#11محبوبتي_نور❤
بقلم:
#fulla_Ali
نور دخلت لي رباب بعد مسحت دموعها عشان م تبين انها كانت بتبكي ..لقتهم كانو بعملو في كعك العيد..
نور : الله !! ي خالتو سوسن ريحة الكعك حقك ماليه الحي كلو
سوسن : هههههه بطلي مجاملات
رباب : لالا والله ي امي..بس الريحه تلبشششش..موبدعه انتي الصراحه
سوسن : بدل النضمي الكتير تعالن ساعدني عشان ننومو بدري...
رباب ونور بدو يساعدوها ..
وفعلآ ي جماعه ..خالتو سوسن بتعمل كعك عجيييب ..اما نحن الشباب اتونسنا كدااا وضحك انسو بس
وياهو ....اليوم خلصصصص وكل زول مشي ع سريرو من الارهاق
💡💡💡💡
الله أكبر...الله اكبر..الله اكبر
لا اله الا الله ..الله اكبر
الله اكبر..ولله الحمد
ابتدا اليوم بترتيلات العيد..ودي احلي حاجه ف العيد
هي البتديهو رونقو ..وبهجتو.
الصباح الناس شغالين مضايرات وكده
رباب جات نضفت وفرشت الصالون بملايات جديده زاهيآ لونها
ونحن طبعآ حجز في الحمام عشان نحصل الصلاه
وديك ي الجلابيه
تعالو اوريكم حاجه ..شوفتو انا دا ..وبلا فخر ..لمن البس الجلابيه بكون مزز الصراحه كده مزز وكسار تحلفو تقولو بزقو فيني الملائكه.. وما تسألوني عرفته كيف ..
جلابيتي النوع الامارتي ديك..فريده كده..لونها سمني لمن البسها بتعمل شغل كده عجيب ببهدل البنات ..والله اعلم
المهم
انا والشباب ومعانا اخوالي واعمامي مشينا الجامع
وحضرنا الصلاة والخطبه
اما ناس رباب اظن رجعو بعد الصلاة بغرض انهم يتمو النضافه وكده
💡💡💡💡
طلعنا من الجامع وابتدينا خشينا البيوت البتلاقينا ف طريقنا...ياهو انا ومنذري والتيمان..اما ناس عم خالد ديل حوامتهم براهم لزوم ناس كبار وكده.طبعآ الزيارات وقافي وقافي
انا كنت حأموت مسافة نحصل بيت الغاليه...
وياهو..بيت بيت لغاية جينا بيت المحبوبة ..
دقينا الباب وجاتنا الغولة ديك فتحتو
سلام عليكم العيد مبارك
طبعآ العيد ف السودان غيييير..انا اوول مرة اعيد هنا..كنا بنجي نتم لينا 10 يوم 15 بالكتير وبنلف نرجع الشارقه
المرة دي كنت مبسوط شديد
سلمنا علي مرت ابوها ودخلنا..ي حليلا مع دخلتنا لاقيناها طالعه من الصالون حقهم شايله جردل المسح..وحالتها تضحك هههههه و وسخانه وسخ الجن..انا اشك انها جات الصلاة هههههععع
م سلمت علينا و فوو جري دخلت جوة
منذر قعد يرفع لي في حواجبو وكده ...لزوم مزتك خجلانه هههه وانا كاتم الضحكه قربته اتشرق
بعد شويه جات لابسه توب وكرعينها كلهم خرائط من المويه ههههه عيدت علينا ورجعت
احلي حاجه فيها انو هي ما بتهتم بي زول..يعني م عندها امور التعقيد ديك..ودا الشي العاجبني فيها
يعني مفترض لو دي امثال البنات ديلك #فاطمه_كيفتمام¿
كان جرت اتمسحت وما بعيد اتمكيجت زاتو هههه
طبعآ لاقيت منصور ..لالا م المفترض يسموهو منصور..دا يسموهو اكونكو بس..يخ كن شوفتو الشلاليف ""!! غايتو ماشاء الله
المهم..طلعنا منهم ودخلنا لي ناس حبوبتي ام ابوي ..عيدنا عليهم ورجعنا البيت... فطرنا الفطور التقليدي ..عصيده بملاح تقليه من ايادي خالتو حبيبة قلبي
و شعيرية وكده
بعدها نوممممممته وحاتكم م صحيت الا مع آذان المغرب..منذر جاب لي تلفون امو..وقال لي انو امي ف الخط..وآشر لي بعد اخلص اجيهم برة..
وقت رديت قلت ليها : سحر ي مزه ي كسسسسارة..
قامت طوالي ضحكت وقالت لي يجازي محنك..ضحكتني والدمعه في خدي
قلت ليها دمعة دجاج ولة دمعة رز
سحر: ههههه...بي مناسبة الآكل..الليلة ابوك عمل لينا عصيده اقوا من جبل أحد
طبعآ قعدته اضحك..وامي تشيل وتشمر لي..وانا اضحك والدمعه في عيني بس م حبيت احسسها اني ببكي . نضمته معاها هي وابوي كدااا
بالجد فقدتهم ياخ
بعد قفلت منها بس قعدته ابكي..امي دي ياخ اهم انثي في حياتي اهم من نورو زاتو
يا جماعه فيها حنيه لو وزعوها ع ناس الدنيا كلها كان كفتهم و وفتهم
مشيت استحميت ودخلته جوة البيت عشان ادي التلفون لي خالتو سوسن لقيتهم متلمين..اخوالي ومرتو لي خالو مصطفي ام التيمان..والتيمان و رباب ونور ومنذر والشفع ..وعمو خالد وخالتي سوسن
وكانو عاملين شاي لبن بي زلابيه **طبعآ انا احب الزلابيه موت انا**
رباب كبت لي كبايتي ..كنت بشرب وسرحان
والله فجآة ي جماعه قفلت معاي م عارف الحاصل شنو..اظن لاني فاقد امي وكده ** يارب ماف زول يحس الأحساس دا..والله مؤلم ي جماعه !!! والحمد لله **
خالد : مالك ي محمد ؟؟ الاجواء دي ما نفعت معاك وله شنو ؟
ابتسمت وقلت ليهو : بس دا كسل لاني نومتة اليوم كلو
حسين : لمن بقيت تشبه لي ناس اصحاب الكهف
طوالي قومنا ضحكنا
وتاني الحديث اخد منحني آخر .. عن عرس خالو مآمون..وهو كن شوفتوهو يتكشم ويتخاجل ما عرفته هو العروس ولة العريس
قومتة من القعده ديك وطلعته الشارع..بحب اقعد برة الشارع انا..العشاء آذن طوالي مشيت الجامع ..
والله دي اول مرة اقوم براي كده امش الجامع ..دايمآ كان ابوي بقول لي ي ولد قوم ارح الصلاة
رجعته تاني محلي ..
بعد شوية نور جات طالعه ماشه ع بيتهم ...جات علي وقالت لي انت كويس ؟؟
ضحكته وقلت لها 100%
نور : امممم طيب..ومدت لي ورقة وقالت: هاك
قلت ليها : دي شنو كمان ؟؟
قالت بأستهتار : رساله من الملكه نوباتيا
قلت ليها بغض النظر عن الرساله ..مافي ملكه اسمها نوباتيا دي مملكة..يا سودانيه ..يا الساكنه في السودان..ي القريتي تاريخ في تامنه واولة وتانيه
قالت لي : آأي..قصفت جبهتي...كده اتعادلنا ...وضحكت ومشت بيتهم
انا دخلته الورقه في جيبي وم اشتغلته بالموضوع
وياها تاني نسيت بيها عديييييل كده
#صلو_علي_حبيبنا_الرسول
#To_be_Continued
Dircted by:
#fulla_Ali
