كاعدين نتغده وجان تجي دكتوره كلش حلوه سلمت علينا وكعدت يمنا وتعرفت عليها وطلع اسمها سمر .ظلت تسولف ويه كرم اني من شفتهم هيج ضجت اترخصت منهم وطلعت رحت للغرفه مالتي وره شويه اجى كرم كالي ليش كمتي كتله مجان وجودي اله داعي واني بس اسمع عليكم كال ها كتله اي وضحك وطلع كلت اني شبيه كتله هيج .ظليت كاعده بغرفتي ورى تقريبآ ساعتين دخلت عليه مره جبيره عمرها بالخمسينات ظلت تسولف ويايه وحبيتها كلش وكمنا نضحك وطلبتلها شاي ومره ثانيه رادت كهوه ظليت تسألني واني اجاوبها واحنا ونجحي دخل علينا كرم اني كمت كتله تفضل دكتور محتاج شي كال اي مضيع امي وجيت ادورلها ويباوع على المره الجبيره ظليت صافنه جان يكوللها انتي هنا واني ادورلج كالتله ضجت وضليت انتظرك وانت تأخرت كاللها جانت عندي عمليه هسه خلصت. كله هذا واني اباوع عليهم جان ينتبه عليه كرم كالي هاي امي كالته اهلا وسهلا خاله شرفتي اعذريني ماعرفتج وانتي همين ماكلتيلي كالتلي الي الشرف بوستني وطلعت وراح وياها كرم واني صافنه الام حلوه والابن يخبل كلت لنفسي اليوم شبيه طاكات فيوزاتي خلصت دوام وطلعت صعدت بالمصعد وجان يصعد ورايه كرم وامه كلتله ها خاله بعدج هنا كالتلي غير كرم مخله فحص مسواه بيه كمت اضحك واباوع على كرم هم يضحك كلتلها غير خايف عليج ونزلنا من المصعد رادو من عندي يوصلوني رفضت راح كرم صعد امه بالسياره ورجع عليه كالي بعدج ادوخين من المصعد كتله لا صرت زينه الحمد لله كالي لعد اريد هديه كتله اذا كل دكتور من نتمرض انروحله ويطيبنا وننطيه هديه كتله هيج هم الراتب يخلص وهم الهدايا تخلص من السوق ضحك بصوت عالي كالي يابه اشاقه وياج اني اجيبلج هديه لان قبلتي تاخذين الوصفه كتله ماكو داعي المهم طيبتني.
جان تجي دكتوره سمر كالت لكرم ممكن توصلني لان سيارتي مدري شبيها كاللها ادللي اشرلها على السياره كاللها اصعدي وهسه اني جاي كالي يله اروح كتله اخذ راحتك هم حتى توصلهم كال اي لعد شلون وضحك وراح اني من يمي فولت من العصبيه كلت لنفسي لو قابله يوصلني جان هسه اني وياهم اسمعهم شيسولفون خرررب بحظي واني ليش هيج اسوي اللي يسمع يكول حبيبي المهم ظليت واكفه انتظر السايق اجى وصعدت ورحت للبيت واني ضايجه طبيت للبيت حتى مااكلت طلعت تليفوني كلت بلكت داك داز مسج كلشي ماكو كلت هسه يدك بالليل كمت كملت شغلي وصار الليل ورحت نمت وكلش شويه اباوع للتليفون هسه يتصل بس مااتصل نمت وكعدت الصبح ورحت للدوام واكفه يم المصعد انتظر جان يجي احد سلم عليه انداريت طلع دكتور سامي رديت السلام وكام يسولف ويايه واجى كرم وشافنا وسلم وصعدنا بالمصعد ونزلنا وسامي يسولف ويايه وظل يمشي لحد ماوصلني باب الغرفه مالتي واستئذنت ودخلت بس هذا كله وكرم يباوع علينا ظليت افكر كلت معقوله كرم ينعجب بيه ليش شبيه اني شناقصني واني اسولف ويه نفسي دخلت دكتوره سمر كالتلي عازمتج على كهوة استغربت شتريد طلعت وياها ونزلنا للكافتيريا وكعدت اتسولف ويايه واني بس اكوللها اي واخر شي سألتني كالتلي اكو شي بينج وبين دكتور كرم كلتلها لا كلتلها ليش جان تكول مو اني معجبه بيه كلش وردت اعرف يحب احد وشفته وياج وكلت اخاف بينكم شي كلتلها اطمني ماكو شي كلتلها من رخصتج ورحت لغرفتي كلت ياربي هاي منين طلعتي .وراها بشويه دخل كرم كالي باجر عازمج على الغده كتله مااكدر اجي كالي ليش كتله عندي شغله كالي باجر انتظرج بالوحده بره المستشفى وطلع كلت هسه شراح اسوي هو اني اريد اروح بس اخاف اسمع شي منا منا بعدين كلت الله كريم منا لباجر.
