الضحية

احزاني....

اعرفكم بنفسي أنا وسام ابن خال نهى ،مواليد 1982اشتغل طبيب طالب دراسات جراحة كسور ،حياتي كلش عادية أنا الابن الرابع بالعائلة كدامي ثلاث اولاد وبعدي 2اخوات عائلتنه كلش هادئه نظامية دراسة وشغل هدوء شديد

اخواني الكبار إثنين مهندسين وواحد علوم وخواتي علوم حاسبات وبايو، يعني كلنه شهايد، الوالدة مرة من أهل الله مكملة ابتدائية والوالد معلم واثنينهم جدا متدينين. ..مواصفاتي طويل تارس عيوني شهل ولابس نظارات وشعري أشكر يعني جذاب ،لبسي جان رسمي جدا...

طبعا اليوم يشكل أسوء أيام حياتي بكل معنى الكلمة،اليوم راح مني نصفي الثاني إذا مو كلي 😢😢😢😢حبي وزوجتي ونصفي المحبب سعادتي وهدية ربي إلي...
تعرفت عليهه بالكلية من أول يوم داومت شفتهه بباب القاعة مترددة تدخل لأن جنه متاخرين5دقائق وطبعا ما مسموح التأخير شكلها ناعمة وبيضة جدا وملتزمة جدا باوعتلهه وكلت. ..
-شوفي أنا راح ادخل إذا ترزلت لا تدخلين وإذا لا تعالي ورأي. ..
ابتسمت واشرت براسهه علامة الموافقة ..فتت وحصلت المقسوم من الاستاذ😂😂😂

-بعد وكت عيني هاي من البداية هيج بنص السنة بيش ساعة تجي تفضل أطلع ..

طلعت وأنا ميت ضحك حسيت روحي نقذت سندريلا من زوجة أبوها، شفتهه واكفة اشرتلهه طلعي ومن ذاك اليوم وأنا ملاكها الحارس استنساخ،محاضرات ،شرح أنا موجود ،كانوا تلاثة وأنا اختهم الرابعة لكن فقط علاقة زمالة ونظرات تحمل بطياتها كل معاني الحب اللي بقلوبنا،ست سنوات وأنا اداريهه مثل الماي اللي بالصينية ،بحفل التخرج صارحتها بحبي وهي هم اعترفتلي بحبها طرت وحسيت ملكت الدنيا وبعد التخرج تقدمتلهه بمساعدة أهلي واهلهه اللي ما طلبوا واشترطوا وقدروا كونه بأول الدرب يعني اشتروا رجال ومن ذاك اليوم وأنا همي سعادتها. ..

تزوجنه بعد سنة خطبة وامتلكت جسدها وروحها وصرنا عصافير الحب وبعد سنتين إجت رقية ونورت حياتنا ....
بعدها بدت صحتها تتدهور وبدت رحلة العذاب سلسلة مراجعات وتحاليل كلهن مخيفات خصوصا وأنا وهي أطباء ونعرف التحاليل هاي مال شنو وخوفا من شنو ؟!
وأخيرا طلعت تحاليل الدم وكان أسوء كابوس عشته بحياتي ،لوكيميا ..أخذت التحليل وطلعت كعدت لوحدي بالسيارة على الشط وأنا ابجي ومنهار وخايف شراح اكلهه وهي خطية كل شوية تتصل علي ...

رجعت للبيت ووجهي وحالي ما يبشر بخير ابدا ومن شافتني ظلت ساكته وخايفة ،رحت للغرفة وبدلت وذبيت روحي
على السرير إجت خطية وتمددت يمي وحضنتني وظلينا نبجي اثنينا،ظليت حاضنهه وأصبح لا تخافين روحي فدااااج يا كل روحي أنت ...
-اسم الله عليك ،خايفة عليك وعلى بنتي وأحس بعدني ما مستعدة للموت ....تحجي وتناشغ وانا وياهه...
بلغنا الأهل اللي انهاروا وخصوصا أمها لأن والدها توفى بعد سنة من زواجنا ..
انخبصنا أهلي واهلها وصار القرار نطلع للهند وبدت رحلة العلاج والقلق والخوف وسلسلة من التحاليل مالها نهاية
والأخير طلع نوع نادر وقاتل. ..
ورجعنا من الرحلة منهارين وبدت رحلة لبنان وبعدها العلاج الكيميائي وانتهت بعد كل جلسة وذبلت كبال عيني
يوم ورا يوم إلى أن تحسنت شوية ورجعنا للعراق وكل هاي الفترة بنتنا عند امها. ..رجعت اداوم وقدمت دراسات و
امتحنت وما اعرف شلون انقبلت وبدت حياتنا لفترة ترجع طبيعية لكن بأخر مراجعة كانت التحاليل الهه رأي ثاني ...

طبعا كل الأطباء وأصدقائي كلولي هل الشي بس أنا ما ايست ما أريد اعوف المعركة بدون قتال ولذلك تعبتهه وياي رغم طلبهه أنه تموت ابيتهه وبين أهلها وبسلام 😢😢😢😢...
رجعنا للبنان وساءت حالتها كلش وأنا وأختها وياهه وبدت تدخل بكوما وتغيب عن الوعي فترات طويلة ومن تصحى
تريد رقية وباحد الصباحات جنت نايم شوية من التعب ما اعرف شلون غمضت عيني كعدت خايف أحس الدنيا خالية منها وفعلا نامت وبعدها ما كعدت ابدا ،،
صحيت من رحلة ذكرياتي على ايد رقية الصغيره تلعب بشعري. ..
-بابا بابا أنا جوعانه. ..