هل اغفر له

البارت العاشر

#قصصي
#الكاتبه_مدن_الاحزان
#هل_اغفر_له
البارت 10
اذا ماتردون حصصكم بكيف اطلب حصتي وحدي
طال النقاش بيننا وقررنا نتصل بعمي يجي ونحجي وياه وفعلا اجة عمي وكلناله خل يحلها وديآ بيننا
طبعا عمي حجة ويه سلام بالموضوع وهو كلب الدنيا وكال ما انطي ورث وهذا تعبي وشغلي وكومة حجي بلا معنى ورفض ينطينا حقنا
من عرفت رد سلام كلت لاخوتي انا راح احط القضيه بيد محامي وانتو كيفكم بس لو كلنا بيد محامي واحد افضل نفس القضيه ونفس الاتعاب امي من سمعت بلموضوع كالت لسلام انطي اخوتك حصتهم حرام تاخذها غصب ترى الاشهر الفاتت كلها بذمتك هذا ورثهم #مدن_الاحزان

بيوم اللي رفعنا دعوة لحصر وتقسيم الارث سلام تخبل راح تعارك ويه مهند وضاربه واجاني للبيت صاير نار انا مادري بي رايح لمهند اجاني للبيت انا كنت ببيت عيالي والجهال كالو خالو سلام هنا رحت لبيتي بدون ما اكول لعدي واول ماطبيت جرني من شعري واستلمني ضرب بقيت اصرخ على صريخي اجة عدي وعمي وصارت هوسه وعدي ضرب سلام وطرده كاله ببيتي ومسؤوليتي مو من حقك تمد ايدك عليها
من طلع سلام انا من الضرب خربت واغمى علي اخذوني المستشفى ضغطي صاعد طلبت من عدي يتصل بمهند اتصل بي وطلع كذلك متعارك ويا وضاربه اتصلنا بلمحامي كال اخذو تقرير طبي اخذنا تقرير طبي اثبت تعرضي للضرب واتصلت بعمي اجاني للبيت نطيته نسخة من تقرير الضرب القديم ومن عدم التعرض ونسخة من تقرير اليوم كلت له عمو هاي اذا رفعت بيهن قضيه عليه راح يتبهذل كول له لو يقسم الورث لو اشتكي بقى عمي ساكت ومحتار بيننا .
عدي كل شوي وجايني خاف ماتعورتي خاف مايوجعج شي
واكول له والله مابي شي
_اخخخ راح اموت شلون ترحين وحدج من دريتي بي اجة ليش ماكلتي لي اجي وياج؟
_ماعبالي هيج يسوي
_لو ماذيج انا شسوي بالله
يله ماصار شي
تقرب لي وحط ايده على خدي كال والله احس كل دمعه نزلت منج جمر بوسط قلبي احس ماوفيت وعدي الج وحميتج
_لا تكول هيج انت ماقصرت
_انا اموت كل يوم الف موتة من اشوف المشاكل اللي انتي بيها بسبب نزوة حقيرة مريت بيها انا  سامحيني حبيبه قلبي انت
_عدي لاتحجي بلموضوع تعبانه واريد انام...تعبني هالعدي يعترف بغلطته ويعرف اللي صار كله بسببه .مرات احن له واشتاق له وارجع واكول لا تضعفين الباعج مرة يبيعج الف مرة
بليلتها نمت تعبانه ومن كعدت عدي هو حضر الريوك وكال لاتنظفين ولاتطبخين شي .بقى يهتم بي ويداريني اباوع بعينه ياربي نفسها نظرة الحب القديمة اذا يحبني ليش تزوج شلون طاوعته نفسه يفكر بغيري ويخلي غيري وحده بحضنه تعبت من قربه ومضطرة ابقى لان ماعندي مكان

بعد اسبوع من المناقشات والروحة والرجعه تقرر ان الجمعه اللي تجي نتجمع ببيت عمي ونتقاسم الورث بيننا
صارت الجمعه وعدي متخبل علي ماتروحين يعني ماتروحين
اي ليييش
خاف تتعاركون ويضربج
مايضرب شنو بكيفه تايهة له خواتي كلهم هناك وولد عمي
اييي لا ربحنا ولد عمج يعني اذا ضربج تختلين وراهم شنو
انا وين وانت وين
انا ماريدج ترحين ولا اريد تحصلين ورثج
ليش
لان من تحصلينه راح تتركيني
بس هذا كان اتفاقنه وانت وافقت ليش هسه غيرت رايك
ولج انت ماتحسين ماتفهمين اااخ اثاري صدك من كلت عنج قبل ١٠سنوات ثوله
انا خزرته بعصبيه وكمت من مكاني سحبني من ايدي بقوة وحضني وكال والله اتشاقة مو قصدي ضل حاضني وانا جمدت بمكاني تفاجأت منه ومن نفسي لان ماتوقعت راح اكدر اتقرب له بعد ..لحظات ودفعته ورحت غيرت ملابسي ووصلني لبيت عمي ردت انزل لزمني من عضدي اوكفي اي شي يصير خابري ولاتناقشينه تحملي ولاتعصبين ماريد يصعد ضغطج
ان شاء الله
وصلنا لبيت عمي وكانو ولد عمي موجودين تحسبآ لأي مواجهة وامي واخوتي كلهم تغدينا عندهم كان عمو مسوي ثواب للاموات ومن ضمنهم بابا بعد الغدة بدينا نناقش موضوع الورث وتقسيمه وطبعا سلام مضطر ينطينا حصصنا لان انا مهددته اشتكي عليه كان اقتراح عمي ان البيت يتحول باسم امي علمود محد يكول البيت الي وان يتقسم كل شي وتتحول الملكيه باسمنا لكن مانبيع المحلات يتقسم الربح على الكل وسلام اله نسبه من الربح باعتبار هو يمشي الشغل  على مايكدر يسدد لنا واحد واحد قيمة حصته ونسوي تنازل 
انا اعترضت
عمو انا مموافقه انا اريد حصتي على شكل فلوس
تفاجأت بامي كالت انت اخر وحدة تاخذين حصتج
ليش ماما
هذا اللي عندي سلام يشتري حصصهم واحد ورة الثاني وانت اخر وحدة لمن ماتفكرين بعقل يله احط بيدج فلوس
شقصدج ماما ليش هيج تكولين
شوفي انا ساكته لج كلت حقها تريد ورثها لكن تطلعين راجعه لزوجج باتفاق مجرد ماتحصلين الورث ونوب تطلكين لااا هاي ممقبوله ورث ماكو وشراء بيت ماكو لحد ماتصيرين ادميه من يمتا احنه بناتنا هيج تتصرف صارلج كم شهر راجعه لزوجج وعايشين زواجكم ع الورق
انت منو كال لج اكيد مهند .عفيه مهند اعتبرتك سند الي
مهند...ماكايل لها شي والله
مو مهند اللي كال ولو مهند مستحق اطيح حظه شلون يعرف ويقبل
شنو زوجج ماتنطي حقه شنو اتطلك بس احط لي بيت انا هيج ربيتكم ..الرجال شاريج ووكف بجانبج وكت اللي اخوج استغل وحدتج وضعفج اخوج ماوكف لج هو وكف لج ولا ما اخذ الجهال لااا رجعج وقبل بشروطج الطايح حظها