سيليا🍯
كعدت الساعه ب5 ونص الكل بعده نايم اني وبرق نمنه على السرير بس البنات خديجه وترف نامن على الكاع كلهن بعدهن نايمات خديجه نايمه ويمهه جهاله هي اول مااجت جهاله عافتهم يم امه بس بعدين بنص اليل اجت خالتي وكالت لخديجه جهالج يريدون ينامون يمج المهم
استغليت الفرصه الكل نايم كلت يلا خل انفذ خطتي
شفت ترف نايمه كلت خطيه اكعدها هيه البارحه نامت متأخره ومامتعوده تسهر خل اعوفها نايمه واروح بوحدي صح هيه مخاطره اول الصبح والناس محد كاعد والمخزن كلش بعيد عن البستان بس قويت قلبي وخذيت وياي لايت وطلعت اتختل على كيفي من الغرفه خاف واحد من خوالي يلكفني طلعت من الباب الخارجي وطكيتهه فرد ركضه واتباوع وراي خاف واحد لاحكني بعدين تعبت ووكفت يم الشجره التقط انفاسي لان اختنكت ماجبت وياي ماي وهواي عطشت التفتت وراي لكيت روحي اقتربت كلش من المخزن قلبي كام يدك بالدقيقه الف وكمت ارجف ياربي من طلعت من البيت جان قلبي قوي شمالني هسه
قريت اية الكرسي بقلبي وتقربت من المخزن عجيب جان مفتوح على العلم همه دوم قافلينه ماهتميت فرحت كلت يلا حتى مااعاني واني اكسر القفل دخلت جان شويه اكو ضوه داخل من الشباك الفوك تباوعت لمكاني الجنت كاعده بي من محبسوني وشلون نمت وشلون بجيت شعلت الايت وكمت اضربه على نواحي المخزن عجييب المخزن كلش جبير شنو هاي يالله واني جنت محصوره بهاي الزاويه
المهم اتقدمت ودخلت لجوه كلش بس صدك المخزن جبير تعجبت شفت اكو كنتور بس اتذكرت كلام رهف كالت جدي جان يسهر بي هوه وجماعته يعني المكان مامهجور كلش هم جانت علي رجل المهم الايت جان بي هيج شلون الحبل اشيله من عنده علكته براسي كوه دخلته وفتحت الكنتور
جان بي هواي ملابس وكله تشبه ملابس الراقصات لزمت ثوب قماشته فيزون ولونه بنفسجي كلبته جان بي ريحه طيبه على العلم المخزن مهجور صارله اكثر من 20 سنه
خليت الثوب على صفحه وكلبت بعد بالملابس جانن كلهن ملابس نسوان بس صدك لكيت اكو عكال بيناتهن وبعد كلشي مالكيت بس ملابس نسوان فرغت الكنتور كله من الملابس وطشرتهن بالكاع وفتحت الجراره الجوه الكنتور جانت ريحته كلش كريهه طلعت من عدها ابطاله مال شرب وكلاصات ومواعين اجيت اتقيئ الريحه كلش كريهه سديت الجراره وكمت فتحت الباب الفوك مال الكاونتر لكيت بي صندوق صغير كلش فتحته وجانت المفاجاءة
لكيت بي الخلخال نفس الخلخال الي لكيته ذاك اليوم وبنفس الوقت سمعت صوت مال واحد يمشي وصوت خلخال التفتت ماجان اكو احد رجعت نضري للخلخال مالكيته ياربي استغفر الله وين راح الخلخال كلبت الصندوق وذبيته بالكاع وكمت ادور على الخلخال بس ماكو عجيب استغفر الله ياربي معقوله يتهيألي نزعت الايت من رقبتي وجنت ناويه اطلع بس باب المخزن انسد بأعلى قوته
أنت تقرأ
حادثه من حياتي🔞(مكتمله)
De Todoالقصه ليست لاصحاب القلوب الضعيفه او لهم اصغر من 16 سنه بالاضافه القصه بالهجه العراقيه وهي اول قصه الي بمجال الرعب اتمنى تنال اعجابكم
