ثأر الايام
همس القوارير
البارت ١٠
بعد مرور سنه من طلاكي واني بيت اهلي تقدملي ابن عمتي امجد وهوه مدرس وعمره 40 سنه واني 28 طبعا هذا ابن عمتي جان عايش حياة زوجيه مستقره وي زوجته وعنده 4 اطفال 2 ولد و2 بنات بعد مرور 10 سنوات على زواجه اكتشف انو زوجته تخونه واكو ناس حلفت بالقران انو شافت شخص يجي لزوجته اثناء ماهو طالع واكثر من مره المهم هي نكرت وتمسكت بي بس هو طلكها واخذ اطفاله منها وهي تزوجت وعاشت حياتها وهوه بقى متبهذل وي الجهال وامه الي هي عمتي مره جبيره ومريضه بقى يخطب محد تقبل بي الى ان اجه عليه اني لان اهلي يعرفونه ويعرفون
وضعه هو انسان متدين مثقف حباب وجبير بالعمر مو مثل زوجي الاول مراهق واذا زوجته خانته فهذا مايعني انو هو مو خوش انسان بالعكس هي مو خوش وهي ساقطه وماعرفت تصون الزوج الي دللها واهتم بيها وامنها على بيته واطفاله
گلت خل ابدي حياة جديده واكسب أجر بتربية اطفاله بالاخص اني ما عندي اطفال على الاقل التهي وياهم واصير ام الهم ويداروني من اكبر وتزوجت ابن عمتي ودخلت بيته كزوجة أب ياربي عيني بحياتي الجايه يارب اني طول عمري انحرمت من الاب وحنانه انوب اتزوجت الي ماصاني واذاني وجرحني وخاني محتاجه رجل يحتويني يهتم بيه يحبني يدللني ويكون سند الي طبعا زوجي الاول عرفت وره فتره انو انلزم ابيت وحده وضاربي طلق ومكسرين رجليه وبقى 4 اشهر نايم بالفراش وماخذين منهم فصل كلش جبير وهسه سمعته زفت ومحد تقبل تتزوجه لان ماضيه اسود .
اني اتزوجت مره ثانيه وگلت خلاص انتهت احزاني وابدي من جديد من ثاني يوم العرس بدت معاناتي جانو الجهال عند امهم وثاني يوم اجو للبيت دخلو عرفهم ابوهم بيه
امجد
تعالو بابا هذي امكم الجديده
البنات سلمن
شلونج خاله
فاتن
هلو حبايبي
وسكتن وابنه الحبير
حيدر
هاي الهايشه قصدك
وطب يركض ويضحك طبعا اني انذهلت من الموقف وابو ولاكال شي ولاحتى كاله بابا عيب شنو هالالفاض هايشه يعني بقره خاف اكو ميعرفونها وطلع زوجي واني بقيت متفاجئه ياربي شنو هالاخلاق هذا شعرف مني حتى هيج يحجي المهم غلست عالموضوع كلت خلي اشوف شلون اتصرف وياهم خلي اعديها هالمره وسويت عشا ونضفت البيت وغسلت ملابس الجهال وخبزت هالحجي ثاني يوم العرس بعدني عروس يلا ميخالف بيتي وجهالي مو مشكله اهم شي استقر وارتاح صار الليل تعشينا وغسلت المواعين وسويت جاي والجهال يلعبون طبيت لغرفتي اجه وراي زوجي
امجد
تعالي يمي بسرعه اريدج
فاتن
بعد وكت شنو السالفه ليش مستعجل
امجد
لا مو اريد اروح تعاي هسه
اني هم مادققت عالموضوع اخذ راحته وياي وطلع سبح وراح يم الجهال لحد مانعسو ونامو واني انتضر هسه يجي بعد شوي يجي يربي وين صار هالرجال طلعت ادور عليه بالبيت لگيته مخلي فراشه بنصهم ونايم يمهم يااا هاي شنو شسالفه نايم يمهم راح يشردون خوما يشردون رحت لغرفتي بقيت وحدي عبالك يتيمه هسه هاي شنو تسوالي حاظن جهاله ونايم وعايفني اني استغربت الوضع كلت يجوز لان بالبدايه بعدين يتعودون ميخالف اتحمل اليوم بقيت يوم ثاني نفس الحاله تعدى اسبوع بس للاسف هالوضع ماتغيير ومابات وياي بغرفتي ولاليله يجي ياخذ حاجته ويروح ينام يم جهاله
لحد ما تعاركت وياه
فاتن
يبن الناس مو حاله هاي يعني شنو عايفني ونايم يم جهالك المن تزوجت لعد شنو المره بس فراش وهاي هيه
امجد
والله هذا الموجود ما عاجبج الباب يوسع جمل هذا وضعي هذا حالي لعد شتدرين من اخذتي واحد عنده اطفال
فاتن
اي ميخالف انت واطفالك على عيني وراسي وان شاءالله مراح اقصر وياك ولا ويه جهالك بس اني هم الي حق عليك
امجد
والله هذا وضعي غصبن عليج ما تقصرين واذا ما تردين مشكلتج انتن ما تجن اله بهيج اسلوب كلجن خاينات
ياربي واني وين ما اذبها سوده مصخمه يعني كل الرجال هيج لو اني هيج حضي اكشر والله تعبت ومليت هسه هذه هم حياة استغفر الله ربي هذا بيه حاله نفسيه مدري مصدوم مدري حضي گلبه عليه ألي الله
