أحببتك ، لكن صدمتني بخيانتك ||باللهجة الليبية||

بداية حب جديد

في اليوم الثاني .....
غزل : ياعروسة نوضي الساعة 9:15
ريان : همممم
غزل ( جت في وذنها): نوضييييييييي
ريان : تي باهي نضنا
ناضت لقت فطور عرايسي بامتياز كل أنواع الخبزة وبيروش ونوتيلا♥ وتن و........ الخ
ريان : اووووووووووه شن الدلع هاذا
غزل : هاذا شوية عليك
ريان : ناضوا الاخوات ولا مزال
غزل : اماني وشجن قاعدين راقدين الباقي ناضوا
ريان : نوضي خماير النوم الزوز ونادي الجماعه يجوا يفطروا
*ملحوظة : ندي حتي هيا جت وباتت *
ندي : صباح العسل
ريان : صباح القشطة تعالي افطري
ندي : نصلي ونجيك
ريان : متعطليش
التاني يوم ......
ريان شدت التلفون واتصلت بحبيب القلب
ريان : صباح الخير راجلي
علي ( بصوت راقد ومغلوع ): غر صلي عالنبي يا مرا مازال ماوليتش راجلك
ريان : مبردك تعرف ، متمشيش معاك البصارة
علي : أي ، صباح النور
ريان : بعد خراب مالطا ، اسمع اسمع
علي : شني
ريان : اليوم ماشين عند خالتي تعالوا حتي أنتو لحوش عمكم
علي : تو نشوف به
ريان : خلاص اسأل اماليك ورد عليا مش تنسا
علي : حاضر
ريان : يلا سلام
علي : سلام
عند علي ......
علي (( والله فكرة مليحة قالتها مرتي نتلاقو بالصدفة صح نمشي نسأل بوي ان شاء الله يقول باهي ))
علي : بوي نمشو اليوم لحوش عمي سالم
أحمد : امتي ؟
علي : العشية
أحمد : شاور امك هونا اني معنديش مانع
علي (بصوت خافت ): نقعد اني زي العيل ، عادي كله يهون ليك
أحمد : قلت حاجة
علي : سلامتك بوي

مشي لأمه
علي : يام شن رايك نمشوا اليوم لحوش عمي سالم
عليا : باهي ، بالمرة نسلم علي مرت عمك
علي : كويس

بعت مسج ل (ريونتي ♥) قالها انهم بيجو
ردت عليه نستنا فيك
سكر فونه واتكا شوية
عند ريان ......
عمر : مااااااامااااا وين السروال البطاطي متاعي
اسماء : هونا في الدولاب
عمر : باهي الفانيليا الزرقة ( بالعياط )
اسماء : في واحد ميعرفش حوايجه ، اهي غادي
ريان : شني شن في علاش العياط هادا كله
عمر : دخلك في حاجة
ريان : أي
عمر : عندك اربعة حيوط اخبطي راسك في واحد منهم
ريان : ني ني ني
عمر : نعم نعم
ريان : سلامتك
اسماء : يلا انت وياها بدلوا وانتو ساكتين
في حوش الخالة ..........
سمر : شن الجو  رورياتي
أروي وريان : طلعتينا اسم مشترك
سمر : أي
ريان : تمام وانت
سمر : تمام ، خشو هي تفضلو
أروي : زاد فضلك
وخشوا للدار قعدو يهدرزو
لين شرين الحوش
ريان في نفسها : كبيدتي وصل
سمر : جاية ، شوية وانوليلكم
فتحت الباب لقت حوش عمها أحمد
سمر : اهلا اهلا تفضلوا نورتونا ، وسلمت عليهم
ريان أول ماشبحت علي ولو عيونها قلوب قلوب ....
ريان قربت من علي بسرعة البرق
ريان : خيرك عطلت
علي : عطلت في عينك الساعة 4:00 وادقوليلي عطلت بري ملحي ترا
ريان : خيرك اتعفلقت ( بصوت الأطفال ونظرات الجرو )
علي : متعفلقتش غر انت متعقدة ، خلاص خلاص فوتي .
بعدين كل واحد لهي في حاجة
عند علي وايهم .....
ايهم : عليوة عليوة من هاذي البنت يلي مع ريان
علي : سمر من يعني
ايهم : تي لاااا، مديرش روحك اهبل التانية
علي : اااااا نسيبتي اروي ، علاش ؟
ايهم : لا شي غر شكلها طريف سمح كنهذا تولي مرت خوك مرتبطة ؟
علي : لا
ايهم : متأكد
علي : أي متأكد امالا شني
ايهم : كويس
علي : مبارك سلفا
ايهم : اصبر شوية وأنت ما تصدق
عند ريان واروي ......
أروي: رورو رورو من الطرف يلي كان جنب علي
ريان : سلفي ايهم خوه يعني ، علاش؟
أروي : غر شكله يهبل بس
ريان : سليييييفتييييييي
أروي : (ضربتها برجلها) مبردك يا شن بيقول فمي
ريان : ااااااااااااااي يالي ماتستحيش وجعتيني
أروي : تستاهلي
بعد شوية ........
ايهم : خلاص اني بنمشي نتعرف عليها طيرتلي قلبي السمحه ، اهي في المطبخ بروحها نمشيلها قبل مايجي حد
ايهم : السلام عليكم
اروي .انخلعت . : وعليكم السلام
ايهم : شن اخبارك ؟
اروي : تمام وأنت؟( وقلبها بيطير من الفرح )
ايهم : تمام ، في شن خاشة ؟
اروي : معهد فنون جميلة وانت ؟
ايهم : متخرج من كلية علوم وابحاث

قبل مانكملوا خلي نوصفوا اشكالهم
اروي ضعيفونة وشدوق بيضاء وردية عيونها عسلي وشعرها قهوي داكن واصل لنص ظهرها قريب تتخرج لان هي معهد عكس ريان شخصيتها مرحة لكن حساسة هلبا
ايهم سمراوي مش سمين ومش تل في النص حتي هو يلعب في حديد مع علي عيونه خضر وشعره ولحيته عسليات ويحب يطرح يعني فتي احلام كل بنت

نرجعوا........
أروي : امم حلو
ايهم : عيونك الحلوة
اروي اهني دابت خلاص وسرحت
ايهم : احم
أروي : اسفة
ايهم : لا عادي ، كم مواليدك انت؟
أروي: 95 ، وأنت
ايهم : 88
اروي اكتفت بالابتسام
ايهم : بنسألك سؤال لكن مش قادر
أروي : قول عادي مدورش
ايهم : مرتبطة ؟
أروي ارتفعت حرارتها وولت حمرة : لا
ايهم : كويس ، كان تقدمتلك ترديني ولا لا ؟ ( مع سحره والبهارات متعه اكيد فهمتوا;-) )
أروي ساخت فجاءة
ناض ايهم من مكانه وقعد يضرب فيها بالشوية بش تنوض مابتش اتنوض مباش ينادي البنات لان يعرف شن بيقولولها بعدين ;-) نادا علي لان طب فأكيد حيدير حل 
طبعا علي قاس الضغط بي هديكا الطريقة يلي باليد(مش عارفة نشرحها تقريبا وصلت ) لقاه نازل فدار يلي لازم يديره وبعدين فاقت لقت ايهم وعلي فوق راسها ناضت زي المخلوعه
ايهم : الحمد لله عسلامتك
أروي : اني وين
ايهم : انتي في دار سمر ولا نسيتي
أروي : أي أي صح
علي : الحمد عسلامتك
أروي : الله يسلمك
علي : شن صارلك انت بالزبط ؟
أروي : كنت ندوي مع ايهم في المطبخ وفجاءة حسيت بدوخة قوية وبعدين معاش نذكر ...
علي : ااااا انتي عندك هبوط في الضغط خودي هاذي الحبة وتريحي ان شاء الله تولي احسن
اروي : صحيت ، تعبتك معاي
علي : ولو هذا واجبي ، نستأذن اني وان شاء لا باس عليك
أروي : لا يوريك باس ، تفضل اذنك معاك
طلع علي
ايهم : ها شن قلتي ولا نسيتي
أروي : مستحيل ننسي ، والله اسمع اني مجربتش هذا الشعور قبل ومش عارفة علاش مستريحتلك فا خليني انفكر ونرد عليك
ايهم : عادي خودي راحتك 
نسرعوا اﻷحداث ........
بعد شهور تلاقت العيلة من جديد يوم كان جمعة
ايهم : ها شن قلتي
أروي : ماشاء الله قاعد منسيتش
ايهم : أي
أروي : موافقة
ايهم : يعني تحبيني
اروي : أي
ايهم : مش مصدق عمري والله نحبك ونموت فيك من أول يوم شفتك فيه ♥
أروي : وحتي اني لقيت روحي فيك ياعمري ♥
ايهم : خلاص يعني اسبوع وبنجي نخطبك ، كل شي واتي ومادبينا العرس قبل عرس خوي علي تمام
أروي : تم ، أصلا انت اؤمر بس ومش حتلقا الا حاضر
ايهم : يانعلي وخلاص ♥

_______________________________________________________________________                                                 انتهي البارت ♥ ان شاء الله يكون عجبكم

سامحوني كان عطلت عليكم
وأنت زايدينها متعلقوش ولا تتفاعلو معقولة المشاهدات فوق الالف والاصوات تحت 500 والتعليقات أقل من 100 كيف هكي قصدي بكل تفاعلو معاي بش ننزللكم أسرع

مع السلامة ......