الضحية

عودة إلى الحياة

رجعت من شريط الذكريات لواقعي المرير،آب وحيد لطفلة يتيمة وبديت أحس بفراغ كبير ووحدة قاتلة ومؤلمة ....

بيت الخال ...
-حضروا روحكم اليوم دورة السنة مالت زوجة وسام وكلنا نروح ،عمتكم مسوية ثواب والكل متجمعين. ،،
-حاضر بابا ..جوابنه انا ونور مستغربين على اهلي اللي من رجعت العلاقات ويه بيت عمتي وهمه مصخوهه يوميه
رايحين جايين،وطبعا عمتي هم رجعت تمرلنه وتتواصل ويانه وأنا كلبي ابد ممرتاح الهم ....
زينب وماما أحس عدهن مخطط وديينفذوا! استغفر الله أنا شكو، يجوز احساس زينب بالذنب لأن هي سبب القطيعة
بين العائلتين هو السبب ،الله أعلم.
نور أختي مطفية وملتهية بدراستها وأنا هم التهيت بين شغل البيت وشغلي المنزلي ومرت السنة مرور الكرام ..،
بدلنا كلنا ورحنا وجان تجمع عائلي كبير كلش ،وعبالك مو عزة حايرات شمسويات والسناكل كلهن بالمطبخ يساعدن
البنات حسيت اللواكة تقره 100 كلهه تمدح بناتهه وتعرضهن بين قوسين أم بديلة أمام عمتي !!

طبعا أنا باوعت لأمي بعيوني وحذرتهه من هيج طلعات وماما خافت خطية خاف افشلهه تدري بي اضوج من اللواكة. ..
الزغيرة خطية من ايد لايد متونسة وأنا بقلبي ( حبيبتي لو تدرين الحبايب على البابا مو لله)...
وعمتي دقتهم كل شوية وكالت علينا بنات الغالي ،الغاليات ...
طبعا صدك لو كالوا (مصائب قوم عند قوم فوائد).،،
خطية أمها تكسر الخاطر مرة جبيرة وحايرة بزمانها ومستوعبة العروض المجانية وساكته ..
وزعوا أجزاء مال قرآن وبدت الملاية تقرأ على الموت والأم وأهل البيت سلام الله عليهم بس كطعت قلوبنا ...
وزعوا الثواب وأنا ونوار ما كمنه ابد كاعدين يم أمي ونباوع فقط...
شوية شوية خلص المآتم وبدت الناس تروح وماما خابرت بابا حتى نرجع .،.
-راح تروحون خية. .
-أي والله قلب تدرين محد ظل بالبيت والوكت مو تمام .،،
-تعبناكم قلب والله ما لحكت أشبع من الغاليات بنات الغالي ..
-تسلمين عمه أنت هم لا تكطعين بينا. ..
-أن شاء الله يوم.
اجا بابا سلم على عمتي والولد ووصى وسام يلتفت لحاله ويصبر ..
طبعا بعد ما راحت العالم دخلوا الولد لأن ظلينا بس الأهل ووياهم وسام اللي كعد يم بابا...
-أن شاء آلله خالي ،الله ما ينسى عبده .
طبعا بهل الأثناء نور كرصتني لأن فعلا وسام واسمه عليه ،جان بعدة لابس اسود بس لحيته محددهه وعيونه جامدة فاقدة الحياة بلا تعبير ...
سلمنا على الكل ورجعنا وبس وصلنا للبيت صعدنا أنا ونور لغرفتنا واشتغل التصنيف ..
-لج عزة شنو هذا ؟؟!
-اسكتي ما تشوفين بنات العشيرة ذبن لحم، شويه واشك كاتلات مرته الله يرحمها.
-لا والحزن مزيده وسامه. .
-ههههههه خطية بس ما عنده حظ ومبين مكسور على زوجته احترمت وفائه عينه ما شالهه تحسي بغير عالم ..

وعدت الأيام وصارت عمتي تجينه مثل قبل وامي هم تروحلهم وصدفت أحد المرات هي يمنه واجت زينب أختي وزوجها ياسر من بغداد وسلمت على عمتي وبوستهه وأخذت من خاطرها وزوجها هم سلم على عمتي.،،

ومن طلعت عمتي كعدنا كلنا وياهم ،...
-خطية وسام مسكين محتار ببنته ودوامه. ..
-أدري ماما مو امهه موجودة وعمتي وخواته بعد شكو؟
-امهه مرة كبيرة ونظرهه موشي وعمتج هم ما لهه خلك وزوجهه مريض والبنات موظفات وولد عمج رايديهن
اثنينهن. ..
-خلي يزوج لعد .
- هو قابل عمتج تكول حتى سيرة ما يقبل ..
- بارك الله بي أول مرة أشوف واحد وفي!
أنا كل هذا الحجي ساكتة بس حقيقة عجبني وفائه. .
- لا والله صار زحمه الناس متعذبة وأنت معجبة بوفائه والله يا ماما هاي افكارج عمرهه ما راح تنضج.
- يله هسه احنه شكو من يوم الفاتحة وصار شغلنه الشاغل همه.
درت على زينب وزوجهه
- شجبتولنا وياكم لو هل المره كحف!؟
- لا خوية كل شي جبنه بس الجنطة يم اختج. ..
ماما ظلت تضحك علي أنا ونور لأن همنه الأكل واللبس. .
كامت زينب جابت الجنط واحنه كاعدين مثل البزازين واولادهه بحضنه ،،،
- شوفي إذا الصوغات موشي اشمر اولادج ها ...
ماما تخزرني عود عيب من زوجهه.
- ماما لا تخزرينه تره هذا حقنه 😂😂😂😂
أمي خطية إجت تنجلط 😮😮😮..
شوية واجه بابا والتهينه نحضرالعشا ،وزينب ويانه. ..
بعد العشا فرشنالهم بالاستقبال والأولاد ناموا وزينب إجت يمنه لغرفتنه أنا ونور.
- ها شكو ماكو .
- صافية دافية.

-شنو ما ناوية تتحركين؟
- وآلله خليت إعلان بالجرائد ومنتظرة (امراة بحاجة إلى زوج)
- ظلي قلدي وضحكي. .
- يعني شنو الطم لو اكتل روحي ما فهمت ؟!،،
- شويه تنحنحي سالي عن ابن عمتج، اهتمي بعمتج من تجي ،طلعيلج شغلة ومريله للمستشفى...
- عزه بعد ليش ما أحاجي بابا يتقدمله احسن،تدرين بيه ما حب الحيل والدجل والكلاوات، ،،
بعدين الرجال حزين على مرته ويحبهه أنا شكو ،كافي بنات عمج حولن السنوية عرض أزياء. .
- كالت ماما ،حبي أنا شاريد اريدج تتزوجين وتستقرين..
- وآلله أنا مستقرة وحتى بطلت شرب😂😂😂..
- صخونة بس مال ضحك ،وين تلكين مثل ولد عمتي،،،
أنا ونور اثنينه😰😰😰😰😰
- عزة هاي منو إلي تحجي ،لعد ما اخذتي ابنهم ما دام هيج؟؟
- أنا اختلف ،أنا وياسر حب من احنه زغار وهو ما قاصر وبعدين لو ماهو ما اتردد لحظة...
- حبي زوبة طمني ماما اللي تفكرن بي بعيد ،الجروح بعدهه ما طابت وبعدين من حقي أخذ
واحد كلبه فارغ. ..

- على كيفج عيني أم فارغ خاف يطلع كوستر وورا ستوته حمل ...نشوف.
- عزه شنو هو كوه،بعدين عمتي كالت لبابا دكيت بابك وفشلتني ومنهه وهاهيه. ..
- نشوف ؟!
نزلت زينب بعد ما ضوجتني وشغلت بالي معقولة لا مستحيل ..
- شوفي نهى إذا ما تريدي أنا أخذه أحسن من الدارسة وشلعان القلب وهم أكسب ثواب ببنته وتدرين بيه ادور اخره😂😂😂
شمرت المخده عليهه وظلينه نضحك ..
- السنة الجاية ادور لجوء لأن إذا أظل سنة بعد بلا زواج أمي تحط إعلان على الباب (يوجد لدينا زوجة)😂😂😂😂