الحلقة الاولى
_____________
سهوة بصوت عالى: نيرة ، يا نيرة تعالى شيلى معايا انبوبة البوتجااز
نيرة : حاضر جاية اهو يا سهوة
راحت نيرة علشان تساعد اختها سهوة فى رفع انبوبة البوتجاز ورفعتها معاها وركبتها سهوة
سهوة : قلبى الرز يا نيرة عقبال ما ادى ماما الدوا
نيرة : حاضر
ذهبت سهوة الى غرفة امها فوجدتها نائمة
سهوة برقة : ماما ، ماما اصحى علشان تاخدى الدوا
كريمة بضعف : حاضر يا بنتى
سهوة : يلا خدى الدوا اهو وانا عشر دقايق بالظبط وهجيبلك الاكل
كريمة : ربنا يخليكى يا بنتى زى مانتى واقفة جمبى وبتعملى كل حاجة كدا
سهوة : ربنا يخليكى ليا يا ماما متقوليش كدا ، ربنا بس يقدرنى واقدر الاقى شغل حلو علشان استريح بس
كريمة : ان شاء الله يابنتى
سهوة : مالك يا ماما بتنهجى ليه كدا
كريمة بصعوبة تنفس : مش قادرة اخد نفسى يا سهوة
سهوة بتوتر : طب ....طب استنى هجبلك البخاخة
كريمة بضعف : دى خلصت
سهوة : ومقولتيش لية يا ماما
كريمة : محبتش اتقل عليكى يابنتى كفاية اللى انتى فيه ده
سهوة : علشان خاطرى يا ماما والله ده ما بيتقل عليا ولا حاجة ، انا هنزل اشترى بخاخة دلوقتى تانية
.....
سهوة بنت جميلة من عيلة فقيرة نسبيا اسمها كان لما اى حد يسمعه يضحك او يستغرب منه ، سهوة عندها 23 سنة ولسة متخرجة من كلية هندسة ودورت على شغل كتير بحكم شهادتها لكن للأسف كل ما تروح شركة تترفض علشان الواسطة والخ .. لغاية اما فقدت الامل خالص وقررت تشتغل (شغالة) كان غصب عنها لان معندهاش غير اخت فى اعدادى وامها اللى تعبانة ومبتقدرش تتحرك نهائى ، سهوة عايشة فى بيت بسيط جدا مع اختها وامها
......
قامت سهوة ولبست هدومها ونزلت لأقرب صيدلية واشترت البخاخة لأمها ورجعت البيت تانى ودخلت اوضة والدتها ولقيتها نايمة
سهوة : ماما ، ماما اصحى انتى نمتى تانى ، انا جبتلك البخاخة
مردتش كريمة على سهوة وده اللى خلى سهوة تهزها بس للأسف مبتتحركش خالص
سهوة بصدمة : ماما ، ماما
لم تكن سهوة تتخيل ان هذا سيحدث
سهوة بدموع : لا يا ماما قومى ، متسيبنيش ونبى ، علشان خاطرى يا ماما ، متسبينيس ، قومى يا ماما انا جبتلك البخاخة بتاعتك وهتخفى وتبقى كويسة ان شاء الله ، قومى يا ماما قومى ، ماااااماااااااااااا
كانت سهوة قاعدة فى العزاء وهى حاضنة اختها نيرة وبتعيط جامد اوى واختها على نفس الحال لكن كانت بتهديها شوية والحزن كان عامم على المكان لغاية اما انتهى العزاء
سماح بحزن : لو عوزتم حاجة يابنتى انا بيتى مفتوحلكو واى حاجة تحتاجوها انا موجودة
سهوة بدموع : ربنا يخليكى يا خالتو
سماح : ربنا يرحمها كانت طيبة اوى وجدعة
سهوة بحزن : ربنا يرحمها
سماح : وانتى يابنتى هتكملى فى الشغل اللى انتى فيه ده !!
سهوة : ايوة يا خالتو امال هنعيش منين
سماح : بس يابنتى انتى متخرجة من هندسة وفى الاخر تشتغلى كدا
سهوة : اعمل اية يا خالتو ، انا مفيش شركة الا روحتها ومفيش طريقة والا عملتها لكن كله بالواسطة يا اما اكون على هوا صاحب الشركة
سماح : ربنا يرزقك يابنتى وتشتغلى فى اللى اتخرجتى علشانو
سهوة : يارب يا خالتو ، قومى يا نيرة ذاكرى انتى فى 3 اعدادى السنة دى
نيرة بدموع : مش عايزة اذاكر ، مش عايزة اتعلم ، شوفى انتى يا سهوة اديكى دخلتى كلية قمة ، عملتى بيها اية ، احنا فى بلد محدش بيعيش فيها غير اللى عندو واسطة ومعروف
سهوة بدموع : علشان خاطرى يا نيرة اعملى اللى عليكى ، انتى عارفة انا مش ندمانة انى اتعلمت او ضيعت وقتى فى التعليم والمذاكرة لانى واثقة ان ربنا هيفرجها وهلاقى شغل كويس ، علشان كدا صابرة وانتى لازم تتعلمى يا نيرة وتذاكرى وتعملى كل اللى عليكى لغاية اما تبقى حاجة كويسة علشان التعليم جزء من عبادة ربنا وانتى بتتعلمى علشان ترضى ربنا الاول وبعدين تستخدميه فى حياتك ، صدقينى دلوقتى كل حاجة بالواسطة بس انتى لسة على ايامك الجاية محدش يعرف هيبقى فيه اية ، اكيد الدنيا هتتظبط ومش هيبقى فيه واسطة ولا الكلام ده ...لازم تبقى واثقة يا نيرة ....لازم
نيرة بدموع : حاضر يا سهوة
حضنت سهوة نيرة جامد وعيطت فى حضنها
سماح : ربنا يخليكو لبعض ، انا هقوم امشى وهجيلكو بكرا
سهوة : لا يا خالتو متتعبيش نفسك ، ايام العزا خلصت ومش عايزة انك تتعبى نفسك ، انا راجعة بكرا الشغل وربنا يقدرنى
سماح : طيب يابنتى ربنا معاكى ، انا ماشية
سهوة : توصلى بالسلامة يا خالتو
