هل اغفر له

البارت السابع

#قصصي
#الكاتبه_مدن_الاحزان
#هل_اغفر_له
البارت 7
  وصلنا لقرار اني اروح اسكن هناك وامي وابوي يتناوبون بالمبيت عندي واختي الكبيرة ابنها بالرابع اعدادي ومدرسته قريبه علي همين يبات عندي ..هي صدك غريبه وصعبه لكن افضل الف مرة من اشوف مرت سلام شلون تحارب جهالي وتحرض جهالها يضربوهم
بعد ٤ ايام رحت لبيتي وعمي وعمتي سووها مناحة لان مر شهر كامل ماشايفين الجهال عمتي باتت يمي بيومها وحاولت تقنعني ارجع مادامني بالعدة لكن رفضت
انا بداخلي مهزوزة بيوم كنت حبيبه وزوجه كنا انا وياه مثال للحب والازواج السعداء بلحظة صرت مرأة متعرضه للخيانه وكرامتها مجروحة زوجها فضل وحدة عليها كنت احاول اتصنع القوة كدامها وبس ابقى لوحدي ابجي كانت دموعي تختلف عن اي دموع ممكن تنزل من احزن كانت الدمعه تنزل تحرق وجهي كنت احبه حييل احبه اتنفسه مو بس احبه احس نفسي مدمنة على كل شي بيه كان كل كلامي عنه وكل شي اشوفه اركض اسولف له كل شي اسوي اركض عليه واسولف له سويت كذا اذا موجود بلبيت كل
شي ما اسوي احط راسي على صدره وابقى ساكته ماريد ابتعد عنه يمكن غلطت لان حبيته وتعلقت بي
مشت الايام بحلوها ومرها وقرب وكت المدارس واخذت سرى وديتها لعمتي وكلت لها راح اخذ احمد اشتري له ملابس للمدرسه سمعت صوت من وراي من رخصتج ام احمد خلي انا اخذه اجهز له .التفت شفت عدي فات على المشكله اشهر  ماشفته ابد جاوبته براحتك وطلعت واحس كلبي يرجف معقوله وصلنا لهذا الحد الكلام بيننا رسمي اشوفه وما احظنه وما اشم عطره ااااه يانار قلبي ليش هيج عدي ليش دمرتني
رجعت للبيت وهو اخذ احمد واشتراله كل شي ورجع .بيومها بليل راسلني
شكد تعبان بفراقج وشكد تعبت من شفتج وماكدرت احضنج صدكيني ميت بدونج
ليش بعدك تفكر بي حاول تعيش حياتك تزوج ..ارجع هنا قريب لاهلك
تحرم عليه غيرج مرة
هههه بعديش حرمتها
غلطه وندمان عليها ولو تنطيني فرصه اصلحها واعوضج
عدي اللي بيننا انتهى لاتأذي نفسك وتتأمل

بقى بين فترة وفترة يراسلني ويحاول ارجع له
اتذكر قبل من اول ايام حبنا كان شاعرنا المفضل ايهاب المالكي من ينزل قصيدة حب كنت احس كلماتها النا مكتوبه كنت كل ما ازعل يرسل لي الشعر مالته... بلياك ماعيش ...
بليلتها رسلت له قصيدة ايهاب ..ع الحب كتلك البي تضحيه يعيش...
وصل له مقطع الفيديو جاوبني والله ماضحيت بيج غلطت غلطت ياحبيبتي وانت مو راضيه تغفرين غلطتي
كان يتصل بالجهال يبقى يسولف وياهم ويعرف اخبارهم
#مدن_الاحزان
بدت المدارس ورجعت لدوامي وهنا الحياة صدمتني مرة ثاني اول مرة بحبيبي وزوجي وهسه بعد ان صار اسمي مطلقه انصدمت بزميلاتي وصديقاتي كانت عندي اثنين صديقات مقربات الي كلش وعرفو بمشكلتي وطلاقي وانا ما خجلانه لان تطلقت لان مو عيب ولا حرام
العيب ان اتطلق ونوب اصير فلتانه ومومحترمة.حالنا حال اي دائرة حكوميه اكو استمارة معلومات نمليها ببدايه السنه الاسم المواليد التحصيل الدراسي وغيرها من المعلومات من ضمنها الحاله الاجتماعيه انا اشرت على حقل متزوجة لان كنت بعدني ممغيرة الجنسيه ولان اعرف النظرة الحقيرة لبعض موظفي دوائر الدوله للمطلقه من سلمت الاستمارة تفاجأت المديرة كالت لي ليش مأشرة متزوجة انا ابتسمت معناها تعرف كلت لها لان ممبدله الجنسيه طبعآ انتشر خبر طلاقي والغريب من يعرفون اني تطلقت اشوف بعيونهم نظرة اني شي منبوذ بديت احس بتغير صديقاتي من ناحيتي واختلاف اسلوبهم وياي مرات اريد اطلع للسوق القريب من المدرسه وكنت سابقآ اطلع وياهم عادي صارو هسه مايطلعون وياي كنت استغرب انا تطلقت لا سرقت ولا قتلت ولا ارتكبت فعل مخل بالاخلاق
مشت الايام وبيوم كنت بالدرس وتذكرت اني ناسيه اوراق رجعت للادارة اريد اخذ الاوراق وسمعت وحدة من المدرسات تكول لصديقتي المقربه :هيي انت لاتضلين ثوله ماخذتها ورايحة وجايه لو تكعدين النهار كله تسولفين وياها بابا هاي مطلقه باجر تلف على رجل وتاخذه جاوبتها صديقتي لااا مو لهلدرجة ..اي لهلدرجة حتى من تسولفيلها رجلي اشترالي رجلي طلعني هاي راح تتحسدج لاتسولفين بعد
هنا ماتحملت صبت دموعي دخلت كلت لها انا لو همي الرجل واريد اخذ زوجها مثل ماتكولين كان ماطلبت الطلاق وسويت المستحيل علمود اتطلق ولو احسدها ماكان تركت رجلي ودلاله الي والصرف والعز اللي كنت بي وانتن تعرفن شلون كنت عايشه حرام عليكم حرااام انا تطلقت ما اجرمت لو طالعه من الطريق وصايرة مو زينه الج حق بس لاتتهميني بتفكير مريض مثل تفكيرج
.ماتحملت ابقى بلدوام اخذت رخصه وطلعت للبيت ميته
قهررر ودمي محترق رحت بوجهي لامي حضنتها وبجيت سولفت لها وخطيه ظلت تهون عليه الى ان ارتاحيت رجعت لبيتي وقررت اني انسى شي اسمه صديقات ادخل للمدرسه انطي دروسي وبسسس لان ماكو صداقه ماكو وفه .نكول المجتمع يظلم المرأة لا عدو المرأة مرأة مثلها
بعد سنه مرت من حياتي تعودت ارتب اموري واعيش واعيش اطفالي بدون عدي كانت صعبه حيل صعبه لان هو مو بس زوجي هو صديقي وحبيبي كنت احتاج هواي وافتقدة لكن ماتنازلت ولا ضعفت
بيوم اتصلت بي اختي الكبيرة وكالت تعالي بسرعه والدي تعبان طلعت بسرعه الهم للبيت لكيته متخربط كلش وصاعد ضغطة ثاني يوم تعب اكثر واخذو للمستشفى ورة كم ساعه مات ..خبر موته كان صاعقه صابتني حسيت بس انا تيتمت كل اخوتي مو مثلي انا بدون سند بدون ظهر منو الي منو يوكف لي اذا دار بي الوكت ابوي موجود واليسوة والمايسوة يلطش بيه كنت ابجي على فقد ابوي وابجي خوف من المستقبل واردد بداخلي الهي اوكف بجانبي لاتتركني ضعيفه خلصت ايام العزا وامي كانت تعبانه كلش