💔مكسورة خاطر 💔

جزء التاسع

واني ابجي اجت مرية كبيرة بلعمر باديها اشياء يمكن باكيت مال علج اوباكيت بخور تقربت مني
خالة ليش تبجين يوجعج شي مريضة
اشرتلها براسي لا
تعبانة اوديج لهلج هنا زاد نحيبي ومصيبتي وجاوبتة من حركت قلبي لا خالة ما عندي اهل اختي لكيتها مسافرة وزوجي الصبح طلقني وين اروح كليلي شاسوي اشو الدنيا تمشي عكسي وضاكت بية الله ما ياخذ عمري ويفكني من هاي المأساة
لا خالة لا تكولين هيج ربج ارحم الراحمين تعالي كومي وياي لا تبجين اني اهلج اني عزوتج ولو اني على كد حالي بس اعتبريني مثل امج تعالي وياي ارتاحي بيتنة وربج يحلها سحبتني من ايدي وكومتني  اضطريت اروح وياها لان بديت ادوخ واتعب ومبينة هي من اهل الله
بقيت امشي وصلنا منطقة تجاوزات دخلتني على بيت زغير عبارة عن غرفتين وبداخلهن طباخ والحمام برة يم الباب الخارجي  خطية مبين حالتهم كلش  ضعيفة دخلتني وكالت خالة ادخلي بس اني وبنتي  مريضة معوقة ابقي يمة داريها واني اطلع ابيع واحصل بيهن اكل والايجار وانتي عيشي وياينة على الموجود واعتبرني امج وما اقصر وياج

خالة فدوة لعينج صدك رب العالمين ما ينسى  عبدة  وصدك بقيت يمها تطلع الصبح  ترجع الضهر ترتاح والعصر ترجع تطلع وترجع المغرب وهكذا وبقيت اداري بتة خطية معاقة من هية زغيرة  والاكل يادوب يكفينة احنة التلاثة ويوم من الايام كعدت ام رنا اسمة تعبانة وما بية حيل تكوم خطية تكسر الخاطر رادت تطلع كلتلها خالة ابقي اني اطلع بدالج
ما قبلت
خالة انتي بعدج زغيرة وحلوة والدنيا ما تتأمن اني اطلع
لا خالة ام رنا عندي حل انتي شلتي مسوليتي كل هاي الفترة
اني لازم اشيل مسؤليتكم واني بعدني بحيلي وانتي تعبتي مابيج طاقة بعد تبعين وتوكفين فاذا عندج نقاب البسة اني وابيع بدالج مابية شي محد يعرفني ولا يشوفون شكلي شتكولين
خطية بلقوة قبلت ودلتني على مكان شغلة بسطية بية شغلات بسيطة من علج بخور جواريب واشياء غيرة ربحة قليل بس مادام  حلال نعمة
وبقيت يومية اطلع ابيع ومن ارجع انظف واطبخ  وام رنا فرحانة بية ودائما تدعيلي بلخير
والله صدك حسيت بلراحة والاستقرارعلى رغم من بساطة البيت والحال لكن الامان موجود وخاصتا ام رنا حسستني صدك كأني اني بنتة
ومرة طلعت ابيع بلبسطية هي مكانها على الرصيف قرب شارع عام فترة الظهر تخف الرجل بلشارع واني ارتب بلسلعة حتى اعزل سمعت صوت سيارة وكفت ونزل منها رجال نهاية الثلاثين ماعرف بس مبين علية تعبان بلكوة فتح الباب وصاحلي عفية مي وفقد الوعي
بوقتة احتاريت ما اعرف شاسوي اني ضميت السلعة وركضتلة وبيدي بطل مي رشيت على وجهة ما صحى
رجعت لمكاني جبت كارتونة بقيت اهفيلة لان الجو حار وفتحت اول دكمة من قميصة لان خطية مبين مختنق ورشيت علية مرة ثانية مي يالله استفاق
ها خوية انشالة صرت زين
جاوبني خوية رحمة لهلك فزعتني عبالي متت
شو اشوفة يباوع بعيني وصافن
هنا اني انتبهت انو شايلة النقاب واني قريبة على وجهة كلش لان جنت اهفيلة بلكارتونة بسرعة سحبت نفسي وغطيت وجهي بلنقاب
مشكورة على مساعدتج الية واسف اذا ازعجتي بس اني مريض واضطريت اطلع عندي شغل ضروري واني اسوق هبط ضغطي ودخت بلقوة سيطرت على السيارة وكفتها هنا
حمد لله على سلامتك وهاك اشرب مي وهسة راح اجيبلك بطل لبن او عصير حتى ترتاح ويصعد ضغطك
رحت اشتريتلة ورجعت وانطيتة شربة وتشكر مني
خوية اعذرني لازم اروح انشالة صرت زين
اي زين الحمد لله هاج اختي طلع فلوس من جيبة وراد ينطيني
لا مشكور خوية ما سويت شي خل فلوسك عندك وانشاله ما بيك غير العافية
عفتة ورجعت البيت ومر على هذا الحدث اسبوع ورجع هذا الولد المريض يم البسطية اجاني
مرحبا اختي
اهلا اخي محتاج شي
لا ما محتاج شي بس ردت اردلج معروفج الي سويتيلياه
لا اخي ماكو داعي ترى ما سويتلك شي مجرد اسعفتك فقط
لا شلون لو غيرج جان عافني وراح ما اهتم ويمكن يصفر ضغطي واموت
ههههه كول يالله وصلتها للموت ما صار شي  وانتة صرت زين
الحمد لله بس ردت اكولج بس لا تفهميني غلط ارجوج انتي ليش كاعدة هنا تشتغلين وانتي بنية وحلوة ما كو غيرج يشتغل هاي الشغلة
مروة
بقيت صافنة على حجية بلة هذا شاكولة
اني اسف بس ردت اعرف فضولي كتلني
اسمع خوية شوف اصابيعك مو كلهن سوة يمكن انتة عندك اخوان خوات ولد عم ولد خال يوكفولك اذا تحتاجهم اما غيرك احتمال ما عندة سند مثل اهلك او عندة بس مو زينين وياة او مرضة فلا تقيس غيرك على نفسك هاي شغلة وثاني شي هاية الشغلة لا هي عيب ولا هية حرام مجرد اكسب باب رزقي منة واني ما عارضة نفسي ولا احد شاف شكلي غيرذاك اليوم لان بوكتة تبهذلت ما عرفت اتصرف شلون ورفعت الخمار عن وجهي ومع الاسف انتة استغليت هذا الموقف واجيت تنتقدني
عفتة ولميت غراضي على السريع ورجعت للبيت مقهورة من كلامة ليش ياربي حتى اليسترزق رزق شريف ينتقدوة واني ياربي صاينة نفسي وانتة اعلم بحالي  اريد منك الصبر
دخلت للبيت تعبانة وروحي طالعة تلكتني ام رنا بيدها المي خالة شربي ارتاحي سودة علية مبين عليج التعب
لا خالة مابية شي مادام انتي تدعيلي بدعاويج الحلوة
انشالة يابنتي الله يرزقك على نياتج
انشالة الله يسمع منج

صار الوقت اعرفكم على  احد اشخاص في القصة هو علي
اني علي عمري 39 سنة خريج كلية صيدلة وعندي صيدلية اشتغل بية وبلا ضافة مضخر مال ادوية حالتي المادية ممتازة اما مواصفاتي فاني ضخم بس جسمي متناسق لان محافظ على لياقتي البدنية بشرتي سمرة عيوني حلوة حسب ما يكولون وباقي ملامحي زينة لا بأس بية
جنت متزوج بنت عمي من اني عمري٢١سنة والدي قنعني بية وهي خوش بنية وحلوة بس من ازوجتة تغيرت علية وحتى اهلي محد قبل على تصرفاتة اني عندي اثنين خوات واربع اخوان كلنا مكملين واصحاب شهادات والوالد والوالدة ربونة تربية صحية فمن ازوجت بنت عمي جنت بعدني شاب مقتبل العمر غير ناضج وهية عمرة 18 سنة
تريد نعزل لوحدنة وتريد يومية طلعة وتريد محد يحاسبة وكل حجية ماما هيجي سوت وهجي كالت اخر شي بقت تتعارك وية الكل بلبيت بدون سبب حتى نطلع لبيت الوحدة مارضخت المطاليبة لان لعبت نفسي احتاريت شاسويلة ما تقبل لان شايفة نفسة علينة واخر شي صار تهمل حتى حقوقي علية
قررت اطلقة لان لعبت نفسي من تصرفاتة واهلي وافقوني بقراري  طلقتة وارتاحيت من المشاكل وقررت ما ارتبط بعد لان الزواج ما بية راحة
وكملت حياتي واتخرجت وتطورت من نفسي وصارت عندي املاك بس بقت مشكلت انو صرت وحيد لان امي توفت وبعدة فترة والدي ايضا توفة واخواتي اتزوجن واخواني كلمن متزوج وعايش لوحدة  واني اشتريت بيت لوحدي الهي نفسي بلشغل ومن ارجع انام كبل
وهكذا روتين حياتي الى ان اجة يوم وتغيرت موازيني كلها
....................................