ركضت لعمتي لكيتها واكعه علئ الكاع صحت عمه حاجيني وج عمه شبيج جبت مي كمت ارش علئ وجهه جريتها شوي شوي حطيتها ع القنفه مال التخم بدت تصحصح شويه ضلت تصيح يمه مروان ابني شسويت بروحك وضلت تبجي .
وبعدها اجتي عمتي هيفاء وعمو كمال فتحتلهم الباب عمتي حضنتني علمود تواسيني ورات تصبر عمتي سحر واجه عمو كمال كلي بنتي بلقيس لاتشيلين هم انشاء الله شده وتزول هزيت راسي انشاء الله .صحيح مروان جان ماذيني وبحياتي ما اعتبرته زوج بس ما اكدر اوصف شعوري زعلانه لان انسجن لو ضايجه علئ وضع عمتي سحر ما ادري افرح لان خلصت منه لو ازعل لان ما اعرف شنو مصيري وشلون راح تصفه ...
رحت كعدت يمهم وعماتي يبجن وعمو كمال يحاول يهدا الوضع وكال اني عندي صديقي محامي خلي اخابره واشوفه شنو العقوبه الي تنفرض علئ مروان وشنو اخف عقوبه ممكن ياخذها طلع يخابره ب الحديقه
وضلت عمتي سحر كل شوي تباوعلي وتكولي كله من وراج من لفيتي علينه ما شفنه الراحه وعمتي هيفاء تكولها هسه مو وكت هالحجي قابل هيه حبسته
اني كلت ب كلبي فوكاها اني طلعت مو خوش اني كايله لابنج سكران ومكبسل 24 ساعه حيل يستاهل الله يفكني منه كمت للمطبخ لان بعد ما اتحمل كلامها وعمتي هيفاء كل تاشرلي اسكتي لو كومي واكفه ب المطبخ شفت عمو كمال سد الموبايل وجان ضايج وكعد يورث جكاره .
طلعت للحديقه كتله ها عمو شنو الاخبار ؟
كلي والله شكلج يا عمو المحامي يكول اذا الحبوب والمخدرات الي لكوهن وياه كميه جبيره واعترف اله هاي الحبوب اقل شي ياكل 15 سنه هاي اذا مو مؤبد .
اني ظليت ساكته او مصدمه !
عمو اني هسه رايح للسجن وراح امر علئ المحامي اخذه وياي .....
دخلنه للبيت هو كلهم راح اروحله للسجن عمتي سحر كمزت كلتله اروح وياك كلها يا ام مروان اني رايح وي المحامي خلي نفتهم شنو السالفه بالاول.
وراح عمو كمال وطبعا بسرعه انتشر الخبر ب المنطقه احنه ب العراق العظيم اسرع من الكوكل (ههههه)
وكل شوي يجن نسوان من المنطقه علئ عمتي نسوان وماشاء الله ابد مايصدكن يلكن سالفه يحجن بيهه
واني كل شوي اجيب جاي ومي ما صدكت اخلص من ضيم مروان انوب اجن النسوان اني ناقصه خداامه اخدمجن....
ولليل رجع عمو كمال كعدنه كلنه نسمع شنو الي صار سالته عمتي سحر ها خويه شكال المحامي يطلع مروان؟
عمي كمال كالها شكلج يا خويه ابنج الشفيه معترف علئ روحه وصاير نجر وكايل هاي البضاعه الي
ولازمين عنده كميه مخدرات وحبوب كلش اهواي واصلا جان مخمور مو صاحي والمحامي كال موقفه كلش صعب.
عمتي ظلت تدك وتلطم وحاولنه نهديها ميفيد اتخربطت وعمتي هيفاء كالتلي روحي جيبي عبايتها خلي ناخذها للمستشفئ كمزت جبت عبايتها واجيت . صعدوها ب السياره كتلها عمه اجي وياكم عمو كمال كلي لا عمو ظلي ارتاحي وجيبلي نسخه من المفاتيح وانتي اقفلي الباب عليج ونامي رحت جبت نسخه من المفاتيح انطيتهيا ورجعت سديت الباب وقفلتها .
أنت تقرأ
بلقيس(18+)
ChickLitقصه واقعيه باللهجه العراقيه تتكلم عن فتاه يتيمه تتزوج من ابن عمتها وفي ليله زفافها تكتشف ...
