربعيني كنت ملاكم مغمور اخذت بطولة العراق 88 لوزن54 لفئة الشباب وبعدها اعتزلت انشغلت بالدراسه والعمل سابقا الاهل يعلمون الشاب الرجوله ويعلمونا الاخلاق ان نساعد الضعيف حتى لو كان غريب لانعرفه طيبة القلب وا...
