الضحية

خريف دائم

رجع وسام من المستشفى ثاني يوم وسولفتله الصار وكتله على الامانه ،،،
- خطية حيل تاثرت على بنتها،،،هجت من البلد كله...
- الله يصبرها،،،
صبيت الغدا ورحت،،،
- وين نهى، ،تعالي تغدي،،،
- ألف عافية ،،،تغديت ويه عمتي جوه،،،والجاي خادر بس صب..
من يوم كسرة الصورة ونهى لبستني وأنا مستحق اللبسة ،،خصوصا بعد ما حاجتني امي،،،
- عيب عليك تصيح على البنية،،بنتك كسرت الصورة ،،،
- ها ادور ذبيتنها على رقية، ،،
- ذبيناها شنو،،شو صاير ما تحترم،،،بنتك سولفتلي (بيبي أنا طيحت الصورة وبابا صيح على ماما نهى)
شويه تهده وحط رجليك بالكاع،،زين وصابره البنية ،،،
- صار يوم،،أن شاء الله أراضيها وابوس راسها،،،
- انشوف؟!
ومن ذاك اليوم والوالدة شدت البدل،،،ونهى أصلا متنكة ورقية أم درب إذا لوحدنا بابا الحلو ويمهن وسام كتلني! !
حتى بنتي مستلمتني ،،،
دخلت لغرفتها وأنا خلصت ولحكتها، ،دكيت الباب ودخلت بدون استئذان، ،،
- نعم وسام محتاج شي؟
- أي محتاج نهى ،،،،
- بشنو رايدهه طبخ ،،غسل ،،تشريفات؟!
- ها هيج صارت ،،،خدمة المرأة لرجلها منية!رحم الله والديج ..
سويت روحي مقهور واجيت إطلع ،،باعتلي ودارت،،،
- سد الباب وياك،،
طلع وانا كوه لازمة روحي ما أروح احضنه،،بس رقية مسولفة لعمتي وعمتي ظلت تحجي علي وكلتلي 'ظبي'..

وسام ،،،
أي وسام الظاهر أمي مصدرة اوامرها،،نهى الخام مو هاي سوالفهه، ،،ميخالف يمه هين ،،،اذا ما خليتها تصالحني 😈😈😈😈
- أخ أيدي أخ ،،،،
ظليت أصبح بالمطبخ وأنا اصب جاي ،،،سويت روحي احتركت وما أحس ألا نهى فوك راسي،،،
- سودة علي شبيك ..وتغسل بأيدي، ،،
- ماكو شي، ،ما انتبهت صبيت الجاي على أيدي، ،،عوفيني هسه احط مرهم واصير زين،،
غسلت ايدي،،وأنا اتوه على اساس متألم، ،،جابت مرهم وبدت تدهن ايدي وأنا حصرتني الضحكة ،،خطية كملت رفعت
رأسها شافتني مبتسم ،،،دنكت لايدي شافتها طبيعيه، ،ظلت تضغط عليها ،،،
- أخ اخ أيدي، ،،
- شبيها ،،انتلت ،،
سحبت ايدي منها وحصرتها على الكاونتر وحضنتها بكل قوة،،،بوست رأسها واديها وشفايفها ،،،،لحد ما داخت بين
ادي، ،،شلتها واخذتها للغرفة وهناك كعدتها بحضني وانا محاوطها بايدي، ،
- كولي مسامحتك ،،،نهى،،قلبي ،،
نهى،،،،دوخني بحركاته ابن الابالسة وظليت أريد صوتي ما الكاه ،،افتهم السكوت علامة الرضا وهو الواقع اللي أنا بي ومددني وبدينا نعبر بالأفعال عن حبنا أو على أقل تقدير حبي أنا ،،،أي حبي إله وهيامي بي وهالمرة مو لوحدة
لا أنا جنت وياه خطوة بخطوة و لهفة بلهفة وشوق وغرااااام.،،،
نمنا شوية واحد بحضن الثاني لحد ما كعدتنا طرقات خفيفة على الباب ،،،رقية،،،فزينا اثنينا بخوف ولبس ملابسه وطلع ،،
- ها باباتي تعالي الاعبج شويه،،،
نقذني وآلله فشلة المفروض نصير أكثر حذر ،،،،،عدت الأيام عادية ما بيها تغيير سوى وسام بدأ يحسبلي حساب و
يحاول يقلل من تأثير الماضي على حاضرنا،،،
رقية سجلناها روضة السنه لأن صارت خمس سنوات حتى تتدرب قبل المدرسة ،،،جبتلها سبورة حتى ادرسها دنفوشتي،،،،
عمتي دائمآ تسأل ماكو شي بالطريق وأنا ما اعرف ليش تأخر الحمل ومن اسأل وسام يكول عادي لأن ما عدت
سنه على زواجنا وماما هم تكول نفس الشي،،،نور أختي امتحنت سادس ومنتظرة النتائج، ،،،
عمي صحته بالنازل ويوميه بالليل ولده وبناته يمه والبيت انخبص، ،،كليته كلش مو تمام والسكر ما مستقر ويوميه
طبيب شكل ،،،
بأحد الليالى الباردة بالخريف من يبدي الجو يتحول والاوراق تصفر وتتساقط ،،سمعنا صرخة عمتي مدوية ومخيفة،،،
نزلنا ركض من الخوف والترقب الدرج صار دهر ،،،فتحنا الباب ركض لغرفتهم لكينا عمي مفارق الحياة بين اديها
وسام ركض على عمي وسحبه من ايدها وبدى ويا إنعاش قلب وعمتي تصرخ وتلطم وأنا ابجي وياها، ،وما فاد
دقايق وشاله وركض للمستشفى وصاح بيه ،،،
- اتصلي على الولد خلي يلحكوني، ،،
اتصلت بيهم وراحوا ورجعوا بعد ساعة بجنازة عمي واشتغل الصراخ والبجي واللطم،،،وليلة كاملة مكابلي ويقرون
قرآن وأدعية والكل اجو ودعوا لهذا الرجل الطيب المؤمن والفجر راحوا ولده ايدفنوا بالنجف، ،ما أعرف أنا وجهي
فكر على هاي العائلة لو اجيتهم بوقت مو مناسب ،،،وقت متوقفة بي الفصول وما بي غير خريف دائم،،،
كالعادة تعزية الرجال بالحسينية والنساء بالبيت ،،والناس ظلت تجي من كل مكان عمام،،خوال،،خالات البيت
انملا ناس،،،أجواء غربية علي وأنا جنت حيل انعزالية ومااخالط ولا ادور مناسبات واتهرب منها هسه صرت بوجه
المدفع والداخل والطالع يصبح نهى،،،أحس رجلي طاحن من الوكفة وغسل الصحون وتحضير الجاي وكف البيت
بالليل ،،ومن اصعد للشقة أحس ميته تعب ،،،،وسام قليل اشوفه بس مكسور ورايح لغير عالم أحس رجعت فقدته
وأنا ما ادري شوكت لكيته؟!
اليوم الثالث اجو بيت عمهم من بغداد ،،،جانوا مسافرين ومن سمعوا رجعوا بوجهم للفاتحة،،،عائلة ستايل وجمال
وكلهم البنات والولد شهايد يعني مثل بيت عمتي،،،البنات أثنين يمنا وامهن،،عبالك طالعات من غلاف مجله نزاكه
وشكل وانفة يحسسوك أنت لاشيء،،،لمى طبيبة من عمر وسام وما متزوجة لأن تدرس اختصاص والثانية مهندسة
ومتزوجه وعندها أطفال ،،،امهن عبالك أصغر منهن مو مثل عمتي المسكينه،،،طبوا يبجون ويعيطون بنزاكه ولما

كل شوية وكالت،،
- سودة علي وسام منين تلكاها من المرحومة لو من عمو😢😢😢😢
عمت عيني شكد حنينه ،،،وأنا منين الكاها منج لو من ابن عمج اللي قنابل ماضيي ما تخلص،،،
بعد ما هدن وسكتن وبدأ التعارف ،،،عمتي قدمتني الهن،،،
- بنت أخوي نهى ،،،زوجة وسام ..
خطية شهكن إلا شوية بس تلاحكن لروحهن، ،،
- عيني فدوة زغيرة، ،،هم طبيبة لو تاب.،،
- لا عيني محامية،،
- وشلون متفاهمين؟!   لمى وبكل صلافة،،،
- ليش يعني؟؟
- لا مو الصنف يفهم صنفه،،،
- مو شرط مو يكولون الأقطاب المتشابهة تتنافر وبالعكس ،،،،
- ههههه صدك محامية ،،،
وبدت الحرب الباردة بينا وخصوصا بالليل من اجوا الولد يسلمون عليهن،،،هاي كبل ذبت روحها بحضن وسام واللي
حاول يبعدها بايدي، ،،
- وسام عمو راح ،،،،وسام راح مثل بابا ،،،،صرنا أيتام وسام ،،،،
أنا واكفة اتفرج على المسلسل التركي مال وسام اللي رفع عينه وخزرته 'وخر بنت عمك لا تلحك بابا وعمي'

طبعا هو افتهم نظراتي وبعد اديها، ،،
- كولي يالله لمى ،،كلنا لهل الطريق ..،،
أنا واكفة واكول أن شاء الله على ايدي موتتكم، ،،،

حبايب اللي تقرون القصة وياكم تصويت وتعليق ،،،،حتى اتشجع تحياتي 💋💋💋💋