❤ الكاذب الجميل ❤ [باللهجة الجزائرية 🇩🇿 ]

👟بارت 09👟

ياسمين : شوف نتا ... متزيدش قاع تختلط فيا.... هادي اخر مرة نشوفك قدامي ادي الهم هديك و طيرو عليا

و راحت و خلاتهم فلشوك تاعهم

طريق كامل و هي شايدة البكية تاعها تمشي و مشنفة .... برك وصلت لبيتها رمات سباطها و قعدت تبكي مشوكية مالشي لي صرالها

بعد ما خرجت وش كاين في قلبها راحت ديراكت بدلت حوايجها و رقدت

بصح فجهة اخرى راه صاري شيء اخر كليا

بعد ما راح انيس يجري من خوفو من اياد نور استغلت الفرصة و راحت لعند اياد لي كان حا يطرطق مزعاف عنقاتو ملور بكل رومنسية... و هو مكانش اصلا علابالو بيها ...ولا دايرلها قيمة اصلا .... هي كي شافت هكاك تقلقت و قررت تزيد عليها شوية *بصوت جيلالي* جاتو ملقدام و زعما سيات تقعدو فلكرسي و قعدت قدامو و شدتلو يدو

نور : خلاص اياد متقلقش روحك كلش يتحل

اياد : متحرشيش نور كيفاش من قلقش روحي و الطفلة راي دير هاد العفايس

نور : معليه اياد بلاك التثير تع الميليو لي كانت فيه

اياد : وشنوو ؟؟ اما ميليو وش قصدك

نور : اااه... *دير روحها تخلعت* والو والو ني نخلط

اياد : نوور متقلقينيش نتي تان اهدري

نور : ااه اياد خسارة عليك تعرفني خبي عليك

اياد : بصح...

نور : *تقاطعو* مهم اياد انا دك نروح نهدر مع ياسمين و نشوف علاه دارت هكا

اياد : لا متروحيش

نور : سي بليز اياد ملازمش نخلوزها وحدها سينون ترجع كثر من هاك

اياد : خلاص ايه بصح مش دكا غدوة صباح

نور : مكاش مشكل

ممبعد ناضت و عنقاتو و همستلو في ودنه

نور : كلش رح يكون مليح متقلق ش روحك برك

اياد ناض و خرج ديراكت لبيتو اما نور قعدت بكل هدوء و ابتاسمة ابتسامة انتصار و بكل روح رياضية طلبت عصير و قاعدة تتمتع

*غدا صباحا*

مع الصباح ربي ناضت نور لبست حوايجها بزربة و راحت ديراكت عند اياد اما ياسمين ناضت مدقدقة مبدلتش حوايجها قعدت بلبيجاما .. مكسلة تلعب بتلفونها و بلا متفكر فشي حابة تنسا كلشي ....

بعد مدة و تسمع تدقديق لبيتها .... ناضت بكل تكاسل فتحت لباب تصيب واحد الراجل عمرها ما شافتو و حسبتلها واحد ملي يخدمو فالاوتال

ياسمين : وش تسحق ؟؟

الراجل : اااااه والله غير نتي

ياسمين : ااه وليت مشهورة و معلاباليش