هل اغفر له

البارت الرابع

#قصصي
#الكاتبه_مدن_الاحزان
#هل_اغفر_له
البارت 4
ماكنت ابخل عليه بشي اهتمام بي بلبسي ومظهري اسولف واتشاقى واتدلع عليه من يروح للدوام اتراسل وياه ما اخليه ينساني على طول ادخل على النت على موقع الدكتورة ناعمه الهاشمي وغيرها وغيرها من الباحثين والدكاترة اللي بالاختصاص الاسري اخذ بنصائحهم اللي ينشرونها
كنت اذا يطلعني لو يسوي شي يفرحني احظنه واكول له ربي مايحرمني منك انت هيبتي وسر سعادتي كنت على طول رافعه راسي بي شنو شي اريده يسوي الي...كنت اذا نتزاعل مستحيل يوصل وكت النوم ونبقى زعلانين كان نظامنا الغلطان يعتذر والثاني يقبل  الاعتذار بدون مايذله واذا سوء فهم مو شرط اعتذار هو بس احط راسي ع المخدة يسحبني وينيمني على ايده  بعد الزعل كله يروح
بعد مرور سنه حملت اول حمل الي واحتااار شنو يجيب الي والاهتمام ما اكول لكم عنه وصار عندي ولد يجنن سميناه ...أحمد... على ولادته شفنة كل الخير والرزق بنفس سنه ولادته ابو تعين ومن صار عمره سنه انا تعينت طبعآ بعد عناااء يله وافق عدي اقدم ع التعيين امورنا تحسنت ومن صار عمر حمادة ٣ سنوات حملت وصارت عندي بنوتة سميناها ...سرى....  وبعد ولادتها عدي قنع ابو ان يبني مشتمل من البيت وجزء من الحديقه وكان مشتمل صغير لكن حلو ومريح اثثنا براحتنا شي يخبببل عشت احلى ايامي بي #مدن_الاحزان
عدي دوامه مرات يطلعونة ايفاد للخارج او للمحافظات انا بيتي بي باب على بيت عيالي ومتطمن علينا الحمد لله حياه هادئه حلوة الى ان خطبو لاخو ..عمار.. وبعد الخطوبه باسبوع عزمو اهل خطيبته وراح عدي يجيب مسواك ركن السيارة بلكراج وكال طلعي المسواك رحت اطلعه وشفت التليفون بيومها انتهت حياتي انتهت سعادتي ....
وعيت على نفسي بعد ما استرجعت كل حياتي وياه غلقت الفون وطلعت من غرفتي رحت اساعد عمتي والبنات بالغدة اشتغل وقلبي يحترق اتذكر صورهم صور بالخارج صور ببيت صور بغرفه نوم صور بايطاليا الهم اتذكرت هو قبل سنه ونص سافر ايفاد لايطاليا معقوله معقوووله سنه ونص هو وياها وانا مو حاسه زين شلوون كدر مايتغير عليه ولا احس بشي وانا افكر والنار تسعر بصدري حسيت عيوني غوشت وشي حار نزل من خشمي وبعدها ماحسيت بشي بعد فترة صرت اسمع اصوات اي كعدت اي تحركت فتحت عيني بالقوة اشوف .. انا وين شصار؟
ركض عليه عدي وصوتة يرجف حضن ايدي بين ايديه..حبيبي شبيج شنو يوجعج ...اكو شي متعبج
_شصار انا ليش هنا
انت طحتي وطك خشمج دم وجبناج للمشتشفى الطبيب كال ضغطج صاعد كلش...حبي شبيج انت تعبانه من شي وما ادري ماكايله لي بي ؟؟
ضليت صافنه بوجهة يحجي بخوف ولهفه مبين مو تمثيل  معقوله يخاف عليه لعد اللي شفته بالفون شنوو. معقوله يمثل
رجعوني للبيت رحت لفراشي نمت اريد انام واسكت ضجيج افكاري والاسئله اللي تدور بدماغي نمت ماحسيت الا الدنيا مغرب اول ماكعدت سألت نفسي انا صدك كشفت خيانته هذا كان واقع لو حلم للاسف كان واقع ضلت دموعي تنزل بدون وعي .سألت نفسي انت شنو قرارج شنو تسوين ...ماكان ببالي غير اتركه لان ماله عذر ابد باللي سواه .اتصلت بأبوي وطلبت منه يجي للبيت وفعلا اقل من ساعه وهو عندي رحت صحت لعمي وكعدتهم ونطيتهم الفون شافو وقرو كل شي
عمي انا ماخليتك بظهري لان انت بمقام ابوي ابنك ذبحني انا بعد ما ابقى عنده راح اروح ويه ابوي والله يخليك كول له يطلكني بهدوء بلا مشاكل #مدن_الاحزان
لا عمي مو هيج خل نسمع منه بالاول واللي تردينه يجرالج
اتصل بعدي وكال له تعال بسرعه اجة عدي للبيت اول مادخل ركض كعد بصفي..هاحبي بيج شي خاف ماتعبتي ولزم ايدي سحبت ايدي منه ودرت وجهي ..استغرب هو وكال شصاير
ابو عدي... انت كول لنا شنو صاير هاك تفضل ..نطاه الفون ..اباع لوجهة صار اصفر وباوع عليه كال..من هيج طحتي
_اي من هيج بسببك
الاب ..شنو هذا اللي شفنا من يمته انا معلمك على هاي المكسرات والحرام مرتك شناقصها وتدور عليها
عدي..يابه ماناقصها شي بس غلطة وصارت
الاب ...غلطه ؟ غلطه عمرها سنه ونص وبعدك مستمر ولك ماتخاف من الله وانت تمشي بلحرام ولك مو عندك عرض ماتخاف عليه
عدي..يابه مو حرام انا عاقد عليها
سارة😢😢😢 عاااقد يعني زوجتك هاي ...ااااخ لو شنو اكول وشنو احجي ماتوصف احساسي نااار نااار وشبت بين ضلوعي نار تحرق رويحتي حرق
متزوجها لو علاقه اكول نزوة كم يوم وينساها بس هاي متزوجها يعني حابها ومقتنع بيها مقرر يكمل عمره وياها صح الخيانه مرة لكن الزواج الثاني اصعب وأمر لان ماكو امل بالرجعه
الاب..ومنو هاي وماعندها اهل تتزوجك بدون علم اهلك
سارة ...عمي انت كلت نسمع منه وانا سمعت واكتفيت هو متزوجها يعني مقرر يستمر وياها مو علاقه عابرة خلي وياها هو اختار والله يهني باختيارة لاتنسى وعدتني اللي اريدة يجرالي كول له يطلكني بهدوء...كمت اريد اجمع اغراضي كام عدي ولزمني من ايدي ويييين رايحة
راجعه لبيت ابوي لمكاني الصحيح وانت روح جيب مرتك وعيش هنا وانا طلكني
ما اطلك تخبلتي انت
لا عقلت ..واذا الي شويه خاطر طلك بدون ماتخليني الجأ للمحاكم
لج بابا شبيج انت ..تزوجت انا وهذا شرع الله مامسوي حرام #مدن_الاحزان
وحتى طلاكي شرع الله
طلاك ابغض الحلال
ابغض..صح لكن بالنهايه هو حلال..ممعقوله تؤمن بايه مثنى وثلاث ورباع ....
وماتؤمن بسورة كامله اسمها الطلاق
سارة ...اني طلاق ماطلق حطيها ببالج
عادي مو مشكله اخلعك
لزمني من ايدي حيل ضغط عليها تخبلتي انت ..كام ابوي سحبني منه وكال له على كيفك هي اليوم تعبانه وصاعد ضغطها لاتسوي بيها شي وساعتها تتأزم الامور
ابو عدي ..بابا سارة انت حطيتيني بمقام والدج وانا اطلب منج كعدي وياه تفاهمو وحلو المشكله واذا ماكو حل انا بنفسي اسويلج اللي تردي بس فكري بابا القرار مايخصج وحدج بينكم ولد وبنيه فكري بابا مصير عايله كامله بايدج
دار على ابوي وكال له ابوسلام انا اشوف نتركهم يحلونها بينهم ونشوف وين يوصلون ...طلعو ابوي وعمي وانا كعدت مو طايقه اشوف وجهة كعد بصفي لزم ايدي سحبتها رجع لزمها وانا التفتت بعصبيه وسحبت ايدي وكلت ايدك هاي اللي لمست غيري تحرم عليه ..وعدك اللي نطيته الي بليله العرس وخلفته تذكره وعدتني ماتفكر بغيري وهههه مو فكرت لاتزوجت ولك شلون شلووون طاوعك كلبك تحب غيري وتبقى وياي مستغبيني وتضحك عليه
مامستغبيج ولاحبيتها والله
هههه ماحبيتها وباقي وياها لعد لو تحبها شتسوي
غلطه وصارت وماكدرت اصلحها
وليش غلطت ليييش ...اصلا شوكت تزوجها شنو السبب
صفن بوجهي واخذ نفس ..من سافرت ايفاد شهرين لايطاليا هي كانت ويانا هي موظفه بنفس الوزارة لكن الدائرة اللي تداوم بيها غير بالايفاد انجمعنا كلنا بنفس الفندق طبتنا وطلعتنا سوة بدت تتقرب لي حاولت اصدها بعد اسبوعين من محاولاتها وانا بغربه وبدون مرة ماكدرت اقاوم وماردت اوكع بالحرام اصدقائي طبه وطلعه وبنات انا خفت من الحرام  واعرفها ارمله وعندها اثنين اولاد عرضت عليها الزواج ومن نرجع ننفصل وافقت وطلبت يكون الامر بالسر لان اهل زوجها اذا عرفو ياخذون الولد منها
اييي كمل
ماكو بعد
من رجعت ليش ماطلكتها ؟
كل مرة احاول اطلكها يصير شي ومن افتح وياها الموضوع تظل تبجي وتكول احبك وماكدر بدونك وانا ما ءاثر على حياتك بشي بس خليك قريب مني ..
...اييييي وانت ابو قلب الكبير ماكسرت خاطرها والله عمي تفتهم مرة  ببيتك تربي الجهال وكدام الناس زوجه ترفع الراس
ومرة بالسر للونسه والله عمي زين...شوف عذرك اقبح من ذنبك والله اسبوعين بدون مرة ماتحملت انا مو بقيت شهرين بدون رجال مو كان اولى انا اللي ما اصبر مو انتم تكولون النساء ناقصات عقل مو تكولون المرأة ماتتحكم بعواطفها من تردون تحجون على النساء كيدهن عظيم والقران يكول والزانيه والزاني قدم الزانيه لان المرأة هي اللي تبدء موووو من تردون تطلعون المرأة صفر وانتم الافضل ماتظل صفه وكلمه ماتكولوها ...تصرفك هذا مو كان انا اللي اضعف واتصرفه شهرين بدون رجل وبراسي مسؤوليه بيت واطفال ودوامي شلتهم على راسي وماقصرت ومن رجعت من سفرك استقبلتك احسن استقبال ههه وانا البطرانه على رجعتك من السفر رحت صبغت وغيرت وسويت نيو لوك اكول خطيه اكيد مشتاق لي ههه اثاري انت مسكين انتهى شهر العسل مالتك ورجعت لي ..
ولك ليش بشنو قصرت شنو ينقصني هااا
والله ماينقصج شي تاج على راسي انت
.كوم وديني لاهلي مابيننا كلام واحترامآ للعشرة اللي بيننا طلكني لان ماريد نوكف بعضنا بمحاكم
ما اطلك لاتكولينها اموت وماطلك
وانا اموت وما ابقى عندك ولك تلعب نفسي شلوون شلوون اتقبلك وانت ويه وحدة غيري شلون احط راسي على صدرك وانا اعرف غيري نامت عليه ولك ماكدر تلعب نفسي تفهم لو لا ..ولك انا اغار عليك من تسلم على خواتك وتحضنهن بنتك من تنام على صدرك اغار اكول هذا مكاني هذا مملكتي الي وحدي #مدن_الاحزان
اسف والله اسف وندمان على سوايتي بس لاتتركيني اموت بدونج والله ماعيش
هه تعيش لاتخاف ..موجودة زوجتك الثانيه .صدك اذا اهلها  مايدرون لعد هذه صوركم ببيت وغرفه نوم هاي شنو ؟
هاي شقه فوق بيت اختها مأجرتها والها درج منفصل نروح نلتقي بيها
حلووو الله لايفرقكم ..هي هاي تلوك لك .ولك انا تحطني على ذمتك وتحط هاي اللي نفسها ممحترمتها متزوجة من ورة اهلهة انا اتساوى بيها ولك انا متزوجة واحسب حساب سمعهة خواني بتصرفاتي تريد تساويني بهاي لا والله انا راح اتصل بابوي يجي عليه
_ابقي اليوم وباجر اوديج
_وشنو الفرق اليوم ولا باجر
_ابقي الله يخليج خليني اشبع من الجهال
#مدن_الاحزان
طلع عدي راح لبيت اهله لان الجهال هناك بقيت وحدي بساعتهة حسيت بمصيبتي بعد ماواجهته ومانكر لاوبعد طلع متزوج حسيت باحساس البنات اللي كنت اقرا
مشااكلهم عن الخيانه ينشروها بكروبات الفيسبوك شعور مؤلم اااخ تذبح والله تذبح حسيت انكسرت ثقتي بنفسي ماكدر احترم نفسي كأنثى كسرني من فضل وحدة غيري عليه شعور ماكدر اوصفه او اكتبه كنت احس نفسي ماينقصني شي  بس اللي سواه خلاني اشعر اني لا شئ
معقوله معقوووله انتهى هذا الحب معقوله خربت حياتي ليش بشنو قصرت ..ضحكت بداخلي من كنت اتخيل انه يخوني واعيش قصه بخيالي يمكن هذا السبب اللي خلاني صدك اتعرض للخيانه الله يكول انا عند ظن عبدي بي ماكال عند حسن كال عند ظن يعني شتظن بالله يصير لك
بقيت كاعدة بمكاني وعيوني مابطلت بجي اريد اصرخ احس نار بين ضلوعي والله ماقصرت بشي والله حبيته ودللته يمكن هاي غلطتي لو هاملته كان ظل هو يحاول يلفت انتباهي يمكن لو صايرة مثل النسوان اللي تكول لاتبينين حبج للرجال ترى يتكبر عليج