بلقيس(18+)

البارت العاشر

بعد ماخلصت الامتحانات كالوا النتائج تعلن بعد اسبوعين تقريبا ع النت....

ايام قليله ويجي شهر رمضان بديت اخذ عمتي نتسوك ورجعت اداوم ب العياده دوام كامل بس بالي ظل يم النتيجه اوووف اخاف ما اطلع المعدل الي اريده؟!!

واجه شهر رمضان صايمين اني وعمتي . وفد يوم جمعه صادف 4 رمضان سوو جيرانه ب المنطقه حمله لزياره كربلاء والنجف واجتي جارتنه كالتلي تروحين بلقيس اني كيفت كتلها اشوف عمتي وارجعلج خبر كلت ل عمتي كالت اي نروح نحصل زياره احسن من كعدتنه ب البيت ورجعت خبر ل جيرانه وفعلا طلعنه ثاني يوم الظهر وصلنه قبل الفطور ل كربلاء اووف طارت روحي من شفت قبه الامام الحسين (عليه السلام ) والامام العباس دخيلك يبو فاضل (عليه السلام) .

دخلنه زرنه وصلينه وبعدها طلعنه فطرنه وسوينه سفره فطور تخبل و بعدها اتوجهننه للمحلات اشتريت عطور واكسسوارات وكملنه رجعنه للسياره رحنه للنجف هم جانت زياره حلوه اتونست حيل

رجعنه للبيت تعبانين عبالك جنه طالعين عماله مو رايحين زياره اني دخلت سبحت و طلعت لكيت عمتي نايمه رحت لغرفتي تمددت ع السرير ميته من التعب ورحت غفيت.....

مشت الايام واني اداوم ب العياده وبنفس الوقت بالي وتفكيري يم النتيجة لحد ما صار وقت اعلان النتائج .

ياربي الحمد لله ناجحه ما ممصدكه من طلعتها ع النت كاعده واباوع ب الموبايل اريد اتأكد رحت كلت ل عمتي فرحتلي حيل . وخابرت الدكتورة بشرتها

وره ساعه خابرتني عمتي هيفاء باركتلي . وبعدها رحت صليت شكر لله كعدت ع المصلايه اصلي وابجي هيج لا اراديه وادعي ربي انقبل صيدله جان معدلي 91 وادعي انقبل يارب والله تعبت بحياتي.

ومرت الايام اني من البيت للعياده ومن العياده للبيت . وفد يوم خلصنه شغل ب العياده من وكت دخلت لمكتب الدكتوره علمود سجل الحجز مال المرضئ تشوفه قبل لا نطلع حتئ تعرف شكد عدها مرضئ ثاني يوم . دخلت جانت دا تعدل حجابها التفتت عليه شفتها لابسه كلاده عليها اسم بس جان مو اسمها مكتوب عليها اسم (زينب) استغربت حيل ليش مو كاتبه اسمها ومنو زينب ؟

الكاتبه: زهراء لقمان / ملاحظه الدكتوره اصرت علئ عدم ذكر اسمها داخل الرواية.

ليش مو كاتبه اسمها سالتها كتلها عفوا دكتوره منو زينب هي باوعت عليه بس بعيونها حزن كالت بنتي كتلها اها الله يخليها حسيتها ضاجت ! كتلها عفوا اني كلت شي غلط ؟

جاوبت لا بس بنتي متوفيه جانت طالبه جامعه كليه الطب بس اتوفت بحادث سياره وهي راجعه للبيت . كتلها الله يرحمها الي فهمته من كلامههه هي دا تساعدني لان اذكرها بنتها الي اتوفت.

مشت الايام وصار وقت التقديم ع الكليات بس اني قلقه لان المعدلات جانت عاليه واحتمال ما انقبل صيدلة بس خليت ب الاستمارة صيدلة الخيار الاول وبعدها الهندسة وبعدها العلوم ...