ثأر الايام
همس القوارير
البارت ١٣ والاخير
فاتن
والله تعبانه وديني لاهلي اروح للطبيب
امجد
كومي اخذج لاهلج وانتي مو مريضه هذا ملعوب جديد كعدي وي اهلج وكليلهم اني مو مال زواج اني مال دياحه علمود اطلكج وديحي براحتج
فاتن
حسبي الله ونعم الوكيل
واجيت لاهلي واخذوني للطبيب ومغذي وابر وطلع عندي حمه فايروسيه واحد من عمامي انقهر حيل وجان اخوي بالدوام كال لامي
عمي
هذا زوجها صدك زودها وصارت بلا ملح يعني زوجته مريضه مايخذها للطبيب يكللها كذابه حتى لو كذابه مادام كالتله مريضه مريضه المفروض ياخذها للطبيب اله اخابره وارزله
اني بعد ماادري شديت المغذي وبنتي عند امي ونمت ثاني يوم صرت زينه وباليل اخذت بنتي ورجعت واخذت للجهال ملاعيب واكل وحلويات وملابس ورحت جان طلع من الباب
امجد
ارجعي مطبين وتحلمين تدوسين عتبة الباب
فاتن
ليش اني شسويت يمعود وين اروح
امجد
عمج غلط عليه وانتي السبب هذا نتيجة سوالفج التعبانه
فاتن
واني شعليه
امجد
شنو شعليج انتي السبب وطلعي بره يلا
فاتن
مااطلع والله هذا بيتي وبيت بنتي
امجد
جان بيتج هسه ما الج شي بيه افتهمتي لو لا
واجو ويا اخوانه وسحلوني سحل اني والغراض شمروني بالشارع وبنتي وياي تبجي والدنيا ليل خابرت اهلي اجه خالي اخذني بالسياره رجعت لبيت اهلي واني منهاره اعصابي وفاقده كل لذه بالحياة يعني هذا هم بشر لك ما كسرت گلبك هالطفله مهما يكون انت ابوها بالله اني عوفني تعودت على ضيمه وصرت كلشي اتوقع منه سكتت وخليت عيني بعين الله
وره اسبوع جان تجيني ورقه الطلاگ اني تعبت وبعد مابيه حيل احجي ولاابجي سلمت امري لله لان ما عندي غيره هو المعين وهو الكفيل وهو ياخذ حقي من كل واحد ضلمني هسه اني يم امي وبنتي عندي تاخذ نفقه من ابوها واني هم اخذ حقوقي لان طلكني بلا سبب اخوي ملتهي بدوامه ومرته موضفه وجهال اخوي حبابين ويحبون بنتي واني لسه ماتعينت بس اني ماناويه ابقى وي اخوي و ولد اخوي انشالله راح ابني مشتمل صغير واكعد اني وبنتي واربيها احسن تربيه ومانحتاج غير الله والحمدلله وبالنسبه لخالد سمعت من بعد حب دام سنين تركته بنت خالته الطبيبه وماقبلت تتزوجه لانو هي سامعه عنه كلام مو زين هوه تزوج بس انكسر وانجرح ومره شفته يبجي اكيد هذه حوبتي وحوبت كم بنت غيري ورب العالمين طلعها بيه اللهم لا شماته بقى املي بالدنيا ارتاح لان تعبت من كثر الاختبارات ربي ارحمني هذه نتيجه غلطة عمري بأول حياتي لازم نبدي حياتنا صح لازم نتوجه لرب العالمين بعقيده وگلب صادق لان هو رب العالمين يگول وان تذكروني اذكركم هذه قصه حياتي واتمنى تكون عبره للانسانه الي بعدها بداية حياتها وما تغلط غلطتي الي لحد الان ادفع ثمنها اخذت الايام ثأرها مني وزياده عساها ان تكون خاتمه للاحزان وانتضر فرج من الله وراحة لبالي
ودمتم سالمين
