هل اغفر له

البارت الثاني عشر

#قصصي
#الكاتبه_مدن_الاحزان
#هل_اغفر_له
البارت 12
انغثيت من كلام عمتي ومن تصرفه وبقيت متوترة واعصابي مشدودة سويت عشا للجهال وتعشو ونامو وهو من طلعته المغرب مارجع صارت ب١١ وماكو ترددت اتصل بي اخر شي كلت ما اتصل ونمت بليل متأخر حسيت عليه دخل للغرفه اطمئنيت انه بخير وكملت نومتي .بقيت يومين ابد ما احجي وياه ولا ننجمع بنفس المكان يوم الثالث كنت اسوي عشا ودخل وراي للمطبخ بقى كاعد على ميز الطعام وانا اشتغل مريت من كدامة اريد اطلع سحبني من ايدي ولزكني بالثلاجة وكال وتالي وياج وتااالي ليش مو راضيه تفهميني؟
_لان ثوله
_ولج ياريت ترجعين الثوله مالت قبل... انا حجيت كل شي لامج لان ماريد اخسرج اريدج تبقين يمي
_ابقى وبعد كم سنه تتزوج علي مو
_صاح بوجهي ماتزوج ماتزوج فهمي كلنالج غلطت ودفعت الثمن .ماكفرت
_اي كفرت بقانون حبي الك كفرت من خسرتني حب حياتي كفرت من دمرت سعادتي كفرت من خليتني ما اوثق بنفسي واحس نفسي مو مرة كفرت
_ميخالف كفرت حتى اليكفر ممكن يتوب انطيني فرصه
_صدكني ماراح تنفع الفرصه راح نكره بعض راح اظل بشك وقلق اتوقع بأي لحظة ممكن تخون ..شلون اكدر اتقرب لك وانا اعرف انت لمست غيري وسويت لها اللي تسوي وياي شلون اصدق كلامك وانت نفس الكلام كلته الها راح تصير حياتنا كلها شك وخوف وانت نفسك مراح تتحمل
_اتحمل والله وشنو تسوين مالومج
_ماكدر والله جرحي بعدة ماطاب
_انطيني فرصه انا اداوي انا الجرحتج وانا اللي اداويج وانسيج
_ما اكدر والله ما اكدر تعب قلبي مو حمل اضغط عليه بالخوف والشك ماكدر #مدن_الاحزان
تركته وطلعت كعدت بالغرفه ابجي واحس بروحي اتكطع الف وصله ليش ليييش هيج يصير بيه ليش تنتهي حياتي

عدي تعبت منها بجي بجيت توسل توسلت شدة وعصبيه عصبت مو راضيه تقتنع ادري اذيتها بس الله يغفر وهي ماتغفر مو متحمل فكرة انها وياي ببيت واحد ومو كادر احضنها اشتاق لها ميت عليها وهي ممهتمة اصلأ حتى الكلام بيننا قليل حجيت ويه امها وكلت لها ماتنطيها ورثها حتى تنجبر تبقى عندي صح هي زعلت بس مو مشكله المهم تبقى عندي اخاف يصير عندها بيت وفلوس ونوب تطلعني من حياتها كلش اخاف تفكر تتزوج وساعتها يمكن اذبحها بيدي ولا اخلي غيري يلمسها .
حقهة تعصب لان تزوجت غيرها انا من طلكتها كنت اموت الف موته وانا افكر انها ممكن تتزوج
احبها مو بيدي والله ومصمم ارجعها واعوضها

سارة مشت الايام وفات شهر وعرفت سلام اخوي موزع عليهم راتب الشهر وانا اصلأ ما سألت لان اعرف امي ماترجع بكلمتها وبيومها تعصبت كلش وكل ساع اتعارك ويا الجهال عدي رجع للبيت حسيت نفسي اختنكت هو السبب للعصر ضربت سراوي لان توكحت صاح علي واخذها مني كال شبيج شبيج معصبه وتصيحين طفله ليش تضربيها ؟؟؟
_لان ضايجة بسببك انا مجبورة هنا ابقى واضل تحت وصايتك لو باقي ع الاتفاق وممحاجي امي انا صوجي وثقت بيك واعتبرتك رجل استند عليه
..خزرني وعيوني تجدح شرار ولزمني من ايدي حيل كال رجال وغصبن عليج والظاهر نطيتج مجال وصرتي تتمادين انعل ابو كلبي اللي حبج
__اووو والله خبصتني قلبي واحبج خلي حبك الك مشكور تذلني بيه ماريده ياريت تطلع من حياتي اصلآ
__هو طالع ارتاحي مني

بقينا على طول واحد يتجنب الثاني وهو صار ينام بالصاله ما انكر حسيت بفراغ بس كابرت وكلت مستحيل اطخ راس
صرت الاحظة موبايله ماينزل من ايده ومرات اشوفه يتصل ويطلع يفتر بالحديقه غصب عندي بدة ينزرع بي الشك
مرة طلع وترك الموبايل اخذته وشفت محادثات ويه محمد صديقه المقرب كان يكول له بتول انتقلت وصارت تداوم وياي بنفس الدائرة وبين ما اقرة هو دخل تركت الموبايل وظليت الوب شلون خاف اكو شي المحادثه كانت قديمة معقوله رجعو اي ليش لا هي سهله وماتكلفه شي وتريد بس كون زوج

ثاني يوم اجت عمتي الصبح النا لكته نايم بالصاله سحبتني على جهة كالت: يمه ابني ماقصر وياج صح غلط بس حاول بكل الطرق يراضيج وانت رافضه هو رجال واله رغباته وانا اخاف عليه من الحرام هالايام راح ادور له مرة انت ماتردينه وباقيه علمود بيت يلم جهالج خليج البيت الج هنا وانا ازوجه عندي مو تكولين عمتي هجمت بيتي انت ماتردينه
بقيت صافنه عليها مثل المضروبه على راسي كلمه مانطقت
#مدن_الاحزان
بدت تغيرات على عدي مدري انا صرت اوهم نفسي صرت اضوج من يتعطر من يتكشخ نار وشبت بقلبي فكرة انه خاني ارحم الف مرة من فكرة احتمال الزواج باي لحظة
وبيوم كان جمعه واحنا غدانه ببيت عيالي كان عمتي كالت لزوجي لاتنسى مواعدين الجماعه بال٥ العصر انا هنا قلبي وكف خفت تكون نفذت تهديدها كال لها عمي يامرة لاتلحين بالموضوع كلنا لج شغله بينهم ويحلوها
__شنو شغله بينهم حلوة هاي حياة ولدي ومو من حقي اتطمن عليهم
عدي..يوم روحي انت وحدج اول جسي النبض وبعدين انا
سارة اسمع واحس الهوة وكف مايدخل بصدري هذول صدك راح يخطبون .ترخصت وكمت
دخلت لبيتي وانا محتارة شسوي لا اكدر اكول له لا تخطب ولا اكدر اشوفه ويه غيري شلون ربي شلون
ضل ببيت اهله وبال٤ اجة للبيت عدل لحيته وسبح ولبس وانا اباوع واتكطع بداخلي انا مرته انعجبت بي وبطوله واناقته هاي اللي يخطبها بسرعه توافق لبس الساعه وتعطر وانا ماتحملت .