مـطلـقــة عــاهــرة..

البارت الثـالت

البارت_الثالث
فرحت للاداره وتفاجئت لكيتها بس هي كاعده ومدرستي يعني صديقتها وبعد ماكو مدرسات صاحتني وكعدت قريب عليها عاد هي بدت تحجي واني الصراحه نصدمت من حجيها لان حت ملحكت تعرفني اني شنو حت تطلب مني هالطلب وكلامها جان بالشكل الاتي. بنتي اكيد راح تتفاجئين من موقفي لان شفتج قبل ساعات قليله حيل بس عجبتيني وحبيتج ماعرف ليش تمنيتج تصيرين مثل بنتي و اببيتي و ورد جوري:
خصوصا كزوجه لأبني سامر اني بقيت هيج 😳 وهي كملت كلامها وهي تضحك وكالت انو هي صارلها فتره ادور ع بنوته لابنها سامر اللي هو ابن ال25 سنه ممكمل دراسه بس عنده محل اجهزه كهربائيه بالمنطقه الفلانيه وانو هو اسمراني وسط الطول سمين شويه مو حيل بس حسب مكالت دمه خفيف وانو عائلتها حلوه ولبختهم لبخ ممشيوف ولامسموع من قبل وكالتلي انتي اكيد راح تفكرين بالموضوع واتمنت هالشي مني واني هزيت راسي لان فكرت كلت اذا كلامها صح اكيد راح اعيش حياة حلوه واخلص من واقع بابا المرير ومشاكله مال كل يوم وهم فرصه افرح ماما وتخلص مني 😂 المهم هزيت راسي وطلعت وافكر بكلامها وخلص دوامنه ورجعت للبيت واني افكر بأنو اوافق لو لا واذا وافقت شنو حتكون ردة فعل اهلي ع زواجي خصوصي اني بعدني ممكمله دراسه بس فكرت كلت بابا اكيد يقبل هو ميعول يخلص من وحده منه ويزيح همها المهم فكرت وفكرت ونسيت حت ادرس وأني افكر سمعت عياط بالبيت وهم نفس كل يوم عركه بين امي وابويه ع سبب تافه بس طبعا صوج ابويه مو امي وابويه بي طبع كلش موحلو وهو انو من يتعارك وي احد بالبيت لازم يسوي تاك للبقيه ويرزلهم كلهم حت لويذكر شي صار قبل 20 سنه وجنه كلنه نترزل وحت مرات يضربنه ماعرف ليش مجان يحن النه او يكعد ويسامرنه او حت يضحك ويانه شويه 😣فأني من سمعت العياط والغلط واترزلنه كلنه كالعاده صار عندي هالشي الصار مثل الدافع حت اقبل ازوج سامر وقنعت نفسي انو اقبل وقبلت فعلا ورحت ثاني يوم انطيت خبر المدرستي انو اني موافقه مبدئيا بس اكيد رأي اهلي هو اللي راح يمشي بالاخير وهي مدرستي هم مدحتلي بصديقتها (صديقتها طبعا تصبغها 😏) ورجعت للبيت حجيت لامي وامي رزلتني لان تصرفت هيج بدون مااحجي بس اني بجيت وكتلها اريد اخلص من ضيم ابوي البيت مينطاق ومكمت اكدر اتنفس واعيش مثل مالناس عايشه حياتها وعسا ولعل يطلع الولد براسه حظ ويخلصني من ضيمي واصير ام بيت وعندي عائله واعيش بسعاده امي بجت وكالت يمه سوده عليه مايوم ارتاحيتو وحقكم ابوكم ماينجرع ومابيدنه شي الفاس وگع بالراس يبنيتي واذا انتي هيج تفكرين حقج واني ماريد اوكف بقسمتج اذا زينه والولدد يستاهلج بس تكملين دراسه يلا تتزوجين هسه مستحيل اطيج كتلها شوفي بالاول وبعدين احجي وحكمي واني من ايدج هاي لايدج هاي ماطلع عن شورج انتي واختي واخواني الكبار اقتنعت امي ووراها ب 3 ايام تقريبا اجت المره البيتنه وكعدت ورحبنه بيها ذاك الترحيب وسوينه الواجب ع اتم وجه هذا كله وبعد لاابويه يدري ولاحت اخواني بس اني وخواتي ندري ونسوان خواني من طلعت المره درو المهم هي جانت جايه ولابسه الذهب كله وذاك القاط المرتب والحلو وعطرها يكفخ الواحد 😂 سلمت وحجت وي امي وفهمتها وشوفتنه صوره الولد واني الصراحه مقتنعت حيل بشكله بس عادي المهم جمال الروح وان شاءالله يكون مثل متحجي علي وهي قسمه من ربي ماكو احد اله دخل بيها وماكدر اسوي شي اللصم حلگي مع العلم جنت اريد ازوج واحد حلو ( ينطبق عليهم المثل اللي يكول 👈رضينه بالهم والهم مارضه بينه 💦)وامي كالتلها اريدها تكمل وهي كلتلها بعيني ابيتي وتكمل مااخليها تبطل وعد مني بس اريد ازوجهم هسه مااكدر انتضر ازيد اريد اشوف احفادي ومن هالحجي امي اقتنعت لان حبتها وشافتها مفرفشه كالت بتي راح ترتاح يمها اكيد ونطتها موافقه ابتدائيه وكالت اسأل ابوها واخوانها والشور الهم وبيدهم
خلص الحجي وهي استأذنت وباستني وراحت وامي حبتها وكالت يمه بلكي ترتاحين عدهم والمره كالت سامر عنده غرفه جبيره بالبيت وجاهزه من كل شي وحت حمامها بيها واحسن غرفه بالبيت لان هو جبيرها وعنده اخت بس وحده مزوجه وعايشه بره واخ صغير بعده صف ثالث متوسط المهم اتفقنه انو نستشير اخواني ويشوفون الوضع ومن اجو اخواني قبل ابويه استغلينه الوضع انو بابا ماكو وحجتلهم ماما ومقبلو لان اني صغيره بس امي قنعتهم وشافوني ساكته وقابله كفشو شعري وكالولي كبرتي يول وبوسوني وخجلوني  وكالو لاتحجون يم بابا خلينه نسأل احنه عالولد بالاول وانشوفه زين لو لا وبعدين يلا لان بابا من يشوف عدهم فلوس ينطيج بدون مقدمات وكالو من باجر يرحون يسألون عالولد واجه بابا واطشرنه والتهينه كل واحد بشغله وصار الليل ونمنه وثاني يوم رحت للمدرسه وداومت عادي وبنهايه الدوام اجت ام سامر وسلمت عليه وبوستني وكالت اكو شخص بالسياره حاب يشوفج اني تفاجئت منو اليريد يشوفني ..

يــتبـــع